ހަތަރު ދުވަހުގެ ތެރޭގައި އިބޫ އާއި ފައިސަލް 33 ރަށަށް ވަޑައިގެންނެވި
9 އޯގަސްޓު 2018 | ބުރާސްފަތި 07:39އިންތިހާބާ ދިމާކޮށް މިހާތަނަށް 49 ރަށަށް ވަޑައިގެންނެވި
ގުޅިފައިވާ ޕާޓީތަކުގެ ރިޔާސީ ކެންޑިޑޭޓް އިބްރާހިމް މުހައްމަދު ސާލިހު (އިބޫ) ތ. އަތޮޅާއި ލ. އަތޮޅަށް ކުރެއްވި ދަތުރުފުޅުގެ ތެރެއިން
ވޭތުވެދިޔަ ހަތަރު ދުވަހުގެ ތެރޭގައި ގުޅިފައިވާ ޕާޓީތަކުގެ ރިޔާސީ ކެންޑިޑޭޓް އިބްރާހިމް މުހައްމަދު ސޯލިހާއި އެމަނިކުފާނުގެ ރަނިންގމޭޓް ފައިސަލް ނަސީމު 33 ރަށަކަށް ޒިޔާރަތް ކުރައްވައިފިއެވެ.
ދެ ޓީމެއްގެ ގޮތުގައި ދެ ސަރަހައްދަކަށް ވަޑައިގެންނެވުމަށްފަހު، އިބޫ ވަނީ 20 ރަށަށް ޒިޔާރަތް ކުރައްވާފައެވެ. އެއީ ތ. އަތޮޅުގެ ނުވަ ރަށާއި ލ. އަތޮޅުގެ 11 ރަށަށެވެ.
ފައިސަލް ވަޑައިގެންނެވީ ވ. އަތޮޅާއި މ. އަތޮޅުގެ 13 ރަށަކަށެވެ.
ގުޅިފައިވާ ޕާޓީތަކުގެ ރިޔާސީ ކެންޑިޑޭޓާއި ރަނިންގމޭޓް މިދިޔަ ހަފްތާގައި ރާއްޖޭގެ ދެ ސަރަހައްދަކަށް ވަޑައިގެންނެވުމުގެ ކުރިން، ބ. އަތޮޅުގެ ނުވަ ރަށަކަށް ވަނީ ވަޑައިގެންފައެވެ. އޭގެ ކުރިން އެ ބޭފުޅުން ވަނީ އައްޑޫ ސިޓީއަށާއި ފުވައްމުލަކަށް ވެސް ވަޑައިގެންފައެވެ. އަދި ފައިސަލް ނަސީމު ވަނީ އޭނާ ރައްޔިތުންގެ މަޖިލީހުގައި ތަމްސީލު ކުރައްވާ ކާށިދޫ ދާއިރާގެ އެންމެ ބޮޑު ރަށް، ކ. ކާށިދޫއަށް ވަޑައިގެންފައެވެ.
ރިޔާސީ އިންތިހާބާ ގުޅިގެން އިބޫ އާއި ފައިސަލް ވަނީ އަތޮޅު ތެރޭގެ ޖުމްލަ 49 ރަށަކަށް ވަޑައިގެންފައެވެ.
އިބޫ ވިދާޅުވެފައި ވަނީ އެ ބޭފުޅުންގެ އަމާޒަކީ އިންތިހާބާ ގުޅިގެން ރާއްޖޭގެ ހުރިހާ ރަށަކަށް ވަޑައިގެންނެވުމުން ކަމަށެވެ.
ގުޅިފައިވާ ޕާޓީތަކުން އިންތިހާބާ ގުޅިގެން 49 ރަށަކަށް ވަޑައިގެންފައިވާއިރު، ޕީޕީއެމްގެ ރިޔާސީ ކެންޑިޑޭޓް ރައީސް އަބްދުﷲ ޔާމީން މި ހަފްތާގައި ވަނީ ހުވަދު އަތޮޅަށް ވަޑައިގެންފައެވެ. ރައީސް ޔާމީން ވަޑައިގެންނެވި ހުވަދު އަތޮޅުގެ ބައެއް ރަށްތަކަކީ އެމަނިކުފާނުގެ ރަނިންގމޭޓް ޑރ. މުހައްމަދު ޝަހީމް އަލީ ސައީދު ވަޑައިގެންނެވި ރަށްތަކެވެ.
އެގޮތުން މިދިޔަ އަންގާރަ ދުވަހު ރައީސް ޔާމީން ވަޑައިގެންނެވި، ގއ. ވިލިނގިއްޔާއި އެ އަތޮޅު ކޮލަމާފުއްޓާއި ކޮނޑޭއަކީ މިދިޔަ މަހުގެ ފަހުކޮޅު ޝަހީމް ވަޑައިގެންނެވި ރަށްތަކެވެ.
