އެމްޑީޕީގެ ފުރަތަމަ ޖަގަހަ ތ. އަތޮޅު ގުރައިދޫގައި ކޯލިޝަން ކެނޑިޑޭޓް އިބްރާހިމް މުހައްމަދު ސޯލިހު (އިބޫ) ހުޅުވާދެއްވާއިފިއެވެ.
އާބާދީގައި ގާތްގަނޑަކަށް 2800 އެއްހާ މީހުން ދިރިއުޅޭ ގުރައިދޫ އަކީ ރައީސް ޔާމީންނަން ބޮޑު ތާއިދެއް އޮންނަ ރަށެކެވެ. ވޭދެވެދިޔަ އިންތިހާބުތަކުގައި އެމްޑީޕީ އިދިކޮޅު ޕާޓީއެއްގެ ގޮތުގައި މަސައްކަތް ކުރި އިރު، އެ ރަށުގައި އެމްޑީޕީގެ ޖަގަހައެއް ނުހުރެއެވެ. އެހެންމަވެސް ގުޅިފައިވާ ޕާޓީތަކުން އެއް ކެނޑިޑޭޓެއް ނެރެ ރައީސް ޔާމީންގެ ސަރުކާރު ބަލިކުރަން މަސައްކަތް ފެށުމުގެ ނަތީޖާއަކަށް ވެގެން ދިޔައީ އެރަށުގައި ގިނަ ރައްޔިތުންތަކެއް ރައީސް ޔާމީންގެ ސަރުކާރާއި ދެކޮޅަށް ފާޅުގައި ނުކުންނަން ލިބުނު ހިތްވަރަކަށެވެ. އެގޮތުން އިބޫ ތ އަތޮޅާއި ލ އަތޮޅަށް ފައްޓަވާފައިވާ ކެމްޕެއިން ދަތުރުފުޅުގެ ތެރެއިން އެ އަތޮޅު ގުރައިދޫއަށް ވަޑައިގެން އެ ރަށުގައި އެމްޑީޕީގެ ފުރަތަމަ ޖަގަހަ ހުޅުއްވައިދެއްވީ އާދީއްތަ ދުވަހުއެވެ.
ޖަގަހަ ހުޅުވުވާދެއްވުމަށް ފަހު އިބޫ ވާހަކަފުޅު ދައްކަވަމުން ވިދާޅުވީ ގުރައިދޫ ބަދަލުވެއްޖެ ކަމަށެވެ. އެރަށުގެ ރައްޔިތުން ވެސް ތިބީ އަނިޔާވެރިކަމާއި ކޮރަޕްޝަނާއި ދެކޮޅަށް ރައީސް ޔާމީންނަން ނޫނެކޭ ބުންނަން ކަމަށެވެ. ގުރައިދޫ އަކީ ރައީސް ޔާމީނަން ބޮޑު ތާއިދެއް އޮންނަ ރަށެއްކަން ފާހަގަކުރައްވަމުން އިބޫ ވިދާޅުވީ ނިމިދިޔަ ރިޔާސީ އިންތިހާބުގައި އެރަށުން ރައީސް ޔާމީނަން 93 ޕަސެންޓް ލިބި ވަޑައިގެންނެވި ކަމަށެވެ. އަދި ނިމިދިޔަ ރައްޔިތުންގެ މަޖިލީހުގެ އިންތިހާބުގައި ޕީޕީއެމްގެ މެމްބަރު ހުސެއިން މަނިކު ދޮންމަނިކު އަށް 69 ޕަސެންޓް އެރަށުން ލިބު ކަމަށް އިބޫ ވިދާޅުވިއެވެ.
"މިއަދު މިރަށުގެ ރައްޔިތުން މި ދެއްކި މިސާލަކީ މި ރަށުގެ ރައްޔިތުން ވެސް މި ތިބީ އަނިޔާވެރިކަމާއި ދެކޮޅަށް ކަން، ވައްކަމާއި ކޮރަޕްޝަނާއި ދެކޮޅަށްކަން، އަޅުގަނޑުމެން ބޭނުން ވަނީ ރާއްޖެއަށް އިންސާފު ހޯދަދޭން ކަން، އަޅުގަނޑުމެން ބޭނުމީ ރާއްޖޭގައި ފެތުރިފައިވާ ވައްކަމާއި ކޮރަޕްޝަން ނަންތާލަންކަން" އިބޫ ވިދާޅުވިއެވެ.
އެމްޑީޕީ ހަރުގޭގައި ވާހަކަ ދައްކަވަމުން އެޕާޓީގެ ނައިބް ރައީސް މުހައްމަދު ޝިފާޒު ވިދާޅުވީ ކެމްޕެއިން ހަރަކާތްތަކުގެ ތެރެއިން ދެ ފަހަރު ގުރައިދޫ ވަޑައިގެންނެވިކަމަށެވެ. ނިމިދިޔަ ލޯކަލް ކައުންސިލް އިންތިހާބުގެ ކެމްޕެއިން ތެރެއިން އެ އަރަށައް ވަޑައިގެންނެވިކަން ފާހަގަކުރައްވަމުން ޝިފާޒު ވިދާޅުވީ މިއަދު ގުރައިދޫން ފެންނަ މަންޒަރު "އުޑާ ބިމާހާ ތަފާތު" ކަމަށެވެ.
"މިކަމުން އަޅުގަނޑުމެންނަން މި އަންގަދެނީ ގުރައިދޫގެ ތި ހިތްވަރުގަދަ ރައްޔިތުން އަޅުގަނޑުމެންގެ ކެނޑިޑޭޓް އޮނަރަބަލް އިބްރާހިމް މުހައްމަދު ސޯލިހު، މި އިންތިހާބު ކާމިޔާބުކޮށްފިކަން ތިބޭފުޅުން ހާމަކޮށްދީފި" ގިނަ އަދަދެއްގެ ރައްޔިތުން ބައިވެރި ޖަގަހަ ހުޅުވުމުގެ ރަސްމިޔާތުގައި ވާހަކަ ދައްކަވަމުން ޝިފާޒު ވިދާޅުވިއެވެ.
ޖަގަހަ ހުޅުވުމަށް ފަހު، އަލަށް އެމްޑީޕީއަށް ގުރައިދޫ އާންމުންގެ ބަޔަކު ވަނީ ގުޅިފައެވެ. އެ މީހުންގެ މެމްބަރ ޝިޕް ފޯމާއި ހަވާލުވެޑައިގެންނެވީ އިބޫއެވެ. ގުރައިދޫއަށް އިބޫ ވަޑައިގެންނެވުމުން އެރަށުގެ ރައްޔިތުން ހޫނު މަރުހަބާއެއް ދަންނަވާފައިވާއިރު، ބަނދަރު މަތީގައި ގުޅިފައިވާ ޕާޓީތަކުގެ ދިދަ ފަތިތަކަށް ވަނީ ދަމާފައެވެ.
