ނޫސްވެރިންނަށް ވިސާގެ މައްސަލަ ދިމާވުމުން ކަންބޮޑުވޭ: އައިއެފްޖޭ
22 ސެޕްޓެމްބަރު 2018 | ހޮނިހިރު 10:17އިންތިޚާބު ކަވަރ ކުރުމުގެ ފުރުސަތު ނޫސްވެރިންނަށް ދިނުމަށް އެދިފައިވާނެ
ލޯކަލް ކައުންސިލް އިންތިޚާބުގެ ވޯޓްލުމުގެ ތެރެއިން
ރިޔާސީ އިންތިޚާބުގެ ކަންތައްތައް ކަވަރކުރުމުގައި ހަރަކާތްތެރިވާ ބޭރުގެ ނޫސްވެރިންނަށް ވިސާގެ މައްސަލަ ޖެހުމަކީ ކަންބޮޑުވާ ކަމެއް ކަމަށް އައިއެފްޖޭ އިން ބުނެފައި ވެއެވެ.
ނޫސްވެރިންގެ ހިމާޔަތުގައި މަސައްކަތް ކުރަމުން އަންނަ ބައިނަލްއަޤްވާމީ ޖަމާއަތެއް ކަމަށްވާ "އިންޓަރނޭޝަނަލް ފެޑަރޭޝަން އޮފް ޖާނަލިސްޓް" (އައިއެފްޖޭ) އިން ނެރެފައިވާ ބަޔާނުގައި ބުނެފައި ވަނީ އިންތިޚާބު ކަވަރކުރުމުގައި ހަރަކާތްތެރިވާ ނޫސްވެރިންނަށް ވިސާގެ މައްސަލަ ޖެހުމަކީ ހިތާމަކުރާ ކަމެއް ކަމަށާއި، މިނިވަންކަމާ އެކު އިންތިޚާބުގެ ކަންތައްތައް ކަވަރކުރުމުގެ ފުރުސަތު ދިނުމަށް ސަރުކާރުގައި އެދިފައިވާނެ ކަމަށެވެ.
އައިއެފްޖޭގެ ބަޔާނުގައި އިތުރަށް ބުނެފައި ވަނީ ނޫސްވެރިންނަށް ވިސާ ލިބުމުގެ މައްސަލަ ޖެހިފައި ވަނީ އިންތިޚާބާ ދިމާކޮށް ރާއްޖެ އާއި ބޭރުގެ ނޫސްވެރިންނަށްކުރާ ފުރައްސާރަ އިތުރުވެފައިވާ ދަނޑިވަޅެއްގައި ކަމަށެވެ. އައިއެފްޖޭގެ ބަޔާނުގައި ބުނެފައި ވަނީ މިމަހުގެ 23 ވަނަދުވަހު އޮންނަ ރިޔާސީ އިންތިޚާބު ކަވަރު ކުރުމުގައި ހަރަކާތްތެރިވުމުގެ ފުރުސަތު ލިބިފައި ވަނީ މަދު ނޫސްވެރިންނަށް ކަން ފާހަގަކުރެވޭ ކަމަށެވެ.
އާދިއްތަ ދުވަހު ބާއްވާ ރިޔާސީ އިންތިޚާބު ކަވަރުކުރުމަށް މޮނީޓަރުންގެ ފާސް ދޫކޮށްފައި ވީނަމަވެސް، ރާއްޖެއަށް އައުމުގެ ބޭރު ގައުމުތަކުގެ ނޫސްވެރިންނާއި އޮބަޒރވަރުންނަށް އިމިގްރޭޝަނުން ވިސާ ނުދޭ ކަމުގެ މައްސަލަތަކެއް ވަނީ ފެންމަތިވެފައެވެ.
އިންތިޚާބު ކަވަރުކުރުމަށް ރާއްޖެ އާއި ބޭރުގެ މީޑިއާއަށް ބޮޑެތި ހުރަސްތަކެއް ކުރިމަތިކުރުވާފައި ވަނިކޮށް، ރާއްޖެއަށް އަންނަ އިންޑިއާގެ ނޫސްވެރިންނަށް ވިސާ ނުދިނުމާ ގުޅިގެން މި އިންތިޚާބު އިންޑިއާގެ މީޑިއާއަށް ކަވަރު ނުކުރެވޭނެއެވެ. ބޭރުގެ ނޫސްވެރިންނަށް ނުރައްކާތެރި ޤައުމެއްގެ ގޮތުގައި ބައެއް ނޫސްވެރިން ރާއްޖެ ސިފަކުރަމުންދާއިރު، އިންތިޚާބު ކަވަރުކުރަން އަންނަ ބޭރުގެ ނޫސްވެރިން ޓޫރިސްޓް ވިސާގައި އައިސްގެން ނުވާނެ ކަމަށާއި، ނަގަން ޖެހޭނީ ބިޒްނަސް ވިސާ ކަމަށް އިމިގްރޭޝަނުން ވަނީ އަންގާފައެވެ
ވިސާ ނުލިބުމުގެ ސަބަބުން އިންޑިއާގެ ނޫސްވެރިންނަށް ރާއްޖެ ނާދެވޭތީ ނޫސްވެރިންނާއި މީީޑިއާތަކުން ގެންދަނީ ކަންބޮޑުވުން ފާޅުކުރަމުންނެވެ.
ބޭރުގެ ނޫސްވެރިންނާއި އޮބްޒަރވަރުންނަށް ރާއްޖެއަށް އައުމަށް ހުރަސް އަޅާފައިވާއިރު، އިންތިޚާބު އޮބްޒަރވްކުރުމަށް ވިލާތުގެ އިއްތިޙާދާއި، އދ، އަދި ކޮމަންވެލްތުން މިފަހަރު ނާދެއެވެ. އިންތިޚާބު އޮބްޒަރވްކުރުމަށް ބޭރުން ގެންނަނީ ހަމައެކަނި ސަރުކާރާއި ސަރުކާރު ހިންގާ ޕާޓީ ޕީޕީއެމްއާ ގުޅުން ހުރި ބައެއް ޖަމްއިއްޔާތަކެވެ.
