ގުޅިފައިވާ ޕާޓީތަކުގެ ބޮޑު ޖަލްސާ ބާއްވަން ދަރުބާރުގެ ދޭން ނިންމައިފި
10 އޯގަސްޓު 2018 | ހުކުރު 06:18ޕާޓީތަކުން އެދުނީ ކާނިވާ ސަރަހައްދު ދިނުމަށް
ގުޅިފައިވާ ޕާޓީތަކުން ބޭއްވި އެއްވުމެއްގެ ތެރެއިން
ގުޅިފައިވާ ޕާޓީތަކުގެ ބޮޑު ޖަލްސާއެއް ބޭއްވުމަށް ދަރުބާރުގެ ރަންނަބަނޑޭރި މާލަން އެމްޑީޕީއަށް ދޭން ހައުސިން މިނިސްޓްރީން ނިންމައިފިއެވެ.
ގުޅިފައިވާ ޕާޓީތަކުގެ ފަރާތުން، އެމްޑީޕީން ހައުސިން މިނިސްޓްރީގައި އެދުނީ މާލޭގެ ކާނިވާ ސަރަހައްދުގައި ދިނުމަށެވެ. ނަމަވެސް ހައުސިން މިނިސްޓްރީން ބުނީ ކާނިވާ ސަރަހައްދު ދޫކުރެވެން ނެތް ކަމަށާއި އެތަނުގައި ޖަލްސާ ބާއްވަން ހުއްދަ ދީފި ނަމަ، އެ ސަރަހައްދުގެ ބޭރު މަގުގައި ތާރު އެޅުމުގެ މަސައްކަތަށް ހުރަސް އެޅޭނެ ކަމަށެވެ.
ދަރުބާރުގޭ ރަންނަބަނޑޭރި މާލަމުގައި ގުޅިފައިވާ ޕާޓީތަކުގެ ޖަލްސާއެއް ބޭއްވުމަށް ހައުސިން މިނިސްޓްރީން ހުއްދަ ދިންއިރު، މިއީ ފަހުގެ ތާރީހެއްގައި އިދިކޮޅު ޕާޓީތަކަށް އެފަދަ ހަރަކާތެއް ބޭއްވުމަށް ސަރުކާރުން ތަނެއް ހަމަޖައްސައިދިން ފުރަތަމަ ފަހަރެވެ.
އިދިކޮޅު ބޮޑު ޖަލްސާ ބޭއްވުމަށް ދަރުބާރުގެ އެމްޑީޕީއަށް ދީފައިވާ ކަން، އެ ޕާޓީއަށް ވެސް ހައުސިން މިނިސްޓްރީން ވަނީ އަންގާފައެވެ. ޖަލްސާ ބޭއްވުމަށް ހުއްދަ ދިން އިރު، ރިޔާސީ ކެންޑިޑޭޓުންނަށް ދައުލަތުގެ ހަރަދުގައި ސަލާމަތާއި ރައްކާތެރިކަމާއި ދައުލަތުގެ ވަސީލަތްތަކާއި މަގުތަކާއި އާންމު ތަންތަނާއި ދައުލަތުގެ އިމާރާތްތަކާއި ބިންތައް ދިނުމަށް ބަންޑާރަ ނައިބު ވަނީ ސަރުކާރުގެ އިދާރާތަކަށް އަންގަވާފައެވެ.
ގުޅިފައިވާ ޕާޓީތަކުގެ ބޮޑު ޖަލްސާއެއް ބޭއްވުމަށް ދަރުބާރުގެ ދީފައިވާއިރު، އެ ޖަލްސާ ބާއްވާނެ ތާރީހެއް ޕާޓީތަކުން އިއުލާނެއް ނުކުރެއެވެ.
އިދިކޮޅު ފަރާތްތަކުގެ ހަރަކާތްތައް ހިންގުމަށް ތަންތަން ދޫނުކުރި ނަމަވެސް ޕީޕީއެމްގެ ޖަލްސާތަކާއި ހަރަކާތްތައް ހިންގުމަށް ދަރުބާރުގެ އާއި ކާނިވާ ސަރަހައްދު މީގެ ކުރިން ވެސް ދިޔައީ ބޭނުންކުރަމުންނެވެ.
