ޕްރޮސިކިއުޓަ ޖެނެރަލް ވަކިކުރުމަށް ހުށަހެޅި މައްސަލަ އަނބުރާ ނަގައިފި

ޕްރޮސިކިއުޓަ ޖެނެރަލް އައިޝަތު ބިޝާމް މަގާމުން ވަކިކުރުމަށް ތިނަދޫ ދެކުނު ދާއިރާގެ މެމްބަރު އަބްދުﷲ އަހްމަދު (އަބުޅޯ) ހުށަހެޅުއްވި މައްސަލަ ރައްޔިތުންގެ މަޖިލީހަށް ހުށަހެޅުމަށް ފަހު އަނބުރާ ނައިފިއެވެ.

ޕްރޮސިކިއުޓަ ޖެނެރަލް އައިޝަތު ބިޝާމް މަގާމުން ވަކިކުރުމުގެ މައްސަލަ މަޖްލީހަށް ހުށަހެޅުއްވީ މިދިއަ ހޯމަ ދުވަހުއެވެ. ނަމަވެސް ހަމަ އެދުވަހު މެމްބަރު އަބްދުﷲ ވަނީ އެމައްސަލަ އަނބުރާ ގެންދަވާފައެވެ.

މަޖްލީހަށް ހުށަހެޅި މައްސަލައިގައި އަބްދުﷲ މެމްބަރު އަބްދުﷲ ތުހުމަތު ކުރައްވާފައި ވަނީ ޕީޖީ ބިސާމް ރައްޔިތުންގެ މަޖިލީހުގެ މެމްބަރުންނާމެދު އަމަލު ކުރައްވާފައިވަނީ ސިޔާސީ ވިސްނުމެއްގައި ކަމަށާއި މެމްބަރުންނަށް ދައުވާތައް އުފުލާފައި ވަނީ އެއްވެސް ބެލުމެއް ނެތި ސިޔާސީ ގޮތުން ކަމަށެވެ.

ހުކުރު ދުވަހު (މިއަދު) އޮންލައިން ނޫސް "މިހާރު" އަށް ރައްޔިތުންގެ މަޖިލީހުގެ އަމީން އާއްމު ފާތިމަތު ނިއުޝާ މައުލޫމާތު ދެއްވަމުން ވިދާޅުވީ މިދިޔަ ހޯމަ ދުވަހު ތިނަދޫ ދެކުނު ދާއިރާގެ މެމްބަރު އަބްދުﷲ އަހްމަދު (އަބުޅޯ) ހުށަހެޅުއްވި މައްސަލަ ހަމަ އެ ދުވަހު އަނބުރާ ނަންގަވާފައިވާ ކަމަށެވެ.

ޕްރޮސިކިއުޓަ ޖެނެރަލް ބިޝާމްގެ މައްސަލަ އަނބުރާ ގެންދެވި ސަބަބު ހޯދުމަށް "ރާއްޖެއެމްވީ" އިން މެމްބަރު އަބްދުﷲ އަށް ގުޅާލުމުން ވިދާޅުވީ "މިވަގުތު މީނީ ބަޔަކާއެކު، ތިވާހަކަ ކިޔައިދޭން ފަހުން ގުޅާނަން" ކަމަށެވެ.

އޭގެ ވަގުތުކޮޅެއް ފަހުން އެމައްސަލަ އަނބުރާ ނެންގެވި ސަބަބެއް ކަމަށް ވިދާޅުވެ، އަބްދުﷲ ޓްވީޓް ކުރައްވާފައިވަނީ އިސްލާހު ކުރަންޖެހޭ ބައެއް ކަންކަން ހުރުމުން، އެކަންކަން އިސްލާހުކޮށްފައި އަލުން މަޖްލީހަށް ހުށަހެޅުމަށް ކަމަށް ވިދާޅުވެއެވެ.

