އިންޓަޕޯލްގެ ވެރިޔާގެ މައްސަލަތަކެއް ދަނީ ބަލަމުން: ޗައިނާ

ބައިނަލްއަޤްވާމީ ފުލުހުންގެ އިދާރާ، އިންޓަޕޯލްގެ ރައީސް މެންގް ހޮންގްވެއި ގެއްލިގެން ހޯދަމުން ދަނިކޮށް އޭނާގެ މައްސަލަތަކެއް ބަލަމުންދާ ކަމަށް ޗައިނާ އިން ބުނެފިއެވެ.

އާދިއްތަ ދުވަހު ޗައިނާ އިން ބުނެފައިވަނީ ހޮންގްވެއި ޗައިނާގެ ޤާނޫނުތަކާއި ހިލާފުވެފައިވުމުގެ ސަބަބުން އޭނާ ހައްޔަރުކޮށް މައްސަލަ ތަހުޤީޤު ކުރުމުންދާ ކަމަށެވެ.

ހޮންގްވެއި ގެއްލުމުގެ ކުރިން އެންމެ ފަހުން ފެނިފައިވަނީ މީގެ ހަފްތާއެއް ކުރިން ފްރާންސްގެ ލިއޯންގައި ހުންނަ އިންޓަޕޯލްގެ މައި އިދާރާ އިން، އަމިއްލަފުޅު ޤައުމު ޗައިނާއަށް ވަޑައިގަތުމަށް ނިކުންނެވި ތަނުންނެވެ. އޭގެ ފަހުން އޭނާގެ ޚަބަރެއް ނުވެގެން އޭނާގެ އަނބިކަނބަލުން ވަނީ ފަރަންސޭސީ ފުލުހުންނަށް ރިޕޯޓްކޮށްފައެވެ.

ޗައިނާއިން އޭނާގެ މައްސަލަތަކެއް ބަލަމުންދާކަން ހާމަކުރުމުގެ ކުރިން ހޮންކޮންގުގެ ނޫހެއް ކަމަށްވާ ސައުތު ޗައިނާ މޯނިންގ ޕޯސްޓުން މަސްދަރުތަކާއި ޙަވާލާދީ ބުނެފައިވަނީ ހޮންގްވެއި ޗައިނާއަށް ވަޑައިގަތްތަނުން ޗައިނާގެ ކަމާއި ބެހޭ ފަރާތްތަކުން އޭނާ އާއި ސުވާލު ކުރުމަށް ހިފަހައްޓާފައިވާ ކަމަށެވެ.

ހޮންގްވެއި އަކީ ޗައިނާގެ ކޮމިއުނިސްޓް ޕާޓީގެ އިސް މެމްބަރެކެވެ. އަދި އިންޓަޕޯލްގެ ރައީސްކަމަށް އިންތިޚާބުވުމުގެ ކުރިން އޭނާ ހުންނެވީ ޗައިނާގެ ޕަބްލިކް ސެކިއުރިޓީގެ ޑެޕިއުޓީ މިނިސްޓަރަކަށެވެ. އަދި ފުލުހުންގެ ޚިދުމަތުގައި އޭނާ އުުޅުއްވާތާ 40 އަހަރު ވަނީ ވެފައެވެ.

އޭނާ އިންޓަޕޯލްގެ ރައީސްކަމަށް އިންތިޚާބުކޮށްފައިވަނީ 2016 ވަނަ އަހަރުގެ ނޮވެމްބަރު މަހުއެވެ. އަދި އޭނާގެ ދައުރު ހަމަވާނީ 2020 ވަނަ އަހަރުއެވެ.

ހޮންގްވެއި އިންޓަޕޯލްގެ ރައީސްކަމަށް އިންތިޚާބުވުމުން އިންސާނީ ހައްޤުތަކަށް މަސައްކަތްކުރާ ފަރާތްތަކުން ވަނީ އެކަމަށް ފާޑުކިޔާފައެވެ. އެގޮތުން ހޮންގްވެއި އިންޓަޕޯލް މެދުވެރިކޮށް، ޗައިނާ ސަރުކާރުން އިންސާނީ ހައްޤުތަކަށް އަރައިގަތުމަށް ކުރާ މަސައްކަތްތަކަށް އޭނާ އެއްބާރުލުން ދެއްވާނެ ކަމަށް ޖަމްއިއްޔާތަކުން ބުންޏެވެ.