12 މެމްބަރުންގެ ގޮނޑި ގެއްލުނު ކަމަށް ބުނި ނިންމުން އީސީން ބާތިލުކޮށްފި
3 އޮކްޓޯބަރު 2018 | ބުދަ 08:31މަޖިލީހަށް ވެސް އެކަން ވަނީ އަންގާފައި
ގޮނޑި ގެއްލުނު ކަމަށް ބުނާ 12 މެމްބަރުން ބޭއްވި ޕްރެސް ކޮންފަރެންސެއްގެ ތެރެއިން
ރައްޔިތުންގެ މަޖިލީހުގެ 12 މެމްބަރުންގެ ގޮނޑި ގެއްލިފައިވާ ކަމަށް އިލެކްޝަންސް ކޮމިޝަނުން ކުރިން ނިންމާފައިވާ ނިންމުން، އެ ކޮމިޝަނުން ބާތިލުކޮށްފިއެވެ.
އިލެކްޝަންސް ކޮމިޝަނުން އަންގާރަ ދުވަހު ކުރެއްވި ޓްވީޓެއްގައި ބުނެފައި ވަނީ ރައްޔިތުންގެ މަޖިލީހުގެ 12 ދާއިރާއެއްގެ ބައި އިލެކްޝަން ބޭއްވުމަށް އެ ކޮމިޝަނުން ނިންމި ނިންމުން ބާތިލު ކުރީ ސުޕްރީމް ކޯޓުން ގޮނޑީގެ މައްސަލާގައި ވަކި ގޮތެއް ކަނޑައަޅަންދެން ކަމަށެވެ. އީސީން ކުރިން ނިންމި ނިންމެވުން ބާތިލުކޮށް އެކަން މަޖިލީހަށާއި ކަމާ ބެހޭ ފަރާތްތަކަށް އެންގުމަށް ނިންމާފައިވާ ކަމަށެވެ.
ރައްޔިތުންގެ މަޖިލީހުގެ ޖަލްސާގައި 12 މެމްބަރުން ބައިވެރި ކުރުން ހުއްޓުވާފައި ވަނީ މިދިޔަ އަހަރުގެ ޖުލައި މަހުގެ 13 ދުވަހުން ފެށިގެންނެވެ. އެ ދުވަހުން ފެށިގެން މިހާތަނަށް އެ މެމްބަރުންގެ މުސާރައާއި އިނާޔަތްތަކާއި އިމްތިޔާޒުތައް ހިފަހައްޓާފައިވާތާ މިހާތަނަށް އެއް އަހަރާއި ދެ މަހާއި 20 ދުވަސް ވަނީ ވެފައެވެ.
ރައްޔިތުންގެ މަޖިލީހުގެ 12 މެމްބަރުންގެ ގޮނޑިއާމެދު ސުވާލު އުފައްދައި އަސްކަރިއްޔާ މެދުވެރިކޮށް އެ މެމްބަރުން މަޖިލީހަށް ވެއްދުން މަނާކުރީ ސަރުކާރު ހިންގާ ޕީޕީއެމަށް މަޖިލީހުގެ މެޖޯރިޓީ ގެއްލުމުންނެވެ. އެއަށްފަހު މަޖިލިސް ބާއްވާފައި ވަނީ ހަމައެކަނި ސަރުކާރުން ބޭނުންވާ ބިލުތައް ފާސްކުރުމަށާއި މިނިވަން މުއައްސާސާތަކަށް ރައީސް ޔާމީން އައްޔަން ކުރަން ބޭނުންވާ ބޭފުޅުން އެ މުއައްސަސާތަކަށް އައްޔަން ކުރުމަށެވެ.
