ދިވެހި ޖުމްހޫރިއްޔާގެ ގާނޫނު އަސާސީ އޮތް ގޮތުން ފުލުހުންނާއި ސިފައިންގެ އެންމެ މަތީ އިސްވެރިއަކީ ރައީސުލްޖުމްހޫރިއްޔާ ކަމަށްވާއިރު، އެމަނިކުފާނު ވާދަކުރެއްވި ރިޔާސީ އިންތިހާބާ ގުޅުން ހުރި މައްސަލައެއް، ސަލާމަތީ ހިދްމަތްތަކުން ބެލުމަކީ ގަބޫލުކުރެވޭނެ ކަމެއް ނޫން ކަމަށް އިންތިހާބީ ރައީސް އިބްރާހީމް މުހައްމަދު ސޯލިހުގެ ތަރުޖަމާނު މާރިއާ އަހުމަދުދީދީ ވިދާޅުވެއްޖެއެވެ.
ޖުޑީޝަލް ސަރވިސް ކޮމިޝަން، ޖޭއެސްސީގައި އިންނަވާ މެމްބަރަކު ރިޔާސީ އިންތިޚާބާގުޅޭ މައްސަލައެއްގައި ސުޕްރީމް ކޯޓަށް ވަޑައިގަތުމަކީ ކަންބޮޑުވާކަމެއް ކަމަށް އިންތިޚާބީ ރައީސްގެ ތަރުޖަމާނު އަލްއުސްތާޛާ މާރިޔާ އަހުމަދު ދީދީ ވިދާޅުވެއްޖެއެވެ.
އިންތިހާބީ ރައީސް އޮފީހުގައި ހޮނިހިރު ދުވަހު ބޭއްވި ނޫސްވެރިންގެ ބަންދަލުވުމުގައި މާރިއާ ވިދާޅުވީ އިންތިހާބުގެ ނަތީޖާ ބާތިލް ކުރުމަށް އެދި ރައީސް އަބްދުﷲ ޔާމީން އިންތިހާބުގެ ނަތީޖާ ގަބޫލުކުރައްވާ ކަމަށް ވިދާޅުވުމަށް ފަހު، އަލުން އިންތިހާބު ބާތިލްކުރަން ސުޕްރީމްކޯޓަށް ހުށަހަޅުއްވައިގެން ކުރިއަށް ގެންދެވުމަކީ ކަންބޮޑުވާ ކަމެއްކަމަށެވެ.
މާރިއާ ވިދާޅުވީ ފަނޑިޔާރު އައްޔަން ކުރުމާއި ވަކިކުރުން، އަދި ފަނޑިޔާރުންގެ ސްލޫކީ މައްސަލަތައް ބަލާ، ޖުޑީޝަލް ސާރވިސް ކޮމިޝަން (ޖޭއެސްސީ)ގަ ރައީސުލްޖުމްހޫރިއްޔާގެ ފަރާތްޕުޅުން އައްޔަން ކުރައްވާފައިވާ މެމްބަރު، ރައީސުލްޖުމްހޫރިއްޔާގެ ފަރާތްޕުޅުން ސުޕްރީމް ކޯޓަށް އަދި ހާއްސަކޮށް ރިޔާސީ އިންތިހާބާ ގުޅޭ މައްސަލައެއްގައި ވަޑައިގަތުން އެއީ ހަގީގަތުގައި ވެސް ކަންބޮޑުވެވަޑައިގަންނަވާ ކަމެއް ކަމަށެވެ.
މާރިޔާ ވިދާޅުވީ، ނަތީޖާ ފެންނަންއޮތް ކަމެއްގައި، ސުޕްރީމްކޯޓުން އެ މައްސަލަ ބަލައިގަތްނަމަވެސް ރައްޔިތުންގެ ނިންމުމާއި ދެކޮޅަށް އިންތިހާބު ބާތިލްކޮށްފާނެ ކަމަށް ދެކެވަޑައިނުގަންނަވާ ކަމަށެވެ.
"މި ރާއްޖެ، ގައުމެއްހެން ހިނގަންޖެހޭ. މިރާއްޖޭގެ ރައްޔިތުންނަށް އެބަ އިހުތިރާމްކުރަންޖެހޭ ހުރިހާ އެންމެންވެސް. ރައްޔިތުންގެ މަޖިލިސްވިޔަސް، ރައީސުލްޖުމްހޫރިއްޔާ ވިޔަސް، ސުޕްރީމްކޯޓުވިޔަސް، ރައްޔިތުންނަށްވުރެ މައްޗަކަށް ނޭރޭނެ. މިނިވަން މުއައްސަސާތައްވެސް މިދަންނަވާހެން އިލެކްޝަންސް ކޮމިޝަން، އޭސީސީ އަދި މިނޫން މުއައްސަތާތައްވިއަސް،" މާރިޔާ ވިދާޅުވިއެވެ.
މާރިއާ ވަނީ ރައީސް ޔާމީންގެ ސަރުކާރުން މީގެ ކުރިން ކަންކަން ކޮށްފައިވާ ގޮތަށް ވެސް ވަރަށް ބޮޑަށް ފާޑުވިދާޅުވެފަ އެވެ. އެގޮތުން ރައީސް ޔާމީންގެ ސަރުކާރުން ދެ ފަހަރެއްގެ މަތިން ކުއްލި ނުރައްކަލުގެ ހާލަތު އިއުލާންކޮށް، ރައްޔިތުންގެ މަޖިލީހުގެ 12 މެމްބަރުންގެ މައްސަލާގައި ސަރުކާރުން އަމަލުކޮށްފައިވާ ގޮތާއި އެކެއް ފެބްރުއަރީގައި ރައީސް ޔާމީން، ސަލާމަތީ ބާރުތަކަށް ބާރާއި ނުފޫޒު ފޯރުވާފައިވާ ކަމަށެވެ.
އެހެންކަމުން ރިޔާސީ އިންތިހާބާބެހޭ، ސީދާ އެމަނިކުފާނުގެ މަސްލަހަތާއި ގުޅުންހުރި މައްސަލައެއް ސަލާމަތީ ހިދްމަތަކުން ބެލުމަކީ ވަރަށް ބޮޑަށް ކަންބޮޑުވެވަޑައިގަންނަވާ ކަމެއް ކަމަށްވެސް މާރިއާ ވިދާޅުވި އެވެ.
