ހަތަރު އަތޮޅަކަށް ކުރެއްވި ދަތުރުފުޅަށްފަހު އިބޫ މާލެ ވަޑައިގެންފި
ހުރިހާ ރަށަކަށް ވަޑައިގެންނެވީ ތިން މަސް ދުވަހުން
އިބޫ މާލެ ވަޑައިގެންނެވުން: ހުރިހާ ރަށަކަށް ވަޑައިގެންނެވީ ތިން މަސް ދުވަހުން
ގުޅިފައިވާ ޕާޓީތަކުގެ ރިޔާސީ ކެންޑިޑޭޓް އިބްރާހިމް މުހައްމަދު ސޯލިހު (އިބޫ) ހަތަރު އަތޮޅަކަށް ކުރެއްވި ދަތުރުފުޅަށްފަހު އެނބުރި މާލެ ވަޑައިގެންފިއެވެ.
ރާއްޖޭގައި މީހުން ދިރިއުޅޭ ހުރިހާ ރަށަކަށް އިބޫ އާއި ފައިސަލް ކުރައްވާ ދަތުރުފުޅު ފުރިހަމަ ކުރެއްވުމަށްފަހު އިބޫ މާލެ ވަޑައިގެންފައި ވަނީ އަންގާރަ ދުވަހުގެ ހެނދުނުއެވެ. އެމަނިކުފާނު ނިންމަވާލެއްވި ދަތުރުފުޅުގައި ވަޑައިގެންފައި ވަނީ ވ. އަތޮޅަށާއި މ. އަތޮޅަށާއި ފ. އަތޮޅުގެ އިތުރުން ދ. އަތޮޅަށެވެ.
ރާއްޖޭގައި މީހުން ދިރިއުޅޭ 187 ރަށަށް ކުރެއްވި ދަތުރުފުޅު އިބޫ އާއި ފައިސަލް ފުރިހަމަ ކުރައްވާފައި ވަނީ ތިން މަހާއި ހަތަރު ދުވަހުގެ ތެރޭގައެވެ. މި އަހަރުގެ ޖޫން މަހުގެ 30 ވަނަ ދުވަހު ރިޔާސީ ޓިކެޓް ލިބިވަޑައިގަތުމަށްފަހު، ރާއްޖޭގެ ރަށްތަކަށް ކުރައްވާ ދަތުރުފުޅު އިބޫ ފައްޓަވީ ޖޫން މަހުގެ 13 ވަނަ ދުވަހު އައްޑޫ ސިޓީންނެވެ.
އަންނަ އާދީއްތަ ދުވަހު ބާއްވާ ރިޔާސީ އިންތިހާބުގެ ކެމްޕެއިނަށް އިބޫ އާއި ފައިސަލް އަނެއްކާވެސް އައްޑޫ ސިޓީ އާއި ފުވައްމުލަކު ސިޓީއަށް ވަޑައިގަންނަވާނެއެވެ. އެގޮތުން މާދަމާ ފުވައްމުލަކަށް ވަޑައިގަތުމަށްފަހު، ބުރާސްފަތި ދުވަހު އައްޑޫ ސިޓީއަށް އެ ދެބޭފުޅުން ވަޑައިގަންނަވާނެއެވެ.
