ލާމަރުކަޒީ ނިޒާމަކީ ރާއްޖެއަށް އެންމެ އެކަށޭނެ ނިޒާމެއް ކަމަށް ގަބޫލެއް ނުކުރަން: ރައީސް ޔާމީން
ކައުންސިލްތަކުން ތަރައްގީއަށް ހުރަސް އަޅާ: ރައީސް ޔާމީން
ރައީސް ޔާމީން ރިޔާސީ ބަހުސްގައި: އެ ބަހުސްގައި ބައިވެރިވެވަޑައި ގެންނެވީ އެމަނިކުފާނު އެކަނި
އިދާރީ ދާއިރާތައް ލާމަރުކަޒީ ނިޒާމުން ހިންގުމަކީ ރާއްޖެ ފަދަ ގައުމަކަށް އެންމެ އެކަށޭނަ ނިޒާމެއް ކަމަށް ގަބޫލު ނުކުރައްވާ ކަމަށް ރައީސް ޔާމީން ވިދާޅުވެއްޖެއެވެ.
މޯލްޑިވސް ނޭޝަނަލް ޔުނިވަރސިޓީން އިންތިޒާމުކޮށްގެން ބޭއްވި "ރިޔާސީ ބަހުސް"ގައި ރައީސް ޔާމީން ވިދާޅުވީ ލާމަރުކަޒީ ނިޒާމުން ތަރައްގީއަށް ވަރަށް ބޮޑެތި ހުރަސްތަކެއް އެޅިގެންދާ ކަމަށެވެ.
"އަޅުގަނޑު ގަބޫލުނުކުރާ ސަބަބަކީ އަޅުގަނޑުމެން ލާމަރުކަޒީ ނިޒާމު ހިންގަން އުޅެގެން ވަރަށް ބޮޑެތި އުނދަގޫތަކާ ކުރިމަތި ލައިފިން. ރައްޖެއަކީ ޔުނިޓަރީ ދައުލަތެއް. އޭގެ މާނައަކީ ދައުލަތުގެ އެންމެ އިސް ފަރާތުގެ އަމުރު މައުރޫފް ރާއްޖޭގެ ކޮންމެ ތަނެއްގައި ވެސް ހިނގަންވާނެ. އަޅުގަނޑު ތަރައްގީ ގެންނަން ވަކި ރަށެއް އިސްތިސްނާ ނުކޮށް ކުރަމުންދާ މަސައްކަތުގައި އަޅުގަނޑަށް އެންމެ ބޮޑަށް ހުރަސްއަޅާފައި ހުރީ އިދިކޮޅު ސިޔާސީ ޕާޓީއަށް ނިސްބަތްވާ ކައުންސިލްތަކުގެ މެޖޯރިޓީ އޮންނަ ކައުންސިލްތަކުން، މަގުފަހިކޮށް ނުދޭތީ،" ރައީސް ޔާމީން ވިދާޅުވިއެވެ.
ލާމަރުކަޒީ ނިޒާމަކީ މިހާރު އަމަލު ކުރަމުންދާ ގާނޫނުއަސާސީގެ ދަށުން ރާއްޖޭގެ އިދާރީ ދާއިރާތައް ލާމަރުކަޒީ އުސޫލުން ހިންގުމަށް ރާއްޖޭގެ ރައްޔިތުން ވަރަށް ބޮޑަށް އެދިއެދި ތިބި ނިޒާމެކެވެ. އެއީ ރައްޔިތުންނާއި ގާތުން ހިދްމަތް ދިނުމަށާއި ރައްޔިތުން ބާރުވެރި ކުރުވުމަށް އެންމެ އެކަށޭނަ ނިޒާމު ކަމަށް ވެސް ގިނަ ރައްޔިތުން ދެކެއެވެ.
ނަމަވެސް ރައީސް ޔާމީންގެ ސަރުކާރުން ވަނީ ލާމަރުކަޒީ ނިޒާމުގެ ދަށުން އުފައްދާފައިވާ ކައުންސިލްތަކުގެ ބާރުތައް ސަރުކާރުގެ މިނިސްޓްރީތަކަށް ނަގާފައެވެ. ކައުންސިލްތަކުގެ ބާރު ދުއްވާލައި، ކައުންސިލްތައް ނިކަމެތި ކޮށްފައިވަނީ ގާނޫނުތައް މިސަރުކާރުން ގެނެސްފައިވާ އިސްލާހުތަކުންނެވެ.
އިދިކޮޅު ޕާޓީތަކަށް ނިސްބަތްވާ ކައުންސިލްތަކުގެ މެޖޯރިޓީ އޮންނަ ކައުންސިލްތަކުން ރަށުގެ ތަރައްގީއަށް ހުރަސް އަޅަމުންދާ ކަމަށް ރައީސް ޔާމީން ވިދާޅުވި ނަމަވެސް އެ ކައުންސިލްތަކުން އެކަން ދޮގު ކުރެއެވެ. ގިނަ ފަހަރަށް ކައުންސިލްތަކާއި ސަރުކާރުގެ އިދާރާތަކާއި މައްސަލަތައް ދިމާވަނީ މަޝްރޫއެއް ހިންގާއިރު، ރައްޔިތުންގެ އިހުސާސްތަކާ ދެކޮޅަށް ސަރުކާރުން މަސައްކަތް ކުރަމުންދާތީ ކަމަށް ވެސް ކައުންސިލްތަކުން ބުނެއެވެ. އަދި ސަރުކާރުގެ އިދާރާތަކާއި މައްސަލަތައް ދިމާވަނީ ކޮންމެހެން އިދިކޮޅު ސިޔާސީ ޕާޓީއެއްގެ މެޖޯރިޓީ އެކައުންސިލްގައި އޮތުމުން ނޫން ކަމަށް ވެސް ކައުންސިލްތަކުން ބުނެއެވެ.
