އުދުހޭ ބަކަރި!

ފުރަތަމަ އުދުހޭ ބަކަރިއަކީ ކޮބައިކަން ބަލާލަމާ ހިނގާށެވެ.

އަދުރޭ އާއި މަނިކުއަކީ ވަރަށް ގާތް ދެ ރަހްމަތްތެރިންނެވެ. އެއް ދުވަހަކު އެ ދެ މީހުން ސަހަރެއްގައި ހިނގާފައި ދަނިކޮށް، ތަންކޮޅެއް ދުރުން ބޮޑު ދޫންޏެއް ކަހަލަ އެއްޗެއް ފެނުނެވެ. ކުއްލިއަކަށް މަނިކު ބުނެފި އެވެ. "އެއިނީ ބަކަރިއެއް" ކެވެ. އަދުރޭ އެދިމާލަން ބަލާލުމަށްފަހު ބުނެފި އެވެ. "ނޫން އެއީ ބޮޑު ދޫންޏެއް" ކަމަށެވެ.

ކޮންމެ އަކަސް އެ ދެ މީހުންގެ ހިޔާލުތަފާތުވެ، ބެޓް ކޮށްފި އެވެ. އަދުރޭ ވެސް މަނިކުވެސް ގޮތް ދޫކުރާކަން ބޭނުމެއް ނުވިއެވެ. ވަކި ހިސާބަކަށް ދެނުވުތަނާ އަދުރޭ އެ ސަރަހައްދުން ފެނުނު ގާގަނޑެއް އެ ދޫންޏާ ދިމާލަށް އެއްލާލައިފިއެވެ. ގާގަނޑު އެދޫނި ކައިރި ބިންމަތީ ޖެހުމާއެކު އުދުއްސާލައިފިއެވެ. އެއީ ބަކަރިއެއް ނޫނެވެ. ބޮޑު ދޫންޏެކެވެ.

އެއީ ދޫންޏެއްކަން އެނގުމާއެކު އަދުރޭ ވަރަށް ފޮނި ވެލާފައި ބުނެފިއެވެ. "ކޮބާ މަބުނީމެއްނު އެއީ ދޫންޏެކޭ"، އަދުރޭ އެހެން ބުނުމާއެކު މަނިކުވެސް ބުނެފިއެވެ. "އެއީ އުދުހޭ ބަކަރިއެކެވެ". އަސްލު މަނިކަށް ވެސް އެއީ ބަކަރިއެއް ނޫންކަން އެނގެއެވެ. ހަމަ ގޮތް ދޫކުރަން ބޭނުންނުވީއެވެ.

ގޮތް ދޫކުރަން ބޭނުން ނޫންނަމަ، މަނިކަށް ބަކަރި ވެސް އުދުހިދާނެތާއެވެ. ނަމަވެސް އެއީ އޭނާ ދެކޭ ގޮތެވެ. ހަގީގަތަކީ ބަކަރިއަކީ އޭގެ ޒާތުގައި އުދުހޭ އުޅޭ އެއްޗެއް ނޫންކަމެވެ.

ބުނަން މިއުޅޭނީ ނިމިދިޔަ ސަރުކާރަކީ ރާއްޖެ ދުއް އެންމެ ބޮޑެތި ޖަރީމާތައް ހިންގި ސަރުކާރުކަން ގިނަ ރައްޔިތުން ގަބޫލު ކުރެއެވެ. ގައުމު ތަރައްގީ ކުރަނީ ކަމަށްބުނެ، ބޮޑެތި އަދުތަކުން ދައުލަތުގެ ފައިސާއިން ވައްކަން ކޮށްފިއެވެ. ބޮޑެތި ކޮރަޕްޝަންގެ އެތައް އަމަލުތަކެއް ހިންގައިފިއެވެ. މާރާމާރީއާއި މީހުންމެރުމާއި ރައްޔިތުންގެ މެދުގައި މިހާވަރަށް ފިތުނަ ފަސާދަ އުފެދުނު ދުވަސްވަރެއް ނުދެކެވެ.

ނަމަވެސް މަނިކަށް އުދުހޭ ބަކަރިއެއް ފެނުނުގޮތަށް ރައީސް ޔާމީން ސަރުކާރުން ހިންގާފައިވާ ވައްކަމާއި ކޮރަޕްޝަނުގެ މައްސަލަތައް އެއީ ތަރައްގީގެ ބޮޑެތި ބިޔަ މަޝްރޫއުތަކުގެ ގޮތުގައި ރައީސް ޔާމީނަށް ވަފާތެރި މީހުންނަށް ފެނިދާނެތާއެވެ.

މީގައި އެންމެ ބޮޑު ނުރައްކަލަކީ މިބުނާ މަނިކުމެންފަދަ މީހުން ބޯވަގެ އުސޫލުވެސް ގެންގުޅޭތީއެވެ. ކުލަ ބަދަލުކުރުމާއި އިދިކޮޅު މީހުންގެ ތެރެއަށް އިދިކޮޅު މީހުންގެ ކުލައަށް ބަދަލުކޮށްލައިގެން ވަދެގަންނާތީއެވެ.

އެއަށްވުރެ ބޮޑު ނުރައްކަލަކީ، ކުލަ ބަދަލުކުރާ މީހުންގެ ނުފޫޒު ބޮޑުވެ، އިހުލާސްތެރިންނަކީ ކޮބައިކަން އޮޅޭ ހިސާބަށް ގައުމުގެ ކަންކަން ދިއުމެވެ. އާހިރުގައި ވައްކަން ކުރި މީހާއަށް ވައްކަމުގެ އެމައްސަލަ ބަލަން ހަވާލުކުރާ ހިސާބަށް ރާއްޖޭގެ ކަންކަން ގޮސްދާނެ ކަމާމެދު ކަންބޮޑު ވެއެވެ.

މިވަގުތު ގައުމުގައި ފަތުއަޑު ކިޔާފައި އިވޭއަޑަކީ ބައެއް މީހުން ބޯވަ ހެދިގެން އުޅޭ ވާހަކައެވެ. އަނެއް ބަޔަކު ކުލަ ބަދަލުކުރާ ބޮނޑެއް ގޮތަށް އުޅޭ ވާހަކައެވެ. ދެން ތިބި ބަޔަކު ގާހަކައަކަށް ވެގެން އިންނައިރު، އޭގެ މައްޗަށް އެރޭއިރު ރޭކާލާނީވެސް ހޭނެތޭވަރަށް ދިލަ ނަގަން ފެށުމުންނެވެ.