ކޯލިޝަންގެ ސަރުކާރާއެކު ތައުލީމީ ދާއިރާއަށް ހެޔޮ ބަދަލުތަކެއް!

މުދައްރިސުންނަކީ ޤައުމު ބިނާކޮށް ހެޔޮލަފާ މުޖުތަމައުއެއް އުފެއްދުމުގައި އެންމެ މުހިންމު އެއް ފަރާތެވެ. މިޤައުމުގެ ހުންގާނުގައި ހިފައި ރަނގަޅު މިސްރާބަށް އަބުރާދޭ ފަރާތަކީ މުދަރިއްސުންނެވެ. އެއީ އަމިއްލަ މަސްލަހަތާއި، ދުނިޔަވީ އުފަލައްވުރެ، ޤައުމާއި، މުޖުތަމައާއި، ދަރިވަރުންގެ ހައްޤުގައި އަމިއްލަ އުފާތައްވެސް ޤުރުބާން ކުރައްވަވާ ބައެކެވެ.

އަޅުގަނޑުމެންނަށްޓަކައި ގުރުބާންވަމުން އަންނަ މުދައްރިސުން އަގުވަޒަން ކުރުމަކީ ކޮންމެހެން ވެސް ކުރަންޖެހޭ ކަމެކެވެ. އެގޮތުން ކޮންމެ އަހަރެއްގެ އޮކްޓޫބަރު މަގު 5 ވަނަ ދުވަހަކީ ބައިނަލްއަގްވާމީ ގޮތުން ފާހަގަކުރާ މުދައްރިސުންގެ ދުވަހެވެ. ދުނިޔޭގެ އެކިކަންކޮޅުތަކުގައި މިދުވަސް ފާހަގަކުރަމުން އަންނައިރު ރާއްޖޭގައި ވެސް މިދުވަސް އަންނަނީ ކުލަ ގަދަކޮށް ފާހަގަކުރަމުންނެވެ.

ޓީޗަރުންނަށް ޚާއްސަކޮށް އެއް ދުވަސް ކަނޑައަޅާ މިދުވަހު އެޓީޗަރުންނަށް ހަދިޔާ ދިނުމާއި، ކޭކުތައް ފެޅުމާއެކު އުފާފާޅުކުރުންތައް ކުރިއަށް ގެންދެއެވެ.

ނަމަވެސް މިއަހަރު މުދައްރިސުންގެ ދުވަހާއި ގުޅިގެން އަދި މިއޮތީ މާއުފާވެރި ވާހަކަތަކެކެވެ. އެއީ އިންތިޚާބީ ރައީސް އިބްރާހިމް މުހައްމަދު ސޯލިހުއާއެކު އައުދައުރަކަށް ދާއިރު ތައުލީމީ ދާއިރާއަށް އައު ކުރިއެރުންތަކާއެކު ބޮޑު ބަދަލެއް އަންނާނެކަމުގެ ޔަގީންކަން އެމްޑީޕީން ދީފައިވުމެވެ.

ތައުލީމީ ދާއިރާއަށް އަންނާނެ ހެޔޮބަދަލުތަށް ހަނދާން އައުކޮށްދެމުން އެމްޑީޕީން ބުނީ ކޯލިޝަންގެ މެނިފެސްޓޯގައިވާ ގޮތަށް، ސްކޫލުތައް އެއްދަންފަޅިއަށް ބަދަލުކުރެވި، ސްކޫލުތަކުގެ ޖާގަ ތަނަވަސްވެގެން ދިޔުމުން ތޮއްޖެހިފައިވާ ކުލާސްތަކަށް ލުޔެއް ލިބިގެން ދާނެ ކަމަށެވެ. އަދި ހަމަ އެއާއެކު، ރަނގަޅު ނަތީޖާ ހޯދާ ދަރިވަރުން ތައުލީމީ ދާއިރާއަށް ޝައުގުވެރި ކުރވުމަށްޓަކައި ސިޔާސަތުތައް އެކުލަވާލައި ތަންފީޒު ކުރެވި، މަތީ ތައުލީމުގެ ކަންކަން ހަރުދަނާވެގެން ދިޔުމުން، ތަމުރީނުވާ މުދައްރިސުންގެ ފެންވަރު އެތައް ތަނަކުން ރަނގަޅުވާނެ ކަމަށެވެ.

މީގެ އިތުރުން އެމްޑީޕީން ބުނީ މިހާރު ޕްރޮފެޝަނަލް ޑިވެލޮޕްމަންޓް ސްކޫލުތަކުގައި ހިންގޭ ވައްޓަފާޅި ބަދަލުކޮށް، މުދައްރިސުންނާއި ތައުލީމީ ދާއިރާއަށް ބޭނުންވާ ދާއިރާތައް ދެނެގަނެވި، އެދާއިރާތައް ހިމަނައިގެން، ލާމަރުކަޒީ އުސޫލުން ހިންގޭ ޕްރޮގްރާމް ތަކަކަށް މި ޕްރޮގްރާމްތަކަށްވާނެ ކަމަށެވެ.

