އާ ސަރުކާރުން އެންމެ ފުރަތަމަ ކުރަންޖެހޭ އެންމެ ކަމަކީ މިހާރު ހިނގަމުންދާ ސަރުކާރުގެ ވެރިން ފޭރިގެންފައިވާ ފައިސާ ހޯދައި ބައިތުލްމާލަށް ވެއްދުން ކަމަށް ރައީސް އަބުދުﷲ ޔާމީންގެ ފުރަތަމަ ނައިބުރައީސް ޑރ. މުހައްމަދު ޖަމީލު އަހުމަދު ވިދާޅުވެއްޖެއެވެ.
ހޯމަ ދުވަހުގެ ރޭ ރާއްޖެޓީވީގެ ފަލަ ސުރުހީ ޕްރޮގްރާމްގައި ވާހަކަފުޅު ދައްކަވަމުން ޑރ. ޖަމީލު ވިދާޅުވީ، އާ ސަރުކާރަށް ކުރައްވާނެ އިލްތިމާސަކީވެސް އަދި ދޭނެ ނަސޭހަތަކީވެސް އެއީ ކަމަށާއި އެކަން ނުކުރާކަމަށް ވާނަމަ އިސްލާހުގެ ވާހަކަ ދެއްކުން ހުއްޓާލަންވީކަމަށެވެ.
ރާއްޖޭގެ ފަޅުތަކާއި ބިންތަކާއި ހުޅުމާލޭގެ ފްލެޓްތައް ބެހިގެންދިޔަ ގޮތުގެ ހިސާބު ނުބެލޭކަމުގައި ވަނީނަމަ އެއީ މައްސަލައެއް ކަމަށް އޭނާ ވިދާޅުވިއެވެ.
"ގެދޮރުވެރިކުރުމުގެ ނަމުގައި މެޑަމް ފަތުންގެ ވަށައިގެންތިބި ހުރިހާ މީހުން، އެއީ ރަހުމާ ކައުގައި ވިޔަސް ޚާލިދާ ކަމުގައިވިޔަސް އެއީ މާނު ކަމުގައި ވިޔަސް އިބުރާހިމަކަސް ހަސަނަކަސް އެމީސް މީހުނާއި ޕީޕީއެމްގެ މަޖިލިސް މެންބަރުން. ނިހާނާއި އަބުދުއްރަހީމާއި އެބޭބޭފުޅުން ދަރިންގެ ނަމުގައްޔާއި އަމިއްލަ ނަމުގައި ފައިސާއާއި އަގު ބޮޑެތި ފްލެޓްތައް ހޯދީ ކޮންތަނަކުންތޯ ބަލަން ޖެހޭ،" ޑރ. ޖަމީލް ވިދާޅުވިއެވެ.
އިނގިރޭސި ވިލާތުން ހިމާޔަތް ހޯދަވައިގެން ގިނަ ދުވަސްތަކެއް ވަންދެން އުޅުއްވުމަށް ފަހު ދާދި ފަހުން ރާއްޖެ ވަޑައިގެންނެވި ޑރ.ޖަމީލް ވިދާޅުވީ މުސާރަ އާއި އާމްދަނީއާ އެކަށީގެން ނުވާވަރުގެ މުއްސަނދިކަން ހޯދާގޮތް ބެލޭނެ ގާނޫނީ ނިޒާމެއް ރާއްޖޭގައި ގާއިމްކުރަން ޖެހޭކަމަށެެެވެ. ރާއްޖޭގެ ބިންތައް ނުއަގުގައި ބަހާލެވިފައިވާ ގޮތް ހޯދާ އެކަމުގެ ހިސާބެއް ހައްދަވާ އެ ފައިސާ ދައުލަތަށް ހޯދުމަށް ޑރ. ޖަމީލު ގޮވާލެއްވިއެެވެ.
މި ސަރުކާރުން ހިންގާފައިވާ ކޮރަޕްޝަންގެ ޖަރީމާތައް ހިސާބު ހަދާލުމުން ބިލިއަނުން ގުނާލެވޭނެ ކަމަށާއި އެ މައްސަލަތައް އާ ސަރުކާރުން ބަލަންޖެހޭނެ ކަމަށް ވެސް އެމަނިކުފާނު ވިދާޅުވި އެވެ.
ކޯލިޝަން ދެމެހެއްޓޭނެތޯ ދެންނެވި ސުވާލަށް ޖަވާބުދެއްވަމުން ޑރ. ޖަމީލު ވިދާޅުވީ، ކޯލިޝަން މިފަހަރު ވަރަށް ރަނގަޅަށް ކުރިއަށްދާނެކަމަށް ގަބޫލުފުޅު ކުރައްވާކަމަށެވެ. ސަބަބަކީ ހުރިހާ ބޭފުޅުންވެސް ކުރީ އެއް ތަޖުރިބާއެއް ކަމަށާއި، ކޯލިޝަން އެއްބަސްވީ ހަމައެކަނި ވެރިކަން ކުރަން ނޫންކަމަށެވެ. އެންމެން އެއްބަސްވެ އެކައްޗެއްކީ އެންމެނަށް ލިބުނު އަނިޔާގެ ސަބަބުންކަމަށް އެ މަނިކުފާނު ވިދާޅުވިއެވެ. އޭނާ ވިދާޅުވި ގޮތުގައި ދިވެހި ތާރީހުގައިވެސް މިހާ ބޮޑެތި ޖަރީމާ ހިންގައި މީހުންނަށް އަނިޔާވެރިވެފައެއް ނުވެއެވެ. އެ ތަޖުރިބާގެ އަލީގައި އެކުގައި ދަތުރުކުރެވޭނެކަމީ ޝައްކެއްވެސް ނެތްކަމެއްކަމަށް ޑރ. ޖަމީލު ވިދާޅުވިއެވެ. އަދި އާ ސަރުކާރަކީ ކާމިޔާބު ސަރުކަރަކަށް ހެދުމަށް މަސައްކަތްކޮށްދެއްވާނެކަމަށް ވެސް އެ މަނިކުފާނު ވިދާޅުވި އެވެ.
