ދައުލަތުން ބިލިއަނަކަށް ވުރެ ގިނަ ރުފިޔާ ހޯދަން ޑަބްލިއުއެލްޓީން ކުރާ ދައުވާ ސުޕްރީމް ކޯޓަށް
15 އޯގަސްޓު 2018 | ބުދަ 13:04ސިވިލް ކޯޓާއި ހައި ކޯޓުން ވެސް ނިންމީ ޑަބްލިއުއެލްޓީއާ ދެކޮޅަށް
ސުޕްރީމް ކޯޓް: އިސްތިއުނާފު ޝަރީއަތް ފަށާނީ މާދަމާ ހެނދުނު 10:30ގައި
ވިލާ ކުންފުނީގެ ހިއްސާ އޮންނަ ވޯލްޑް ލިންކް ޓްރެވަލްސް (ޑަބްލިއުއެލްޓީ) އިން 112 މިލިއަން ޑޮލަރު (1.7 ބިލިއަން ރުފިޔާ) ހޯދަން ދައުލަތާ ދެކޮޅަށް ދައުވާ ކުރާ މައްސަލައިގެ އިސްތިއުނާފު އަޑުއެހުން ބުރާސްފަތި ދުވަހު ސުޕްރީމް ކޯޓުގައި ފަށަން ތާވަލުކޮށްފިއެވެ.
ޑަބްލިއުއެލްޓީ އިން ދައުލަތާ ދެކޮޅަށް އުފުލި އެ ދައުވާއާ ގުޅިގެން، ސިވިލް ކޯޓާއި ހައި ކޯޓުން ވެސް ހުކުމްކޮށްފައި ވަނީ އެ ކުންފުންޏާ ދެކޮޅަށެވެ.
އެ މައްސަލާ ނާކާމިޔާބުވުމުން، ޑަބްލިއުއެލްޓީން ދައުލަތާ ދެކޮޅަށް ސުޕްރީމް ކޯޓުގައި ދައުވާ ކުރަނީ ކުރީގެ އެއާޕޯޓް އިންވެސްޓްމަންޓް މޯލްޑިވްސް (އެއިމްސް) އިން ޑަބްލިއުއެލްޓީއަށް 2007 ގައި ރިސޯޓް ހެދުމަށް ރަށްތަކެއް ދޭން އެއްބަސްވުމަށްފަހު އެތަންތަން ހަވާލުކޮށްފައި ނުވާތީ، ގެއްލުމުގެ ބަދަލު ހޯދުމަށެވެ. އެގޮތުން އެ ކުންފުންޏަށް ގެއްލުންވި ކަމަށް ބުނާ 112 މިލިއަން ޑޮލަރާއި ރަށްތަކުގެ އެޑްވާސްގެ ގޮތުގައި ޑަބްލިއުއެލްޓީން ދެއްކި 16.9 މިލިއަން ޑޮލަރު އަނބުރާ ހޯދުމަށް ވަނީ ދައުވާކޮށްފައެވެ.
ޑަބްލިއުއެލްޓީން އަނބުރާ ހޯދުމަށް ދައުވާ ކުރި 16.9 މިލިއަން ޑޮލަރު އެ ކުންފުންޏަށް ދެއްކުމަށް ސިވިލް ކޯޓާއި ހައި ކޯޓުން ވަނީ ހުކުމްކޮށްފައެވެ. ނަމަވެސް އެ ފައިސާ އެ ކުންފުންޏަށް ނުދައްކައި، ދައުލަތުން ވެސް ވަނީ އެ މައްސަލަ އިސްތިއުނާފަށް ހުށަހަޅާފައެވެ. ދައުލަތުން އިސްތިއުނާފަށް ހުށަހެޅި އެ މައްސަލާގައި އަޑުއެހުން ވެސް ސުޕްރީމް ކޯޓުގައި ބުރާސްފަތި ދުވަހު ފެށުމަށް ވަނީ ތާވަލުކޮށްފައެވެ.
އެ ދެ މައްސަލައިގެ އަޑުއެހުންތައް ސުޕްރީމް ކޯޓުގައި ފަށަން ތާވަލުކޮށްފައި ވަނީ ބުރާސްފަތި ދުވަހުގެ ހެނދުނު 10:30ގައެވެ.
