މަޑުއްވަރީގައި ފުލުހުންގެ ކާރަކަށް ގެއްލުންދިން މައްސަލައިގައި މީހަކު ހައްޔަރުކޮށްފި
26 ޑިސެމްބަރު 2017 | އަންގާރަ 00:24މި މައްސަލައިގައި ހައްޔަރުކޮށްފައިވަނީ 41 އަހަރުގެ ފިރިހެނެއް
ފުލުހުންގެ ވެހިކަލެއްގެ ކައިރީގައި ފުލުހުންތަކެއް މަޑުކޮށްލައިގެން
ރ. މަޑުއްވަރީގައި ފުލުހުން ބޭނުންކުރާ ވެހިކަލަކަށް ގެއްލުން ދިން މައްސަލައިގައި މީހަކު ހައްޔަރުކޮށްފިއެވެ.
މި ޑިސެމްބަރ މަހުގެ 21 ވަނަ ދުވަހުގެރޭ ފުލުހުންގެ ކާރަކަށް ގެއްލުންދީ، ކާރުގެ ބިއްލޫރިގަނޑެއް ތަޅައިލި މައްސަލައިގައި ކޯޓު އަމުރެއްގެ ދަށުން ހައްޔަރުކޮށްފައިވަނީ އުމުރުން 41 އަހަރުގެ ފިރިހެނެކެވެ.
އެމީހާގެ ބަންދަށް ކޯޓުން ވަނީ 15 ދުވަހުގެ މުއްދަތެއް ޖަހައިދީފައެވެ.
ފުލުހުންގެ ކާރަށް ގެއްލުންދިން މައްސަލައާއި ގުޅިގެން މީހަކު ހައްޔަރުކޮށްފައިވާއިރު، ފުލުހުން ވަނީ މި އަމަލު ހިންގި މީހަކު ނުވަތަ ބަޔަކު ހޯދުމަށް ޚާއްސަ ތަޙުޤީޤެއް ކުރިއަށް ގެންގޮސްފައެވެ.
އަދި މިފަދަ އަމަލުތައް ކުށްވެރިކުރާ ކަމަށާއި، މިފަދަ އަމަލުތައް ކުރާ ފަރާތްތައް ހޯދައި އެފަރާތްތަކާއިމެދު ޤާނޫނީ ތަރަހައިގެ ތެރެއިން އެޅެން އޮތް އެންމެ ހަރުކަށި ފިޔަވަޅު އަޅަމުން ދާނެ ކަމަށް ފުލުހުންގެ މީޑިއާ އޮފިސަރ ވަނީ ވިދާޅުވެފައެވެ.
