ބްރޯޑްކާސްޓިން ކޮމިޝަނުން ރާއްޖެޓީވީ ހަތަރު ވަނަ ފަހަރަށް ކުރި ޖޫރިމަނާ ދެއްކުމަށް ފައިސާ ހޯދުމުގެ ގޮތުން އަބުރުފުޅު ފަންޑު މިރޭ ފުވައްމުލަކުގައި ހުޅުވުމަށް ނިންމައިފިއެވެ.

މިފަހަރު މި ސްޓޭޝަން ޖޫރިމަނާ ކުރީ ދެ މިލިއަން ރުފިޔާއިންނެވެ. މިރޭ 9:30 ގައި ފުވައްމުލަކުގައި ފުނާޑު އަވަށު ހަދުވަލި ދަނޑުގައި އަބުރުފުޅު ފަންޑު ހުޅުއްވާދެއްވާނީ އެ ސިޓީގެ ޑެޕިއުޓީ މޭއަރު މުހައްމަދު ލިރާރުއެވެ.

ރާއްޖެޓީވީން ބުނީ، އަބުރުފުޅު ފަންޑު ހުޅުވަނިކީ އެއްގޮތަކަށް ވެސް ބްރޯޑްކޮމްއިން ނުހައްގުން އެޅި ފިޔަވަޅަށް ތަބާވުމަށް ނޫން ކަމަށެވެ. އެހެންނަމަވެސް މި ސްޓޭޝަނަށް އެކަމުގެ ސަބަބުން ލިބިދާނެ ދެރައަކަށްޓަކައިކަމަށެވެ. އަދި އެހެން އެކަން ވެއްޖެނަމަ ރާއްޖޭގެ އެންމެ ގިނަ ބަޔަކު ބަލަމުން ދާ ޗެނަލްއަށް ހުއްޓުމެއް އައުމަކީ އެތަށް ރައްޔިތުންނެއް އެކަމާއި ދެރަވެ ކަންބޮޑުވާނެކަމަކަށް ވާތީ ކަމަށްވެސް ޜާއްޖެޓީވީން ބުންޏެވެ.

އެހެންކަމުން ފުވައްމުލަކުގައި ބެހެއްޓޭ އަބުރުފުޅުފަންޑަށް ވީހާވެސް ގިނަ ރައްޔިތުން އެހީވުމަކީ ރާއްޖެޓީވީގެ އެދުމައެވެ. އަބަދުވެސް ރާއްޖެޓީވީއަށް ދިމާވާ މިފަދަ ކަންކަމުގައި ފުވައްމުލަކު ސިޓީގެ ރައްޔިތުން ދަނީ އެހީތެރިކަން ފޯރުކޮށްދެމުންނެވެ.

ރާއްޖެޓީވީން ބުނީ، އަތޮޅު ތެރެއިން ރާއްޖެޓީވީގެ އަބުރުފުޅު ފަންޑަށް އެހީތެރިވުމަށް ބޭނުންވާ ރަށްތަކުން ރާއްޖެޓީވީ އާއި ގުޅުއްވައިގެން އެކަން އިންތިޒާމް ކުރުމަށެވެ. އެގޮތުން ރާއްޖެޓީވީގެ ނަމްބަރު 3007771 އަށް ގުޅުއްވައި މައުލޫމާތު ސާފުކުރުމަށް ސްޓޭޝަނުން އެދެއެވެ.

ކުރިއަށް އޮތް ރިޔާސީ އިންތިޚާބުގެ ފޯކަސް ގެއްލުވާލައި، ރާއްޖެޓީވީގެ ނޫސްވެރިން ކުރާ މަސައްކަތަށް ހުރަސްއަޅާ ޖެއްސުން ކުރުމަށް އިންތިޚާބު ބޯމަތި ވެފައި އޮއްވާ ކުރި ބޮޑު ޖޫރިމަނާ ރާއްޖެޓީވީން ބަލައެއް ނުގަނެއެވެ. އަދި އެ މައްސަލަ އިތުރަށް މުރާޖައާކުރުމަށް އެދި ރާއްޖެޓީވީގެ ފަރާތުން ވަނީ އަލުން އެ ކޮމިޝަނަށް ހުށައަޅާފައެވެ.

ރާއްޖެޓީވީ ހަތަރުވަނަ ފަހަރަށް ކުރި ޖޫރިމަނާ ސްޓޭޝަނުން ބަލައި ނުގަންނަ ހިނދު، މި ޖޫރިމަނާއަކީ ވެސް ކުރިން ފަހަރުތަކެކޭ އެއްގޮތަށް ބްރޯޑްކޮމްއިން ބޭ އިންސާފުން ކުރި، ސިޔާސީ ކުލަ ޖެހިފައިވާ ފިނޑި އަމަލެއްކަމަށް ސްޓޭޝަނުން ދެކެއެވެ.