ވެރިކަމުގެ ބާރުތައް އާ ސަރުކާރާ ހަވާލު ކުރުމުގެ މަރުހަލާ ހުއްޓާލުމަށް ސަރުކާރު ހިންގާ ޕާޓީ ޕީޕީއެމުން ގޮވާލައިފިއެވެ.

އެ ޕާޓީން އެގޮތަށް ގޮވާލާފައި ވަނީ ރިޔާސީ އިންތިހާބުގެ ނަތީޖާއާ ދެކޮޅަށް އެ ޕާޓީން ފަށާފައިވާ ސިލްސިލާ މުޒާހަރާތަކުގައި ހުކުރު ދުވަހުގެ ރޭ ބޭއްވި އެއްވުމުގައެވެ. އެއްވުމުގައި ވާހަކަ ދައްކަވަމުން ރައީސް އޮފީހުގެ ސްޕޯކްސްޕާސަން އިބްރާހިމް މުއާޒު އަލީ (މުއާ) ވިދާޅުވީ އިބްރާހިމް މުހައްމަދު ސޯލިހު (އިބޫ)އަށް ވެރިކަމުގެ ބާރުތައް ހަވާލު ކުރުމަށް މިހާރު ފަށާފައިވާ މަސައްކަތްތައް ދައުލަތުގެ ވުޒާރާތަކުންނާއި މުއައްސަސާތަކުން ހުއްޓާލުމަށް ގޮވާލާ ކަމަށެވެ.

އޭނާ އެގޮތަށް ވާހަކަ ދައްކަވާފައި ވަނީ ކޮންމެ ރެއަކު ހުށަހަޅަމުންދާ ކަމަށް ބުނާ ގަރާރުތަކުގެ ތެރެއިން، ހުކުރު ދުވަހުގެ ރޭ ހުށަހެޅުއްވި ގަރާރުގައެވެ.

"ސަރުކާރު ބަދަލުވުމުގެ މަރުހަލާ، މި ނަމުގައި މިހާރު ކުރިއަށް ގެންދާ އެންމެހާ މަސައްކަތްތައް، މިހާރުން މިހާރަށް ހުއްޓާލައި އެ މަސައްކަތަށް ދައުލަތުގެ އެއްވެސް މުއައްސާއަކުން އެއްބާރުލުން ނުދިނުމަށް އަޅުގަނޑުމެންގެ މި އިންސާފަށް ގޮވާލާ ގަރާރެއް ހުށަހެޅިން. ވަރަށް ބޮޑަށް ޝުކުރިއްޔާ ހުރިހާ ބޭފުޅުންގެ އިއްތިފާގުން މި ގަރާރު ފާސްވެއްޖެ،" ޕީޕީއެމްގެ ކައުންސިލްގެ މެމްބަރުކަން ވެސް ކުރައްވާ މުއާޒު ވިދާޅުވިއެވެ.

އެއްވެ އުޅުމުގެ ގާނޫނާ ހިލާފަށް ކޮންމެ ރެއަކު ޕީޕީއެމް އޮފީސް ކުރިމަތީގައި ކުރިއަށް ގެންދާ މުޒާހަރާތައް އަޑުގަދަ ކުރާ ބޭނުން ކޮށްގެން ރޭގަނޑު 11:00ގެ ފަހުން ވެސް ކުރިއަށް ގެންދެއެވެ. ނަމަވެސް ވޭތުވެދިޔަ މުއްދަތުގައި ގުޅިފައިވާ ޕާޓީތަކުން ކުރި ސިލްސިލާ މުޒާހަރާތައް ރޭގަނޑު 11:00 ޖެހުމާއެކު އިންޒާރަކާ ނުލައި ފުލުހުން ގެންދިޔައީ ރޫޅާލަމުންނެވެ. އަދި އަޑުގަދަ ކުރާގެ އަޑު ކަނޑާލަނީ ވެސް އިސްވެ، ފުލުހުންނެވެ.

ނަމަވެސް ޕީޕީއެމުން ކުރިއަށް ގެންދާ ސިލްސިލާ މުޒާހަރާއަށް ފުލުހުން ހުރަހެއް ނާޅާއެވެ. އަދި 11:00ގެ ފަހުން އަޑުގަދަ ކުރާގެ އަޑު ކަނޑާލަން ފުލުހުން ނާންގައެވެ. 

މާލޭގައި މުޒާހަރާ ކުރުން މަނާ ކުރުމަށް ގާނޫނަށް އިސްލާހު ހުށަހެޅީ ވެސް ޕީޕީއެމުންނެވެ. އަދި ހިޔާލުފާޅު ކުރުމާއި އެއްވެ އުޅުން ހަނިކުރެވޭ ގޮތަށް ގާނޫނު ބަދަލުކޮށް، މާލޭގައި އެއްވެ އަޑުއުފުލޭނީ ކާނިވާ ސަރަހައްދުގައި އެކަނި ކަމަށް ވެސް ކަނޑައެޅީ ޕީޕީއެމްގެ ސަރުކާރުންނެވެ.