ބޭނުންވާ 1،500 ސޮއި ލިބިއްޖެ، ކުރިމަތިލުމާ މެދު މި ހަފްތާގައި ގޮތެއް ނިންމާނަން: އުމަރު
6 އޯގަސްޓު 2018 | ހޯމަ 12:00ކުރިމަތިލާން 2،200 ވުރެ ގިނަ ސޮއި ލިބިއްޖެ: އުމަރު
އުމަރަށް ލިބުނު ފޯމުތަކާ އެކު ސެލްފީއެއް ނަންގަވަނީ
އަންނަ މަހު 23 ގައި ބާއްވާ ރިޔާސީ އިންތިހާބުގައި އަމިއްލަ ގޮތުން ވާދަ ކުރެއްވުމަށް ތާއިދުކޮށް، 2،000 ވުރެ ގިނަ މީހުންގެ ސޮއި ދީފައިވާ ކަމަށާއި އިންތިހާބުގައި ވާދަ ކުރެއްވުމާ މެދު މި ހަފްތާގައި ގޮތެއް ނިންމަވާނެ ކަމަށް އޭނާ ވިދާޅުވެއްޖެއެވެ.
އުމުރު އެހެން ވިދާޅުވެފައި ވަނީ އޭނާގެ ފޭސްބުކް ޕޭޖުގައި އާންމުކުރައްވާފައިވާ ފޮޓޯއަކާ އެކުގައެވެ. ސޮއި ދީފައިވާ މީހުންގެ ފޯމު ހިމެނޭ ގޮތަށް ނެންގެވި ސެލްފީއަކާ އެކު، އުމުރު ވިދާޅުވެފައި ވަނީ ރިޔާސީ އިންތިހާބަށް ކުރިމަތިލުމަށް ބޭނުންވާ ސޮއި ހޯދުމުގައި ވޮލެންޓިއަރުން ކޮށްދިން މަސައްކަތަށް ޝުކުރު އަދާކުރާ ކަމަށެވެ. އަދި ސޮއި ދިން 2،200 އަށް ވުރެ ގިނަ މީހުންނަށް އުމުރު ވަނީ ޝުކުރު އަދާ ކުރައްވާފައެވެ.
ރިޔާސީ އިންތިހާބުގެ ގާނޫނުގެ ނުވަ ވަނަ މާއްދާގައި ބުނެފައި ވަނީ ރިޔާސީ އިންތިހާބަށް ސިޔާސީ ޕާޓީއެއްގެ ފަރާތުން ފިޔަވައި، އަމިއްލަ ގޮތުން ކުރިމަތިލާ މީހެއް ނަމަ، އުމުރުން 18 އަހަރު ފުރިފައިވާ މީހުން ކުރެ މަދުވެގެން 1،500 މީހުން އެ މީހަކަށް ތާއިދު ކުރާކަން ދައްކައިދިނުމުގެ ގޮތުން ފުރިހަމަ ނަމާއި ދިވެހި ރައްޔިތެއްކަން އަންގައިދޭ ކާޑު ނަންމަބަރާއި ދާއިމީ އެޑްރެހާއި ސޮއި ހިމެނޭ ލިޔުމެއް ހުށަހަޅަންވާނެ ކަމަށެވެ.
ރިޔާސީ އިންތިހާބުގައި ވާދަ ކުރުމަށް އުމަރު ފޯމު ހުށަހަޅުއްވާފައި ނުވާ އިރު، ސާބިތު ދަރަނީގެ މައްސަލައެއްގައި އޭނާގެ ޕާސްޕޯޓް ވަނީ ހިފަހައްޓާފައެވެ. އެނގިފައިވާ ގޮތުގައި އޭނާ ޕާސްޕޯޓް ހިފެހެއްޓީ ވޭލް ސަބްމެރިންގެ ޕެންޝަނާ ގުޅޭ މައްސަލައެއްގައެވެ.
ގާނޫނުއަސާސީގައި ބުނެފައިވާ ގޮތުން ސާބިތު ދަރަންޏެއް އޮތް މީހަކު ނަމަ، އެ ދަރަނި ހަލާސްނުކޮށް ހުރި މީހަކު ކަމުގައި ވާނަމަ، ރިޔަސީ އިންތިހާބުގައި ވާދައެއް ނުކުރެވޭނެއެވެ. ނަމަވެސް ބައެއް ވަކީލުން ވިދާޅުވެފައި ވަނީ އުމަރު ނަސީރަށް އިންތިހާބުގައި ވާދަ ކުރެއްވުމަށް ގާނޫނީ ގޮތުން އެއްވެސް ހުރަހެއް ނެތް ކަމަށެވެ.
އުމަރު ވިދާޅުވެފައި ވަނީ އިންތިޚާބަށް ކުރިމަތިލެއްވުމަށްޓަކައި ވިޔަފާރިތަކުގެ ހިއްސާ ދޫކޮށްލައްވާފައިވާ ކަމަށެވެ. އެހެންކަމުން މި ވަގުތު އޭނާގެ ހިއްސާ އޮތް އެއްވެސް ވިޔަފާރިއެއް ނޯންނާނެ ކަމަށް ވެސް އުމަރު ވިދާޅުވެފައި ވެއެވެ.
ރާއްޖޭގައި ފުރަތަމަ ފަހަރަށް ޕާޓީތައް ވާދަކުރާ ގޮތަށް 2008 ވަނަ އަހަރު ބޭއްވި ރިޔާސީ އިންތިޚާބުގައި އުމަރަށް ލިބިފައި ވަނީ 2472 ވޯޓެވެ.
