މަސީހުގެ އިތުބާރު ނެތްކަމުގެ މައްސަލަ އެޖެންޑާ ކޮށްފި
މަސީހު އަމަލު ކުރައްވަނީ މަޖިލީހުގެ ގަވާއިދާ ހިލާފަށް ކަމަށް އިދިކޮޅު މެމްބަރުން ވިދާޅުވޭ
މަޖިިލީހުގެ ރައީސް އަބްދުﷲ މަސީހު
ރައްޔިތުންގެ މަޖިލީހުގެ ރައީސް އަބްދުﷲ މަސީހު މުހައްމަދުގެ އިތުބާރު ނެތްކަމުގެ މައްސަލަ އަންނަ ނޮވެމްބަރު މަހުގެ 08 ވަނަ ދުވަހަށް ތާވަލް ކުރަން މަޖިލީހުގެ އިދާރާއިން ނިންމައިފި އެވެ.
ރައްޔިތުންގެ މަޖިލީހުގެ އަމީން އާންމު ފާތިމަތު ނިޔުޝާ މަޖިލިސް މެމްބަރުންނަށް ބުދަ ދުވަހު ފޮނުއްވާފައިވާ ސިޓީގައި ވަނީ ރައްޔިތުންގެ މަޖިލީހުގެ 51 މެމްބަރުން ސޮއި ކުރައްވައި، މަޖިލީހުގެ ރައީސް މަސީހުގެ އިތުބާރު ނެތްކަމުގެ މައްސަލައެއް ބުދަ ދުވަހު ލިބިފައިވާ ކަމަށެވެ.
ރައްޔިތުންގެ މަޖިލީހުގެ ގަވާއިދުގައި ބުނަނީ އެފަދަ މައްސަލަ މަޖިލީހަށް ލިބުމުން. އެލިޔުން ލިބޭތާ ގިނަވެގެން ރަސްމީ ބަންދުނޫން ތިން ދުވަހުގެ ތެރޭގައި އެކަން މެމްބަރުންނަށާއި މަޖިލީހުގެ ރައީސް މަސީހަށް ނޯޓިސް ފޮނުވަންޖެހޭނެ ކަމަށެވެ.
އެގޮތުގެ މަތިން އަމީން އާންމު މިވަނީ މަޖިލީހުގެ ރައީސްގެ އިތުބާރު ނެތްކަމުގެ މައްސަލައެއް މަޖިލީހަށް ލިބިފައިވާތީ، އެކަން މަޖިލީހުގެ ރައީސަށާއި މަޖިލީހުގެ މެމްބަރުންނަށް ނޯޓިސް ފޮނުވާފަ އެވެ.
މީގެއިތުރުން މަޖިލީހުގެ ގަވާއިދުގައި ބުނަނީ، އެމައްސަލައިގެ ނޯޓިސް ފޮނުވުމަށް ފަހު، އެ ނޯޓިހުގެ ތާރީހުން ފެށިގެން ރަސްމީ ބަންދުނޫން 10 ދުވަހުގެ މުއްދަތު އެރުވުމަށް ފަހު އެންމެ އަވަހަށް އަންނަ ރަސްމީ ބަންދުނޫން ދުވަހަކު ބާއްވާ ޖަލްސާއަށް އެމައްސަލަ ހުށަހަޅަންވާނެ ކަމަށެވެ.
އެހެންކަމުން، މަޖިލީހުގެ ގަވާއިދުގައިވާ ގޮތުގެ މަތިން އަންނަ ނޮވެމްބަރު މަހުގެ 08 ވަނަ ދުވަހު މަސީހުގެ އިތުބާރު ނެތްކަމުގެ މައްސަލަ އެޖެންޑާ ކުރުމަށް ނިންމާފައިވާ ކަމަށް އަމީން އާންމު މެމްބަރުންނަށް ފޮނުއްވާފައިވާ ސިޓީގައި ވެއެވެ.
މަސީހުގެ އިތުބާރު ނެތް ކަމުގެ މައްސަލައެއް މަޖިލީހަށް ހުށަހެޅި މިއީ ތިން ވަނަ ފަހަރެވެ. ފުރަތަމަ މިދިއަ އަހަރުގެ މާރޗު މަހުގެ ތެރޭގައި ހުށަހެޅުމަށް ފަހު ވަނީ އެމައްސަލަ ނަގާފަ އެވެ. ދެވަނަ ފަހަރު މަޖިލީހަށް ހުށަހެޅުމުން، ސަރުކާރަށް ނިސްބަތްވާ މެމްބަރުން ވަނީ މަޖިލީހުގެ ރައީސާއި ނާއިބު ރައީސްގެ އިތުބާރު ނެތްކަމުގެ މައްސަލައެއް މަޖިލީހަށް ހުށަހެޅޭނީ، މަޖިލީހުގެ ދެ ބައިކުޅަ އެއްބަޔަށް ވުރެ ގިނަ މެމްބަރުން ސޮއި ހިމެނެންޖެހޭ ގޮތަށް މަޖިލީހުގެ ގަވާއިދު އިސްލާހު ކޮށްފަ އެވެ.
މަޖިލީހުގެ ގަވާއިދު އެގޮތަށް އިސްލާހު ކުރުމުން ގުޅިފައިވާ ސިޔާސީ ޕާޓީތަކުން ވަނީ މަޖިލީހުގެ ދެބައިކުޅަ އެއްބަޔަށް ވުރެ ގިނަ މެމްބަރުންގެ ސޮޔާއެކު މަސީހުގެ އިތުބާރު ނެތްކަމުގެ މައްސަލަ މިދިއަ އަހަރުގެ ޖުލައި މަހުގެ ތެރޭގައި މަޖިލީހަށް ހުށަހަޅުއްވާފަ އެވެ. ނަމަވެސް އެމައްސަލަ ވެސް މަޖިލީހުގެ އިދާރާއިން ވަނީ ބޭރުކޮށްލާފަ އެވެ.
އޭގެ ފަހުން ގުޅިފައިވާ ސިޔާސީ ޕާޓީތަކުގެ ޖޮއިންޓް ޕާލަމެންޓްރީ ގްރޫޕުން ވަނީ މަސީހު ރިޔާސަތުގައި އިންނަވާ ޖަލްސާތަކުގައި ބައިވެރިވެ ވަޑައިނުގަންނަވާނެ ކަމަށް ވިދާޅުވެ، ރައްޔިތުންގެ މަޖިލީހުގެ ޖަލްސާތައް ބޮއިކޮޓް ކުރައްވާފަ އެވެ.
މަސީހުގެ އިތުރުބާރު ނެތްކަމުގެ މައްސަލަ ބުދަ ދުވަހު ހުށަހެޅުއްވުމަށް ފަހު، ގުޅިފައިވާ ސިޔާސީ ޕާޓީތަކުން ވަނީ މަސީހު އިސްތިއުފާ ދެއްވުމަށް ހަރުއަޑުން ގޮވާލައްވާފަ އެވެ.
