ރިޔާސީ އިންތިހާބުގައި އަމިއްލަ ގޮތުން ވާދަ ކުރެއްވުމަށް ހުށަހެޅުއްވި ހުސައިން ނަސީރު އިލެކްޝަންސްް ކޮމިޝަނަށް ހުށަހެޅި ފޯމުގެ މައުލުމާތު ސައްހަނުވުމުގެ ސަބަބުން އޭނާގެ ކެންޑިޑެސީ ބަލައިނުގަތުމަށް އިލެކްޝަންސް ކޮމިޝަން (އީސީ) އިން ނިންމައިފިއެވެ.
Amilla gothun Riyaasee Inthikhaabah kurimathili, dhaftharu numberu RS6562 / K.Male' Hussain Naseeru ge form ge mauloomath sahha nuvumuge sababun, eynaa Raeesul Jumhooriyyaa kamah kurimathi lumah hushahelhi hushahelhun Elections Commission in gabool nukuran Commission in nimmaifi pic.twitter.com/AqRxTRDSGI
— Elections Commission (@ElectionsMv) August 10, 2018
އީސީން ބުނި ގޮތުގައި އަމިއްލަ ގޮތުން ކުރިމަތިލެއްވި މާލެ ދަފްތަރު ހުސައިން ނަސީރުގެ ފޯމުގެ މައުލޫމާތު ސައްހަ ނުވުމުގެ ސަބަބުން، ރައީސުލްޖުމްހޫރިއްޔާ ކަމަށް ކުރިމަތިލެއްވުމަށް އޭނާ ހުށަހެޅުއްވި ހުށަހެޅުން ގަބޫލުނުކުރަން ނިންމައި، އޭނާއަށް އެކަން އަންގާފައިވާ ކަމަށެވެ. އޭނާ ހުށަހެޅުއްވި ފޯމުގައި ސައްހަ ނުވަނީ ކޮން މައުލުމާތެއް ކަމެއް އީސީއަކުން ހާމައެއް ނުކުރެއެވެ.
އިންތިހާބަށް ކުރިމަތިލުމަށް މިދިޔަ ބުދަ ދުވަހު ހުސައިން ކެންޑިޑެސީ ހުށަހެޅުއްވީ 1،800 މީހުންގެ ސޮޔާ އެކުއެވެ. ހުސައިންގެ ރަނިންގ މޭޓެއްގެ ގޮތުގައި ކަނޑައަޅުއްވާފައި ވަނީ ޝެއިޚް ނަސްރުﷲ މުސްތަފާއެވެ. އޮރިޔާންކާޑް ގެންގުޅުމާއި އުފެއްދުމުގެ ދައުވާ ނަސްރުﷲގެ މައްޗަށް އުފުލައި ޝަރީއަތް ފަށާފައިވާ އިރު އޮޅިވާލައިގެން ބަޔަކު ހައްޖަށް ގެންދިއުމަށް ފައިސާ ނެގި މައްސަލައެއްގައި ހައްޔަރުކޮށް އެނގިހުރެ ސައްހަ ނޫން ގޮތުގައި ލިޔުމެއް އުފެއްދުމުގެ ދައުވާ އާއި، ހުއްދަ ނަގައިގެން ކުރަންޖެހޭ ކަމެއް ހުއްދަ ނުނަގައި ކުރުމުގެ ދައުވާ ވެސް ދައުލަތުން އޭނާގެ މައްޗަށް އުފުލިއެވެ.
ނަސްރުﷲގެ މައްޗަށް މި ދެ ދައުވާކުރިއިރު، މިދިޔަ އަހަރުގެ އޯގަސްޓް މަހުގެ ތެރޭގައި އޭނާގެ މައްޗަށް އިތުރު ހަތަރު ދައުވާއެއްކޮށް ޝަރީއަތް ދަނީ ހިންގަމުންނެވެ.
އެގޮތުން، އަނބިމީހާއަށް އަޅާނުލާ ކަމަށް ބުނެ އަޅާނުލުމުގެ ދައުވާ އާއި، ދަރިންނަށް އަޅާނުލާ ކަމަށް ބުނެ އަޅާނުލުމުގެ ދައުވާ އާއި، ކައިވެނި ރަޖިސްޓްރީ ކޮށްފައިނުވާ ކަމަށް ބުނެ ގާނޫނު ހިންގުމަށް ހުރަސްއެޅުމުގެ ދައުވާ އޭނާގެ މައްޗަށް ކޮށްފައިވެއެވެ.
އިންތިހާބާ ބެހޭ ގާނޫނުގައި ބުނެފައި ވަނީ އިންތިހާބަށް ކުރިމަތިލުމަށް ހުށަހަޅާތާ ގިނަވެގެން 48 ގަޑިއިރު ނުވަތަ ދެ ދުވަހުގެ ތެރޭގައި އެކަން ގަބޫލުކުރިކަން ނުވަތަ ނޫންކަން އެ މީހަކަށް އަންގަންޖެހޭނެ ކަމަށެވެ. އަދި އެކަމާ ގުޅިގެން އިލެކްޝަންސް ކޮމިޝަނުން ނިންމީ ނިންމުމެއް، ފަސް ދުވަހުގެ ތެރޭގައި ސުޕްރީމް ކޯޓަށް ނުވަތަ ހައި ކޯޓަށް ހުށަހެޅިދާނެ ކަމާށާއި އެއިން ކޯޓަކަށް އެފަދަ މައްސަލައެއް ހުށަހަޅައިފި ނަމަ ހަތް ދުވަހުގެ ތެރޭގައި އެކަން ނިންމަންޖެހޭނެ ކަމަށް ގާނޫނުގައި ބުނެފައި ވެއެވެ.
އިންތިހާބަށް ކުރިމަތިލުމުގެ ސުންގަޑި ހަމަވަނީ ހުކުރު ދުވަހުގެ ހަވީރު 4:00 އަށެވެ.
ނަސްރުއްﷲގެ އިތުރުން މިހާތަނަށް އިންތިހާބަށް ކުރިމަތިލައްވާފައި ވަނީ ގުޅިފައިވާ ޕާޓީތަކުގެ ކެންޑިޑޭޓް އިބްރާހީމް މުހައްމަދު ސޯލިހާއި ޕީޕީއެމްގެ ފަރާތުން މިހާރުގެ ރައީސުލްޖުމްހޫރިއްޔާ އަބްދުﷲ ޔާމީންއެވެ. ރައީސް ޔާމީން ބުރާސްފަތި ދުވަހު ފޯމް ހުށަހެޅުއްވި އިރު މިހާތަނަށް ކެންޑިޑެސީ ބަލައިގަތްކަން އިލެކްޝަނުން ހާމަކޮށްފައެއް ނުވެއެވެ.
