މި މަހުގެ ނިޔަލަށް ގާކޮށި މާރުކޭޓް ހުސްކުރަން އަންގައިފި
މި މަހުގެ 31 ކުރިން ގޮޅިތައް ހުރަސް ކުރަން ވަނީ އަންގާފައި
ގާކޮށި މާރުކޭޓުގައި ހުކުރު ދުވަހު ބަޔަކު ވިޔަފާރި ކުރަނީ: މި މަހުގެ ނިޔަލަށް އެތަން ހުރަސްކުރަން ވަނީ އަންގާފައި
ގާކޮށީގެ ހުޅަނގު ދެކުނުގައި ހުންނަ މާރުކޭޓް މި މަސް ނިމުމުގެ ކުރިން ހުސްކުރަން އަންގައިފިއެވެ.
ވިޔަފާރިވެރިންގެ ޖަމިއްޔާ އިން އެ ބިން އަމިއްލަ ފަރާތަކަށް ކުއްޔަށް ދިނުމުން ތަރުކާރީ އާއި މޭވާ ވިއްކުމަށް ހާއްސަކޮށްފައިވާ ގާކޮށި މާރުކޭޓުގައި 20 އަށް ވުރެ ގިނަ ގޮޅި ދަނޑުވެރިންނަށް ދޫކޮށްފައި ވެއެވެ. އެގޮތުން ކޮންމެ ގޮޅިއަކުން 5،000ރ. ގެ ފީއެއް ދައްކަމުން ދަނީ އެ ކުންފުންޏަށެވެ.
ދިވެހިންނަށް ގޮޅިތައް ދޫކޮށްފައިވީ ނަމަވެސް އެތަނުގައި ވިޔަފާރިކުރަން ތިބެނީ ހުސް ބިދޭސީންނެވެ.
ގާކޮށީ މާރުކޭޓަކީ އެ ސަރަހައްދުގައި ދިރިއުޅޭ ގިނަ ބަޔަކު ވިޔަފާރި ކުރާ ތަނެކެވެ. ދަތުވެރިންގެ މާރުކޭޓަށް ދިއުމުގެ ބަދަލުގައި ގާކޮށި މާރުކޭޓަށް ގިނަ ބަޔަކު ވިޔަފާރި ކުރަންދެއެވެ. ހާއްސަކޮށް އަންހެނުން ގިނަކަން ފާހަގަކޮށްލެވެއެވެ.
ހިންގުމަށް އަމިއްލަ ކުންފުންޏަކަށް އެ ބިން ދޫކޮށްފައިވާތާ ދެ އަހަރަށް ވުރެ ގިނަ ދުވަސް ވަނީ ވެފައެވެ. ނަމަވެސް ގާކޮށީ މާރުކޭޓް ގޮޅިތަކުން ދަނޑުވެރިން މި މަހުގެ ނިޔަލަށް ނުކުތުމަށް އެންގީ ކޮން ސަބަބަކާ ހުރެ ކަމެއް ނޭނގެއެވެ.
އެ މާރުކޭޓުގައި ގޮޅިއެއް ހިންގާ މީހަކު "ރާއްޖެއެމްވީ" އަށް ވިދާޅުވީ މި މަހުގެ 31 ކުރިން މާރުކޭޓް ހުސްކުރަން އެންގީ ކުއްލިއަކަށް ކަމަށާއި އޭގެ ސަބަބުން ކުރިއާލާ އޯޑަރު ކޮށްގެން ގެންނަން ނިންމާފައިވާ ތަކެތި ވިއްކާނެ ގޮތެއް ނެތް ކަމަށެވެ.
ގާކޮށި މާރުކޭޓް ހުރަސް ކުރަން އެންގި ސަބަބާ ގުޅޭ ގޮތުން ވިޔަފާރިވެރިންގެ ޖަމިއްޔާގެ ބަހެއް ވަނީ ލިބޭ ގޮތް ނުވެފައެވެ.
މީގެ ކުރިން ވެސް ވިޔަފާރިވެރިންގެ ޖަމިއްޔާ އިން ވަނީ އެ ބިން ބަޔަކަށް ކުއްޔަށް ދީ ކުދި ފިހާރަތަކާއި ފުޑް ކޯޓް ހިމެނޭ ގޮތަށް ތަރައްގީކުރަން ދޫކޮށްފައެވެ. ނަމަވެސް އެތަންތަން ހަދަމުން ދަނިކޮށް ކުއްލި އަކަށް އެ ބިން ވިޔަފާރިވެރިންގެ ޖަމިއްޔާ އަށް ނަގައި އެ ބިން ކުއްޔަށް ނަގައިގެން އުޅުނު ކުންފުންޏަށް ބަދަލެއްގެ ގޮތުގައި އެތައް މިލިއަން ރުފިޔާއެއް ދީފައެވެ. ނަމަވެސް އޭގެ މާގިނަ ދުވަސްތަކެއް ނުވެ އެ ބިން އެހެން ބަޔަކަށް ހަމަ އެ ގޮތަށް ކުއްޔަށްދީ ކުދި ފިހާރަތަކާއި މާރުކޭޓް ގޮތަށް ހިންގަން ފަށާފައި ވެއެވެ.
މީގެ ކުރިން އެ ބިމުގައި އެމްޑީޕީގެ ޖަގަހަ ވެސް ހިންގާފައި ވެއެވެ.
