ދިރާގުގެ އަހަރީ ދުވަހާ ގުޅުވައިގެން ވަރަށް ހާއްސަ ޕްރޮމޯޝަންތަކާއި ހަދިޔާތަކެއް!

ދިރާގުގެ 30 ވަނަ އަހަރީ ދުވަހާއި ގުޅުވައިގެން ކަސްޓަމަރުންނަށް ހާއްސަކޮށްގެން ދިރާގުން ވަރަށް ހާއްސަ ޕްރޮމޯޝަންތަކާއި ހަދިޔާތައް ދިނުމަށް ނިންމައިފިއެވެ.

ދިރާގުން ބުނީ ހަދިޔާތަކުގެ ތެރޭގައި ނަސީބުވެރި 30 ފަރާތަކަށް ބޭނުން 30 މަންޒިލަކަށް ހުރިހާ ޚަރަދެއް ހިމެނޭ ދަތުރެއް ލިބުމުގެ ފުރުސަތު ހުޅުވާލާފައިވާ ކަމަށާއި ގުރުއަތުލުމަކުން ހޮވޭ އިނާމު ހޯދުމަށް ދިރާގު ހުރިހާ ކަސްޓަމަރުންނަށް ވެސް ބައިވެރިވެވޭނެ ކަމަށެވެ.

މީގެ އިތުރުން ދިރާގުގެ ހުރިހާ ފިކްސްޑް ބްރޯޑްބޭންޑް ކަސްޓަމަރުންނަށް އޮކްޓޯބަރ މަހު 30 އިންސައްތަ އިތުރު ޑޭޓާ ހަދިޔާ ކުރަން ނިންމާފައިވާ ކަމަށް ވެސް ދިރާގުން ބުންޏެވެ. އަދި ދިރާގުގެ ހުރިހާ މޯބައިލް ކަސްޓަމަރުންނަށް 1 ޖީބީ ޑޭޓާ މުޅިން ހިލޭ ދިމުނަށް ވެސް ވަނީ ނިންމާފައެވެ.

މި ޑޭޓާ ޕެކް ދިރާގު މޯބައިލް ޕޯސްޓްޕެއިޑް އަދި ޕްރީޕެއިޑް ހުރިހާ ކަސްޓަމަރުންނަށް ވަރަށް ފަސޭހަކަމާ އެކު ދިރާގު މޯބައިލް އެޕް މެދުވެރިކޮށް ނުވަތަ އެސްއެމްއެސް މެދުވެރިކޮށް ވެސް އެކްޓިވޭޓް ކުރެވޭނެއެވެ. އެސްއެމްއެސް މެދުވެރިކޮށް ޑޭޓާ ޕެކް އެކްޓިވޭޓް ކުރުމަށް އެސްއެމްއެސް ފޮނުއްވާނީ “ADD D1GB” ޖައްސަވާފައި 343 އަށެވެ. ޑޭޓާ ޕެކް އެކްޓިވޭޓް ކުރެވޭނީ އޮކްޓޯބަރ 1 ވަނަ ދުވަހުން ފެށިގެން ގޮސް އޮކްޓޯބަރ 3 ވަނަ ދުވަހާއި ހަމައަށެވެ. އަދި މި ޑޭޓާޕެކް އެކްޓިވޭޓް ކުރާ ދުވަހުން ފެށިގެން ތިން ދުވަހުގެ މުއްދަތަކަށް ބޭނުން ކުރެވޭނެއެވެ.

އަހަރީ ދުވަހާ ދިމާކޮށް ސޯޝަލް މީޑިއާގައި ވެސް ދިރާގުން ވަނީ ޕްރޮމޯޝަނެއް ފަށާފައެވެ. އެގޮތުން، ދިރާގު ފޭސްބުކް، ޓްވިޓާ އަދި އިންސްޓާގްރާމްގައި ދިރާގުގެ އަހަރީ ދުވަހުގެ ޕްރޮމޯ ޕޯސްޓަށް، ފޭސްބުކްގައި ނަމަ "ހާރޓް ރިއެކްޓް" ، ޓުވިޓަރ ގައި "ފެވަރިޓް" އަދި އިންސްޓަގްރާމްގައި ނަމަ "ލައިކް" އެއް ދިނުމުން ނަސީބުވެރި 30 ފަރާތަކަށް ގޫގްލް މިނީ ހޯމްއެއް ލިބުމުގެ ފުރުސަތު ވަނީ ހުޅުވާލާފައެވެ.

