މާލީ ޒިންމާއެއް އަދާކުރަންޖެހޭ އެއްވެސް ކަމެއް މި މަރުހަލާގައި ނުކުރުމަށް ފިނޭންސް މިނިސްޓަރަށް ދަންނަވައިފި
5 އޮކްޓޯބަރު 2018 | ހުކުރު 11:31އެއްވެސް ލޯނެއް ނުނެގުމަށް ވަނީ އަންގާފައި
ފިނޭންސް މިނިސްޓަރ ބަޖެޓް ހުށަހަޅުއްވަނީ
ވެރިކަން ބަދަލުކުރުމުގެ މި މަރުހަލާގައި ސަރުކާރުން މާލީ ޒިންމާ ވާންޖެހޭ އެއްވެސް މުއާމަލާތެއް ނުހިންގުމަށް އިންތިޚާބީ ރައީސް އިބްރާހީމް މުހައްމަދު ސޯލިހްގެ ފަރާތުން މިހާރުގެ ފިނޭންސް މިނިސްޓަރ އަހުމަދު މުނައްވަރަށް ދަންނަވައިފިއެވެ.
އިންތިޚާބީ ރައީސްގެ ފަރާތްޕުޅުން ފިނޭންސް މިނިސްޓަރަށް ފޮނުއްވާފައިވާ ސިޓީގައި ބުނެފައި ވަނީ ހުސްވި ސެޕްޓެމްބަރު މަހު ބޭއްވުނު ރިޔާސީ އިންތިޚާބުގައި، ކުރިއަށް އޮތް ފަސް އަހަރު ދުވަހަށް، ދިވެހިރާއްޖޭގެ ރައީސުލްޖުމްހޫރިއްޔާ ކަމުގެ މަޤާމަށް އިބްރާހީމް މުހައްމަދު ސޯލިހް އިންތިޚާބުވުމާ ގުޅިގެން، ވެރިކަން ބަދަލުވުމުގެ މަރުޙަލާގެ މަސައްކަތްތައް ވަނީ ފެށިފައި ކަމަށެވެ.
އެހެންކަމުން މި މަރުޙަލާގައި އައު މަޝްރޫޢުތަކަށް ޓެންޑަރަށް ހުޅުވައިނުލުމަށާއި، އައު މަޝްރޫޢުތައް ނުފެށުމަށާއި، ދައުލަތުގެ ނަމުގައި ލޯނު ނުނެގުމަށާއި، އަދި ދައުލަތުން މާލީ ޒިންމާއެއް އުފުލަން ޖެހިދާނެ ފަދަ އެއްވެސް މުއާމަލާތެއް މި މަރުހަލާގައި ނުނިންމެވުމަށް އިންތިޚާބީ ރައީސް އިބްރާހީމް މުހައްމަދު ސޯލިހް އެދިވަޑައިގަންނަވާ ކަމަށެވެ.
އިބްރާހީމް މުހައްމަދު ސޯލިހް މިގޮތަށް އެދިވަޑައިގެންފައި މިވަނީ ވެރިކަން ބަދަލު ވުމުގެ މަރުހަލާގައި ވެސް ބައެއް ފަރާތްތަކަށް ލޯނު ދޫކުރުމާއި ބައެއް މަޝްރޫޢުތައް ހިންގަމުންދާކަމުގެ ތުހުމަތުތައް ކުރެވިފައި ވަނިކޮށެވެ.
މިމަހުގެ ދެވަނަ ދުވަހު ފޮނުއްވި މިސިޓީ ޢާއްމު ކުރައްވައި އިންތިޚާބީ ރައީސްގެ ތަރުޖަމާން މާރިޔާ އަހުމަދު ދީދީ ކުރެއްވި ޓްވީޓެއްގައި ވިދާޅުވެފައި ވަނީ އެސިޓީއާ ގުޅޭ ގޮތުން ފިނޭންސް މިނިސްޓަރ އެޅުއްވި ފިޔަވަޅެއް އިންތިޚާބީ ރައީސް އިބްރާހީމް މުހައްމަދު ސޯލިހްގެ އޮފީހަށް އަދި އަންގަވާފައި ނުވާ ކަމަށެވެ.
މާރިޔާ ވިދާޅުވީ މިދިޔަ މަހުގެ 23 ގައި ނެގި ވޯޓުގައި ރައްޔިތުން ނިންމި ނިންމުމަށް އިޙްތިރާމް ކުރައްވައި މިކަމަށް އަވަސް ފިޔަވަޅެއް ފިނޭންސް މިނިސްޓަރ އެބަ އަޅުއްވަން ޖެހޭ ކަމަށެވެ.
