65 އަހަރު ފުރުމަކުން މަޖިލީހުގެ ރައީސްކަމުގެ މަގާމުގައި ހުންނެވުމުގައި ގާނޫނީ ހުރަހެއް ނެތް: މަޖިލިސް
4 ނޮވެމްބަރު 2018 | އާދީއްތަ 14:11މަޖިލީހުގެ ނައިބު ރައީސަށް ވެސް ޒިންމާ އަދާކުރެވޭނެ
މަޖިލީހުގެ ނައިބު ރައީސް މޫސާ މަނިކު
ރައްޔިތުންގެ މަޖިލީހުގެ ރައީސް ކަމުގެ މަގާމުގައި ހުންނަވާ ބޭފުޅަކަށް 65 އަހަރު ވުމަކުން އެމަގާމުގައި ދެމި ހުންނެވުމުގެ ގާނޫނީ އެއްވެސް ހުރަހެއް ނެތް ކަމަށް ރައްޔިތުންގެ މަޖިލީހުން ބުނެފި އެވެ.
ރައްޔިތުންގެ މަޖިލީހުގެ ނައިބު ރައީސް މޫސާ މަނިކު އަދިއްތަ ދުވަހު ބޭއްވި ނޫސްވެރިންގެ ބައްދަލުވުމުގައި މޫސަ އެގޮތަށް ވިދާޅުވީ ރައީސް އޮފީހުގެ ލީގަލް އެފެއާރޒު މިނިސްޓަރު އާއިޝަތު އާޒިމާ ޝަކޫރު ވިދާޅުވި ވާހަކައަކާ ގުޅިގެންނެވެ.
އާޒިމާ އޭނާގެ ފޭސްބުކްގައި ލިޔުއްވާފައިވާ ޕޯސްޓެއްގައި ވަނީ ރައީސުލްޖުމްހޫރިއްޔާއާއި ރައީސުލްޖުމްހޫރިއްޔާގެ ނައިބު މަގާމުން އިސްތިއުފާ ދެއްވައިފިނަމަ، ރައީސުލްޖުމްހޫރިއްޔާ ކަމުގެ މަގާމުގެ މަސްއޫލިއްޔަތު އުފުލަންޖެހޭނީ ރައްޔިތުންގެ މަޖިލީހުގެ ރައީސް ކަމަށެވެ، އެހެންކަމުން މަޖިލީހުގެ ރައީސް ކަމުގެ މަގާމުގައި ހުންނަވާ ބޭފުޅަކުވެސް ރައީސުލްޖުމްހޫރިއްޔާގެ ކިބައިގައި ހުންނަންޖެހޭ ޝަރުތު ފުރުހަމަވާން ޖެހޭނެ ކަމަށެވެ. އެގޮތުން މަޖިލީހުގެ ރައީސް ކަމުގެ މަގާމަށް ދާދިފަހުން އައްޔަން ކުރެއްވި ޖުމްހޫރީ ޕާޓީގެ ލީޑަރު ގާސިމް އިބްރާހީމް އަށް 65 އަހަރު ފުރިފައިވާތީ ގާސިމްގެ އެމަގާމާމެދު އާޒިމާ ވަނީ ސުވާލު އުފައްދަވާފަ އެވެ.
މޫސަ ވިދާޅުވީ މަޖިލީހުގެ ރައީސަކީ ދިމާވާ ހާލަތެއްގައި އެ ޒިންމާ އަދާކުރައްވަންޖެހޭ ފަރާތެއް ކަމުން އެއީ ގާނޫނީ ހުރަހަކަށް ވާނެ ކަމަށް ގަބޫލު ނުކުރެވޭ ކަމަށާއި އަދި މަޖިލީހުގެ ރައީސަށް ރައީސުލްޖުމްހޫރިއްޔާގެ މަގާމު ފުރުއްވުމަށް ގާނޫނީ ހުރަހެއް އޮތްނަމަ، މަޖިލީހުގެ ނައިބު ރައީސް ވެސް އެ ޒިންމާ ނަންގަވަން ހުންނަވާނެ ކަމަށެވެ. އަދި ރައްޔިތުންގެ މަޖިލީހަށް ހުށަހެޅޭ ގަރާރެއްގެ ދަށުން ވެސް ކަންކަން ނިންމުމުގެ ބާރު މަޖިލީހަށް ލިބިގެންވާ ކަމަށްވެސް މޫސަ ވިދާޅުވި އެވެ.
މޫސަ ވިދާޅުވީ ރައްޔިތުންގެ މަޖިލީހަށް 18 އަހަރުން މަތީގެ އުމުރުގެ ޝަރުތު ފުރިހަމަވާ ފަރާތްތަކަށް މެމްބަރުކަމަށް ކުރިމަތި ލެވޭއިރު، ރައްޔިތުންގެ ރައީސް ކަމުގެ މަގާމަށް ވާދަކުރުމުގެ ފުރުސަތު ރައްޔިތުންގެ މަޖިލީހުގެ ކޮންމެ މެމްބަރަކަށް ވެސް ލިބިގެންވާ ކަމަށެވެ.