ދިރާގުން ބުނީ އަހަރީ ދުވަހުގެ ހަދިޔާތަކާއި ޕްރޮމޯޝަންތަކަކީ، ކަސްޓަމަރުންނަށް ޝުކުރު އަދާކުރުމުގެ ގޮތުންނާއި ދިރާގާއެކު ކަސްޓަމަރުން ތިބުމުން އެކަމުގެ އަގުވަޒަން ކުރުމުގެ ގޮތުން ދޭ ހަދިޔާތަކެވެ.

ތިރީސް އަހަރުގެ ދިގު ތަޖުރިބާއަކާ އެކު ދިރާގު ވަނީ ރާއްޖޭގެ މުވާސަލާތީ އަދި ޑިޖިޓަލް ހިދުމަތުގެ ސިނާއަތުގެ އެންމެ ކުރީ ސަފުގައިއެވެ. އަދި ދިރާގުގެ 30 އަހަރުގެ ހަޔާތުގައި ވަނީ ރާއްޖޭގެ މުވާސަލަތީ ސިނާއަތަށް ބޮޑެތި އިންގިލާބީ ބަދަލުތަކެއް ގެނެސްދީފައެވެ. ރާއްޖެ ފަދަ އާބާދީ ކުޑަ ޖަޒީރާ ގައުމަކަށް މުވާސަލާތީ އިންފްރާސްޓްރަކްޗާ ގާއިމުކުރުމަށް ކުރިމަތިވެފައި އޮތް ގޮންޖެހުންތަކާއެކު ވެސް ދިރާގުން ވަނީ އާބާދީ ބޮޑެތި ރަށްރަށުން ފެށިގެން އާބާދީ ކުޑަ ރަށްތަކަށް ވެސް މުވާސަލާތުގެ އަސާސީ އޮނިގަނޑު ގާއިމުކޮށްފައެވެ. އެގޮތުން ދިރާގުން ވަނީ ރާއްޖޭގެ އުތުރުން ދެކުނަށް 1253 ކިލޯމީޓަރ ގެ ފައިބަރ އޮޕްޓިކް ސަބްމެރިން ކޭބަލް އަކުން ގުޅައިދީފައެވެ. މިއީ މި ގޮތަށް ރާއްޖޭގައި ފުރަތަމަ އެޅި ކޭބަލްވެސް މެއެވެ. މި ކޭބަލްގެ ސަބަބުން ހައި ސްޕީޑް މުވާސަލާތުގެ އެތައް ކަމެއް މުޅި ރާއްޖެ އަށް މަގުފަހިވެ ރާއްޖޭގެ އިގްތިސާދީ ދުވެއްޔަށް ހަލުވިކަމެއް ގެނެސްދިނެވެ. ރާއްޖޭގެ އެންމެ ބޮޑު 4ޖީ އަދި ފިކްސްޑް ބްރޯޑްބޭންޑް ނެޓްވޯކް ގާއިމު ކޮށްފައިވަނީ ވެސް ދިރާގުންނެވެ.

"ޓޭކް އޮން ޓުމޯރޯ" ނުވަތަ "މުސްތަޤްބަލަށް ފުރިހަމައަށް ތައްޔާރު" މި ޝިޔާރާއި، އޮރެންޖު ކުލައިގެ އައު ބްރޭންޑިންގ އާއި އެކު ދިރާގު މިހާރު ފެނިގެން ދަނީ ޓެކްނޮލޮޖީއަށް އަންނަ ބަދަލުތަކާއެކު ދިރިއުޅުމަށް އަންނަ ކުރިއެރުންތަކަށް ތައްޔާރަށް އޮތް ޒަމާނީ ޑިޖިޓަލް ހިދުމަތް ދޭ ކުންފުންޏެއް ގޮތަށެވެ. އައު ބްރޭންޑިންގ އާއެކު ދިރާގުގެ މަޤްސަދަކަށް ވެގެން ދިޔައީ ކަސްޓަމަރުން ބާރުވެރިކޮށް މި ޑިޖިޓަލް މުސްތަޤްބަލުގެ ބޭނުން އެންމެ ފުރިހަމައަށް ފޯރުކޮށްދިނުމެވެ.