ޔުވަންޓަސްގެ އެއްބަސްވުން އެ ކްލަބަށް ކުޅެމުން އަންނަ ކްރޮއޭޝިއާގެ ފޯވާޑް މާރިއޯ މަންޒުކިޗް އާކުރަން އުޅޭކަމަށް ރިޕޯޓްތައް ބުނެފިއެވެ.

ރިޕޯޓްތައް ބުނާގޮތުން މަންޒުކިޗަށް ޔުވަންޓަސްއިން ވަނީ އާ އެއްބަސްވުމެއް ހުށަހަޅާފައެވެ. އެ އެއްބަސްވުމުގައިވާ ގޮތުން 2021 ވަނަ އަހަރުގެ ނިޔަލަށް ޔުވަންޓަސްގައި މަންޒުކިޗް މަޑުކުރަން ޖެހޭނެއެވެ.

އުމުރުން 32 އަހަރުގެ މަންޒުކިޗް ހޯދުމަށް ގިނަ ކްލަބްތަކުން ދަނީ މަސައްކަތް ކުރަމުންނެވެ. ރިޕޯޓްތައް ބުނާގޮތުން އެ ކްލަބްތަކުގެ ތެރޭގައި މެންޗެސްޓާ ޔުނައިޓެޑުވެސް ހިމެނެއެވެ.

އެހެންނަމަވެސް ރިޕޯޓްތައް ބުނާގޮތުން މަންޒުކިޗް ބޭނުންވަނީ އާ އެއްބަސްވުމުގައި ސޮއިކޮށް، ކްލަބުގައި ގިނަ ދުވަސްތަކެއް ވަންދެން މަޑުކުރާށެވެ. އެގޮތުން ވަރަށް އަވަހަށް އޭނާ އެއްބަސްވުމުގައި ސޮއިކުރާނެ ކަމަށްވެސް ރިޕޯޓްތައް ބުނެއެވެ.

ޑައިނަމޯ ޒަގްރެބް އިން 2007 ވަނަ އަހަރު ކެރިއަރު ފެށި މަންޒުކިޗް ވަނީ ވުލްފްސްބާގް އާއި ބަޔާން މިއުނިކް އަދި އެތުލެޓިކޯ މެޑްރިޑަށްވެސް ކުޅެފައެވެ. އޭނާ ޔުވަންޓަސް އަށް ބަދަލުވީ 2015 ވަނަ އަހަރެވެ. އެގޮތުން އޭނާ ވަނީ މިހާތަނަށް އެޓީމަށް ކުޅުނު 138 މެޗުގައި 38 ލަނޑު ކާމިޔާބުކޮށްފައެވެ.

ނިމިގެންދިޔަ ފީފާ ވޯލްޑް ކަޕްގައި މޮޅު ކުޅުމެއް ކްރޮއޭޝިއާ ޓީމަށް ދެއްކި މަންޒުކިޗް ގައުމީ ޓީމަށް ކުޅުން ހުއްޓާލާފައިވާއިރު، އޭނާ ވަނީ އެޓީމަށް ކުޅުނު 88 މެޗުގައި 33 ލަނޑު ކާމިޔާބުކޮށްފައެވެ.