ސްނައިޕަރއެއް ކަމަށް ބުނެ ކުރީގެ ސަރުކާރުން ހައްޔަރުކޮށްފައިވާ ސްރީލަންކާގެ ރައްޔިތެއްކަމަށްވާ ލަހިރު މަދުޝަންކާ ސަލާމަތްވުމުން އުފާވާ ކަމަށާއި ތިން އަހަރު އޭނާ ހޭދަކުރީ ޝޮކެއްގައި ކަމަށް ސްރީލަންކާގެ މިނިސްޓަރ އޮފް ސްޕޯޓްސް އެންޑް ޕްރޮވިންޝިއަލް ކައުންސިލްސް އެންޑް ލޯކަލް ގަވަރމަންޓް ފައިޒަރު މުސްތަފާ ވިދާޅުވެއްޖެއެވެ.
2015 ވަނަ އަހަރު މަދުޝަންކާ ހައްޔަރުކުރީ ރައީސް އަބްދުﷲ ޔާމީން އަވަހަރާކޮށްލަން އޭރުގެ ނައިބު ރައީސް އަހުމަދު އަދީބުގެ ރޭވުމެއްގެ ދަށުން ގެނައި ސްނައިޕަރެއްކަމަށް ބުނެއެވެ.
ލަހިރު މަދުޝަންކާ ސަލާމަތްވުމާއި ގުޅިގެން މާލޭ ޖަލުގެ ބޭރުގައި ހުންނަވައި ރާއްޖެއެމްވީއަށް ދެއްވި އިންޓަވިއުއެއްގައި މުސްތަފާ ވިދާޅުވީ ތިން އަހަރު ވަންދެން ލަހިރު އުޅުނީ އާއިލާއާއި ދުރުގައި ކަމަށާއި އޭނާގެ 6 އަހަރުގެ ދަރިއެއް ހުންނަ ކަމަށެވެ. ދަރިއާއި އާއިލާއާއި ދުރުގައި ހުންނަން ޖެހުމަކީ ހިތްދަތިކަމެއް ކަމަށާއި އޭނާ އާއިލާއާއި އަލުން ގުޅުމަކީ އެންމެ މުހިއްމު އަހަމިއްޔަތުކަމެއް ދޭނެ ކަމެއްކަމަށް އޭނާ ވިދާޅުވިއެވެ.
" އޭނާ ތިން އަހަރު ވަންދެން ޓްރޯމާއެއްގެ ތެރޭގައި އުޅުނީ.އެކަމާއި ދެރަވެ ހިތާމަކުރަން. ހަ އަހަރުގެ ދަރިފުޅެއް ހުރޭ. ތިން އަހަރު ވަންދެން އެދަރިއަށް ބައްޕަ ނުފެނި ދިޔައީ. " މުސްތަފާ ވިދާޅުވިއެވެ.
ފައިޒަރު މުސްތަފާ ވިދާޅުވީ ލަހިރު މަދުޝަންކާގެ މައްޗަށް ކުށް ސާބިތު ނުވެ އޭނާގެ މައްސަލަ ސާބިތު ނުވާކަމަށް ނިންމުމުން އުފާކުރައްވާކަމަށެވެ.
