އަރްޖުން ކަޕޫރު އޭނާގެ އެއްބަފާ ދެ ކޮއްކޮ ކަމަށްވާ ހުޝީ ކަޕޫރާއި ޖާންވީ ކަޕޫރާއި އެކު ރަކްޝާ ބަންދަން ފާހަގަ ކޮށްފި އެވެ.
މި ހަފްލާގައި ބޮނޭ ކަޕޫރާއި، އަނިލް ކަޕޫރުގެ އިތުރުން ސަންޖޭ ކަޕޫރާއި މި ތިން މީހުންގެ ދަރިން ކަމަށްވާ ހަރްޝް ވަރުދަން، ޖާންވީ، ހުޝީ، އަރުޖުން، އަންޝުލާ، ޝަނާޔާ އަދި ޖަހާން ވަނީ ބައިވެރިވެފައެވެ.
ކަޕޫރު އާއިލާގެ ގިނަ މެންބަރުންތަކެއް ބައިވެރިވި މި ހަފްލާގައި ނަގާފައިވާ ފޮޓޯގައި އަނިލް ކަޕޫރުގެ ދެ ދަރިން ކަމަށްވާ ސޯނަމް ކަޕޫރާއި ރިއާ ކަޕޫރު ފެނިގެން ގޮސްފައެއް ނުވެއެވެ.
އަންޝުލާ އޭނާގެ އިންސްޓަގްރާމްގައި ޝެއަރ ކޮށްފައިވާ ވީޑިއޯގައި އެކަކު އަނެކަކުގެ އަތުގައި "ރާކީ" އެޅުވިއިރު ބޮނޭ ކަޕޫރު އެކުދިންނަށް ބަލަހައްޓައިގެން ހެވިފައި ހުރި މަންޒަރު ފެނިގެން ދެއެވެ.
އަންޝުލާ ވަނީ މި ވީޑިއޯގެ އިތުރުން އެންމެން ނަގާފައިވާ ފޮޓޯއެއްވެސް ކެޕްޝަންގައި "ހެޕީ ރާކީ" ޖެހުމަށްފަހު ޝެއަރ ކޮށްފައެވެ.
އަރުޖުންވެސް ވަނީ އާއިލާގެ އެންމެން އެކުގައި ނަގާފައިވާ ފޮޓޯތައް އިންސްޓަގްރާމްގައި ޝެއަރ ކޮށްފައެވެ. ފޮޓޯގެ ކެޕްޝަންގައި އަރުޖުން ލިޔެފައިވަނީ "އެއްވެސް މީހަކު ނެތް ދޭނެ ޖަވާބެއް ފެމިލީ ފޮޓޯގައި އަނިލް އަވި އައިނު އަޅާފައި ހުރީ ކީއްވެ ކަމާއިދޭތެރޭ. ފަހަރެއްގައި އޭނާ ހީކުރީ ކަންނޭންގެ އަހަރުމެންނަކީ އޭނާގެ ފޭނުން ކަމަށް" މިހެންނެވެ.
ރަކްޝާ ބަންދަން ހަފްލާގައި އާއިލާ އާއި އެކު ބައިވެރި ނުވެވުނު ނަމަވެސް ސޯނަމް ވަނީ އޭނާގެ ފިރިހެން ކޮއްކޮ ހަރްޝް ވަރްދަން އާއި އެކު ނަގާފައިވާ ފޮޓޯއެއް އިންސްޓަގްރާމްގައި ޝެއަރކޮށް ރާކީ ބަންދަން ވިޝްކޮށްފައެވެ.