އަބްދުﷲ ވިދާޅުވީ ބިޝާމް މަޤާމުން ދުރުކުރުމަށް ހުށަހެޅި މައްސަލައިގައި ފާހަގަކޮށްފައިވަނީ ޖުމްލަ ފަސް ކަމެއް ނަމަވެސް އިތުރަށް ފާހަގަ ކުރަންޖެހޭ ބައެއް ކަންކަން ހުރުމުން އެކަންތައްތައް އިސްލާހުކުރުމަށްފަހު އަލުން މަޖްލީހަށް ހުށަހަޅުއްވާނެ ކަމަށެވެ.

"ޕީޖީ ބިޝާމްގެ އިތުބާރު ނެތްކަމުގެ މައްސަލައިގައި އަޅުގަނޑު ހުށަހެޅި ކަންކަމުގައި ހިމެނިފައިވާނީ ފަސް ކަމެއް، ނަމަވެސް އިތުރަށް އިތުރަށް ފާހަގަކުރަންޖެހޭ ބައެއް ކަންތައްތަކެއް ހުރުމާއެކު އެކަން އިސްލާހުކޮށްފައި މައްސަލަ މަޖްލީހަށް ވަށްދާނަން، އަދި ނުނިމޭ ޕީޖީ ބިޝާމް ބޭރުކުރެވޭނެ" އަބްދުﷲ ވިދާޅުވެފައިވެއެވެ.

ކުރިން އެޓާނީ ޖެނެރަލްގެ މަގާމު ވެސް ފުރުއްވި ބިޝާމް ޕީޖީގެ މަގާމަށް ނޮވެމްބަރު، 2015 ގައި އައްޔަން ކުރެއްވީ އޭރުގެ ޕީޖީ މުހުތާޒް މުހުސިންގެ އިތުބާރު ނެތް ކަމަށް މަޖިލީހުން ފާސްކޮށް، އޭނާ މަގާމުން ވަކި ކުރުމުންނެވެ. އޭރު ބިޝާމް ހުންނެވީ ރައީސް އަބްދުﷲ ޔާމީންގެ ލީގަލް އެޑްވައިޒަރަކަށް ރައީސް އޮފީހުގަ އެވެ.

ރައީސް ޔާމީންގެ ސަރުކާރުން ސިޔާސީ ލީޑަރުން ޖަލަށްލާފައިވާއިރު އެ ދައުވާތައް ކުރީ ރައީސް ޔާމީންގެ އެންގުމަށް ސިޔާސީ ބޭނުމުގައި ބިޝާމް ކަމަށް އިދިކޮޅު ފަރާތްތަކުން އޭރު ތުހުމަތު ކުރި އެވެ.

މިދިޔަ ރިޔާސީ އިންތިޚާބުގެ ނަތީޖާ އަށް ފަހު، ބައެއް ދައުވާތައް ޕީޖީން އަނބުރާ ގެނައުމާއި ބައެއް ތުހުމަތުތަކުގައި ބަންދުގައި ތިބި މީހުން މިނިވަން ކުރުމުގެ އިތުރުން ބައެއް ސިޔާސީ ލީޑަރުންގެ މައްޗަށްކޮށްފައިވާ ހުކުމްތައް ރިވިއުކޮށްދިނުމަށް ސުޕްރީމް ކޯޓުގައި އެދިފައިވެއެވެ.

ގާނޫނު އަސާސީގައި ޕީޖީ އައްޔަން ކުރުމާއި ވަކިކުރުމުގެ ބާރު ދީފައިވަނީ ރައްޔިތުންގެ މަޖިލީހަށެވެ.

ޤާނޫނު އަސާސީގައި އެހެން އޮތްނަމަވެސް ސުޕްރީމް ކޯޓުން މިދިޔަ އަހަރު ކުރި ހުކުމެއްގައިވާ ގޮތުން ޕްރޮސެކިއުޓާ ޖެނެރަލްގެ އިތުބާރު ނެތްކަމަށް މަޖިލީހުން ފާސް ކުރިޔަސް، އެ ކަމުގައި ފަހު ބަސް ބުނާނީ ސުޕްރީމް ކޯޓުންނެވެ.