އެންޓި ކެމްޕެއިން ކުރާކަމަށް ތުހުމަތުކޮށް ޕްރިޒަންސްގެ އިސް ތިން އޮފިސަރަކާ މެދު ފިޔަވަޅު އަޅައިފި
14 ސެޕްޓެމްބަރު 2018 | ހުކުރު 18:53ކޯލިޝަންގެ ބޮޑު ޖަލްސާގައި އެބޭފުޅުން ބައިވެރިވި ކަމަށް ތުހުމަތު ކުރި
ޑިޕާޓްމަންޓްތައް ބަދަލުކުރި މުވައްޒަފުން
އެންޓި ކެމްޕެއިން ކުރާކަމަށް ތުހުމަތުކޮށް މޯލްޑިވްސް ކަރެކްޝަނަލް ސާވިސްގެ އިސް ތިން އޮފިސަރަކާ މެދު ފިޔަވަޅު އަޅައިފިއެވެ.
އެގޮތުން މާލެ ޖަލުގެ ޑިރެކްޓަރަކަށް ހުންނެވި އެސްޕީ މޫސާ އަންވަރު މާލެ ހެޑް އޮފީހަށް ބަދަލުކޮށް، އައްސޭރި ޖަލުގެ ޑިރެކްޓަރަކަށް ހުންނެވި އެސްޕީ މުހައްމަދު ޝާހީން މާލެ ހެޑް އޮފީހަށް ވަނީ ބަދަލުކޮށްފައެވެ. މީގެ އިތުރުން ޑެޕިއުޓީ ޑިރެކްޓަރ އޮފް މާލޭ ޕްރިޒަންސް އިބްރާހިމް އަފީފު މާފުށި ޖަލަށް ވަނީ ބަދަލުކޮށްފައެވެ.
މައުލޫމާތު ލިބިފައިވާ ގޮތުގައި ޒިންމާތަކުން އެކަހެރިކޮށް ފިޔަވަޅު އެޅި ތިން ބޭފުޅުންނާ މެދު ރައީސް އަބުދުﷲ ޔާމީނަށް އެންޓި ކެމްޕެއިން ކުރާކަމުގެ ތުހުމަތުކުރެއެވެ. އަދި މިމަހުގެ 8 ވަނަ ދުވަހު ބޭއްވި އިދިކޮޅު ކޯލިޝަންގެ ބޮޑު ޖަލްސާގައި ބައިވެރިވި ކަމަށް ތުހުމަތުކޮށް އެބޭފުޅުންނާ ސުވާލު ވެސް ކުރިކަން ރާއްޖެއެމްވީ އަށް ވަނީ އެނގިފައެވެ. އެހެންނަމަވެސް އެކަން އެބޭފުޅުންގެ މައްޗަށް ސާބިތު ނުކުރެވުމުން އެންޓި ކެމްޕެއިންކުރާ ކަމަށް ތުހުމަތުކޮށް ވަނީ ޒިންމާތަކުން އެކަހެރިކޮށްފައެވެ.
މިކަން ސާފުކުރުމަށް މޯލްޑިވްސް ކަރެކްޝަނަލް ސާވިސްގެ އިންފޮމޭޝަން އޮފިސަރު އަހުމަދު ލުގުމާނަށް ގުޅުލާމުން އޭނާ ވަނީ މިކަން ދޮގުކުރައްވާ އެފަދަ ކަމެއް ނުހިނގާ ކަމަށް ވިދާޅުވެފައެވެ. އަދި ކަރެކްޝަނަލް ސާވިސްގެ ވެބްސައިޓްގައި ބުނެފައިވާ ގޮތުގައި އެ ބޭފުޅުންގެ ޒިންމާތައް ބަދަލުކުރީ، ރިޔާސީ އިންތިޚާބާ ގުޅިގެެންނެވެ.
"ކޮންމެ އިންތިހާބަކާ ދިމާކޮށް ޖަލުތައް ހަލަބޮލިކޮށް ހަމަނުޖެހުން ހިންގަން އުޅުމަކީ އެއާ ދެކޮޅަށް ކޮންމެ ފަހަރަކު ވެސް މޯލްޑިވްސް ކަރެކްޝަނަލް ސަރވިސް އިން ވަރަށް ބޮޑަށް ތައްޔާރުވާ ކަމަކަށްވެފައި، 2018 ވަނަ އަހަރުގެ ރިޔާސީ އިންތިހާބާ ގުޅޭ އޮޕަރޭޝަންގެ ކަންތައްތައް ސެންޓްރަލީ ކޮންޓްރޯލްކޮށް ބެލެހެއްޓުމަށް އެމްސީއެސްގެ ބައެއް ވެރިން ބަދަލު ކޮށްފި" ކަމަށް އެ ވެބްސައިޓްގައި ލިޔެފައި ވެއެވެ.
ގުޅިފައިވާ ޕާޓީތަކުގެ ރިޔާސީ ކެންޑިޑޭޓަަށް ނުވަނަ ކޯލިޝަނަށް ތާއީދުކޮށްގެން ގިނަ އަދަދެއްގެ ސިވިލް ސާވަންޓުންނާއި ކުންފުނިތަކުގެ މުއައްޒަފުންނަށް އެކި ކަހަލަ ދުއްތުރާތައް ސަރުކާރުން ކުރިމަތި ކުރުވާ، ވަޒީފާތަކުން ކަނޑަމުން ގެންދާކަމުގެ މައުލޫމާތު ދަނީ ލިބެމުންނެވެ.
އެހެން ޔުނީފޯމް އޮފިސަރުންނާއި ކަރެކްޝަންސްގެ މުވައްޒަފުން ތަފާތުކުރާތީ މީގެ ކުރިން ވެސް ބައެއް މުވައްޒަފުން ވަނީ ކަންބޮޑުވުން ފާޅުކޮށްފައެވެ. އެގޮތުން ފުލުހުންނާއި ސިފައިން ފަދަ މުއައްސަސާތަކަށް ހާއްސަކޮށްގެން ފްލެޓް ފަދަ މަޝްރޫއުތައް ހިންގާ އިރު ކަރެކްޝަންސްގެ މުވައްޒަފުންނަށް އެފަދަ އިނާޔަތްތައް ނުދޭ މައްސަލައިގައި މުވައްޒަފުންގެ މެދުގައި ވަނީ ޝަކުވާތައް ގިނަވެފައެވެ.
