ބެލްޓް އެންޑް ރޯޑް އިނިޝިއޭޓިވް ބޭނުންކޮށްގެން ޗައިނާއިން ޖާސޫސުކުރާނެކަމުގެ ތުހުމަތުކޮށްފި
15 އޯގަސްޓު 2018 | ބުދަ 19:38ރާއްޖެއިން ވަނީ ސުވާލެއްނެތި ބެލްޓް އެންޑް ރޯޑް އިނިޝިއޭޓިވްއަށް އާނބަސް ބުނެފައި
ވެލާނާ އެއަރޕޯޓްގައި ޕައިލް ޑްރައިވްކުރަނީ، ރާއްޖޭގެ ބޮޑެތި ޕްރޮޖެކްޓްތައް ހިންގަނީ ޗައިނާގެ ކުންފުނިތަކުން
ޗައިނާއިން ކުރިޔަށްގެންދާ ބެލްޓް އެންޑް ރޯޑް އިނީޝިއޭޓިވްގެ ދަށުން ގާއިމްކުރެވޭ ކޮމްޕިއުޓަރ ނެޓްވޯކް މެދުވެރިކޮށް އެ މަޝްރޫއުގެ ތެރޭގައި ހިމެނޭ ގައުމުތަކާއި ކުންފުނިތަކަށް ޖާސޫސުކުރެވޭނެ ގޮތް ވަރުގަދަ ކުރަމުންދާކަމުގެ އިންޒާރު ތަޖުރިބާކާރުން ދީފިއެވެ.
އެމެރިކާގެ ސައިބަރ ސެކިއުރިޓީ ކުންފުންޏެއްކަމަށްވާ ފަޔަރއައިގެ ރިޕޯޓްގައި ބުނެފައިވަނީ ޗައިނާއިން އަމާޒުކުރަނީ ބެލަރުސްއަށާއި، ދިވެހިރާއްޖެއަށާއި، ކެމްބޯޑިއާއަށާއި، ޔޫރަޕުގެ ގައުމުތަކުގެ ފޮރިން މިނިސްޓްރީތަކަށާއި އެންޖީއޯތަކަށް ކަމަށެވެ.
ފަޔަރއައިގެ ނައިބް ރައީސް ސެންޑްރާ ޖޮއިސް ވިދަޅުވީ ފެންނަ ފެނުމުގައި އެ ގައުމުން ޝައުގުވެރިކަން ހުރީ އެގައުމަށް ފައިސާ ގިނައިން ވަންނަން ހުރި ގައުމުތަކާއި ނުވަތަ މުސްތަގުބަލުގައި ޕްރޮޖެކްޓްތައް ހިންގުމަށް އަސަރުކުރާގޮތަށް ސިޔާސަތުތައް އެކުލަވާލާފައިވާ ގައުމުތަކަށް ކަމަށެވެ.
ޗައިނާގެ ބެލްޓް އެންޑް ރޯޑް އިނީޝިއޭޓިވް އަކީ މިހާރުވެސް ގައުމުތަކުގެ ފާޑުކިޔުންތައް އަމާޒުވެފައިވާ ޕްރޮޖެކްޓެވެ.
މެލޭޝިއާގެ މިހާރުގެ ބޮޑުވަޒީރު މަހާތިރު މުހައްމަދު ސިފަކުރައްވާފައިވާ ގޮތުގައި އެ ޕްރޮޖެކްޓަކީ އެއްފަރާތަށް ބުރަވެފައިވާ މުއާމަލާތެކެވެ.
މިހާރު އެ ޕްރޮޖެކްޓާއި ގުޅިގެން ސައިބަރ ތްރެޓްސް އޮތްކަމަށް ބުނެވެން ފެށުމުން އެ މަޝްރޫއުގެ ބިޑިންގް މަރުހަލާއާއި ޗައިނާގެ މަގްސަދާއިމެދުވަނީ އިތުރު ސުވާލުތައް އުފެދިފައެވެ.
ތިންކް ޓޭންކެއްކަމަށްވާ އައިއައިއެސްއެސްގެ ރިސަރޗް ކޮންސަލްޓަންޓް ސަމަންތާ ހޮފްމަން ވިދާޅުވީ މެގަ ޕްރޮޖެކްޓް މޮނިޓަރ ކުރުމާއި މައުލޫމާތު އެއްކުރުމުގެ އިތުރުން ހޯދޭ މައުލޫމާތު ޗައިނާއިން ދެކޮޅުވެރި ފަރާތްތަކާއި ދެކޮޅަށް ބޭނުންކުރުމުގެ ފުރުސަތު އެބަ އޮތްކަމަށެވެ.
