ސަރފް ވިއު ރާޅުގަނޑު ހޮޓެލްގައި "ތަޒްކީ" ގެ ނަމުގައި ރޫފްޓޮޕް ރެސްޓޯރެންޓެއް ބުދަ ދުވަހުގެ ރޭ ހުޅުވައިފިއެވެ.
ސަރފް ވިއު ރާޅުގަނޑު އަދި ޓްރެވަލް ކަނެކްޝަން މޯލްޑިވްސްގެ މެނޭޖިންގް ޑައިރެކްޓަރ މުހައްމަދު މިރްސާދު ވިދާޅުވީ މި ރެސްޓޯރެންޓަކީ އާންމުންނަށް ވަރަށް ހިތް ފަސޭހަ މާހައުލެއްގައި ރައްޓެހިން އަދި އާއިލާއާ އެކު ވަގުތު ކޮޅެއް ހޭދަކޮށްލެވޭނެ ތަނަކަށް ވެގެންދާނެ ކަމަށާއި ހޮޓެލްގެ އަމާޒަކީ ކަސްޓަމަރުންނަށް ފެންވަރު ރަނގަޅު މީރު ކެއުންތަކެއް ފޯރުކޮށްދިނުން ކަމަށެވެ.
މިރްސާދު އިތުރަށް ވިދާޅުވީ ރެސްޓޯރެންޓްގެ މަތީބައި ހާއްސަ ކުރެވިފައި ވަނީ ވަކި ދެ މެނޫ އަކަށް ކަމަށެވެ. އަދި ތަނުން ފޯރުކޮށްދޭ މޮކްޓެއިލްތައް ސިއްހަތަށް ފައިދާވާ ގޮތަށް ތާޒާ މޭވާ ބޭނުންކޮށްގެން ކަމަށް ވެސް އޭނާ ވިދާޅުވިއެވެ.
ސަރފް ވިއު ރާޅުގަނޑު ހޮޓެލްގައި މަލްޓި ކުއިޒީންގެ ޑިޝްތައް ލިބެން ހުންނާނެ ކަމަށާއި ކޮފީގެ އިތުރުން ބާގަރ އަދި ސޭންޑްވިޗް ފަދަ އައިޓަމްތައް ލިބިގެންދާނެ ކަމަށް ރެސްޓޯރެންޓުން ބުންޏެވެ.
އެ ރެސްޓޯރެންޓްގައި 70 މީހުންގެ ޖާގަ ހުންނަ އިރު މި ރެސްޓޯރެންޓް ވަނީ އާންމުންނަށް ހުޅުވާލާފައެވެ.
ރެސްޓޯރެންޓް ހުޅުވުމުގެ ރަސްމިއްޔާތުގައި ފިލްމީ ގިިނަ ފަންނާނުން ބައިވެރިވެފައިވާއިރު ރަސްމިއްޔާތުގައި ބައިވެރިވި މެހެމާނުންނަށް ހާއްސަ ޑިސްކައުންޓް ކާޑެއް ދޭން ނިންމާފައިވާ ކަމަށް ވެސް ސަރފް ވިއު ހޮޓެލް އިން މައުލޫމާތުދެއެވެ.