މުދައްރިސުންގެ ދުވަސް އަންނަނީ ރާއްޖޭގެ އެކިކަންކޮޅުތަކުގައި ކުލަގަދަކޮށް ފާހަގަކުރަމުން

އެމްޑީޕީން ބުނީ ކުރިޔަށް އޮތް ފަސް އަހަރަކީ ތަޢުލީމީ ދާއިރާއަށް އެދެވޭ ހެޔޮ ބަދަލުތަކެއް އައިސް، 21 ވަނަ ޤަރުނުގެ ގޮންޖެހުންތަކާއި ކުރިމަތިލާން ދަންނަ، އަމިއްލަ މަސައްކަތުން ފުދިގެން ދިރިއުޅޭ، އިސްލާމީ އަޤީދާގެ މަތީގައި ބިނާކުރެވޭ މުޖުތަމައަކަށް މި ދިވެހި މުޖުތަމައު ބަދަލުވާނެ ކަމަށެވެ.

ކޯލިޝަންގެ ސަރުކާރުގައި އުންމީދީ ބަދަލުތަކެއް ތައުލީމީ ދާއިރާއަށް އަންނާނެ ކަމުގެ ޔަގީންދީފައިވާއިރު މިފާއިތުވެގެންދިޔަ 5 އަހަރު ރާއްޖޭގެ ތައުލީމީ ނިޒާމު ވަރަށް ބޮޑަށް ހަލާކުވެފައިވާ ކަމަށް ކުރީގެ އެޑިއުކޭޝަން މިނިސްޓަރު ޑރ މުސްތަފާ ލުތުފީ ވަނީ ވިދާޅުވެފައެވެ. ދަރިވަރުންގެ މެދުގައި ތަފާތު ކުރުންތައް ގެންގުޅި، އިތުރު އެހީއަށް ބޭނުންވާ ދަރިވަރުން އެކަހެރި ކުރާ ކަމަށް ޑރ މުސްތަފާ ވިދާޅުވިއެވެ.

މިފާއިތުވި 5 އަހަރު ތައުލީމީ ދާއިރާ ސިޔާސީކޮށް، ކިޔަވާދިނުމަށް ގާބިލްއެތައް ޓީޗަރުންނެއް ވަނީ ވަޒީފާއިން ނުހައްގުން ކަނޑާލާފައެވެ. ނަމަވެސް މިއައު ސަރުކާރާއެކު މިހުރިހާ ކަމެއް ހައްލުވެގެންދާނެ ކަމުގެ ޔަގީންކަން ކޯލިޝަނުންވަނީ ދީފައެވެ.

މިއަހަރުގެ ޓީޗަރުންގެ ދުވަހާއި ގުޅިގެން ޔުނެސްކޯއިން ވެސް ބުނެފައިވަނީ މުދައްރިސުންގެ ފެންވަރު މަތި ކުރުމަށާއި ރަނގަޅު ފެންވަރުގެ ތަޢުލީމެއް ފޯރުކޮށްދިނުމަށް މުދައްރިސުންނަށް ކުރިމަތިވާ ވަރަށް ގިނަ ހުރަސްތަކެއް އެބަހުރިކަމަށެވެ.

މިގޮތުން ބަލާއިރު، ތޮއްޖެހިފައިވާ ކުލާސްތަކާއި މުދައްރިސުން ތަމުރީނު ކުރުމުގައި ހުރި އުނި ކަންކަމާއި ޕްރޮފެޝަނަލް ޑިވެލޮޕްމަންޓް އެކަށީގެންވާ ގޮތެއްގައި ނުހިންގުން މިއީ މީގެތެރޭގައި ފާހަގަ ކޮށްލެވޭ ބައެއް ކަންކަމެވެ.

މިއަހަރުގެ މުދައްރިސުންގެ ދުވަހުގެ ޝިއާރުގެ ގޮތުގައި ޔުނެސްކޯއިން ކަނޑައަޅާފައިވަނީ "އުނގެނުމުގެ ހައްޤު ކަށަވަރުކުރުމަށް- ފެންވަރު ރަނގަޅު މުދައްރިސުން" މިއެވެ. މި ޝިއާރަކީ މިވަގުތު މި ރާއްޖެއަށް ވަރަށް މުހިއްމު ޝިއާރަކަށްވާއިރު މުދައްރިސުންގެ ދުވަހާއި ގުޅިގެން އެޑިޔުކޭޝަން މިނިސްޓަރު އައިޝަތު ޝިހާމު ވިދާޅުވެފައިވަނީ ފެންވަރު ރަނގަޅު ތައުލީމަކަށް ފެންވަރު ރަނގަޅު މުދައްރިސުން ބޭނުންވާ ކަމަށެވެ.