މިއަހަރުގެ ދެވަނަ ކުއާޓަރގައި އެންޓި ކޮރަޕްޝަން ކޮމިޝަން (އޭސީސީ) އިން 124 މައްސަލަ ރަޖިސްޓަރ ކޮށްފިއެވެ. 

އެންޓިކޮރަޕްޝަން ކޮމިޝަނުން އާންމުކޮށްފައިވާ ތަފާސްހިސާބުތަކުން ދައްކާ ގޮތުގައި 2018 ވަނަ އަހަރުގެ ފުރަތަމަ ހަމަސް ދުވަހުގެ ތެރޭގައި 404 މައްސަލަ ވަނީ ރަޖސްޓްރީ ކޮށްފައެވެ. މީގެ ތެރެއިން 124 މައްސަލައަކީ ދެ ވަނަ ކުއާޓަރގައި ރަޖިސްޓްރީ ކުރެވިފައިވާ މައްސަލައެވެ. މިދިޔަ އަހަރުގެ ދެވަނަ ކުއާޓަރގެ ތެރޭގައި ރަޖިސްޓްރީ ކުރެވިފައި ވަނީ 152 މައްސަލައެވެ.

ކޮމިޝަނުގައި ރަޖިސްޓްރީ ކުރެވުނު މައްސަލަތަކުގެ ތެރެއިން ކޮމިޝަނުން ދިރާސާ ކުރުމަށް ފަހު، 2018 ވަނަ އަހަރުގެ ދެވަނަ ކުއާޓަރުގައި ތަޙްޤީޤު ކުރުމަށް ނިންމީ 110 މައްސަލައެވެ. 2017 ވަނަ އަހަރު އެމުއްދަތުގައި ތަޙްޤީޤު ކުރުމަށް ނިންމާފައި ވަނީ 99 މައްސަލައެވެ.

ކޮމިޝަނަށް ހުށަހަޅާ ޝަކުވާތަކުގެ ތެރެއިން ކޮމިޝަންގެ މެންޑޭޓަށް ނުފެތޭ މައްސަލަތައް އެ މެންޑޭޓެއް އޮތް އިދާރާއަކަށް ކޮމިޝަނުން ދަނީ ފޮނުވަމުންނެވެ. އެގޮތުން، މިއަހަރުގެ ދެ ވަނަ ކުއާޓަރގެ ތެރޭގައި އަށް މައްސަލައެއް ދައުލަތުގެ ކަމާ ބެހޭ އިދާރާތަކަށް ފޮނުވާފައިވާއިރު، މިދިޔަ އަހަރުގެ އެމުއްދަތުގައި ކޮމިޝަނުން އެހެނިހެން އިދާރާތަކަށް ފޮނުވާފައި ވަނީ 6 މައްސަލައެވެ.

މީގެ އިތުރުން، ކޮމިޝަނުގެ މެންޑޭޓަށް ނުފެތޭތީ އާއި އެކަށީގެންވާ ވަރަށް މަޢުލޫމާތު ލިބިފައި ނުވާތީ، 16 މައްސަލަ މިއަހަރުގެ ދެވަނަ ކުއާޓަރގައި ނުބަލާ ދޫކޮށްލާފައިވާއިރު، 2017 ވަނަ އަހަރުގެ އެމުއްދަތުގައި 26 މައްސަލަ ވަނީ ނުބަލާ ދޫކޮށްލާފައި ކަމަށް އެކަމިޝަނުން ބުނެއެވެ.