ފާޑުކިޔުން އަމާޒުވުމުން ރިޝްވަތުގެ ކުށް ހިމެނުމަށް ބިލު އަނބުރާ ކޮމެޓީއަށް ފޮނުވާލައިފި
1 އޯގަސްޓު 2018 | ބުދަ 09:25އަނބުރާ ފޮނުވާލީ ޕީޕީއެމް މެމްބަރުންގެ ވޯޓުން
ރައްޔިތުންގެ މަޖިލީހުގެ ޖަލްސާއެއްގެ ތެރެއިން | ޕީޕަލް މެގަޒިން
ރިޝްވަތުގެ ކުށް އުވާލެވޭ ގޮތަށް ގާނޫނުލް އުގޫބާތު ބަދަލުކުރަން ޕީޕީއެމުން ހުށަހެޅުމާއެކު އަމާޒުވި ފާޑުކިޔުންތަކާ ގުޅިގެން، އަލަށް ހުށަހެޅި ބިލުގައިވާ ބައިތައް ހިމަނައިގެން ބިލު ދިރާސާ ކުރަން ކޮމެޓީއަށް ފޮނުވައިފިއެވެ.
ފޭދޫ ދާއިރާގެ މެމްބަރު އިބްރާހިމް ދީދީ ގާނޫނުލް އުގޫބާތަށް މިދިޔަ މަހު ހުށަހެޅުއްވި ބިލުގައި ބުނެފައިވާ ގޮތުން ގާނޫނުލް އުގޫބާތުގައިވާ ރިޝްވަތުގެ ކުށް އުވޭނެއެވެ. އެ މައްސަލަ ފެންމަތިވުމާ އެކު، ސަރުކާރަށް އަމާޒުވި ފާޑުކިޔުންތަކާ ގުޅިގެން ފޮނަދޫ ދާއިރާގެ މެމްބަރު އަބްދުއްރަހީމް އަބްދުﷲ (އަދުރޭ) ވަނީ ރިޝްވަތުގެ ކުށް އަލުން ހިމަނާ ގޮތަށް ބިލެއް އަންގާރަ ދުވަހު ހުށަހަޅުއްވައިފަ އެވެ. އަދުރޭ ހުށަހެޅި އެ ބިލުގެ މަރުހަލާތައް މަޖިލީހުގެ ތެރެއިން އަވަސް ކުރުމަށްފަހު، ވަނީ ގައުމީ ސަލާމަތު ކޮމެޓީއަށް ފޮނުވާފައެވެ.
އިބްރާހިމް ދީދީ ހުށަހެޅުއްވި ބިލު ދިރާސާ ކުރުމަށްފަހު، ގައުމީ ސަލާމަތު ކޮމެޓީން ހުށަހެޅި ރިޕޯޓު ބުދަ ދުވަހުގެ ޖަލްސާއަށް ހުށަހެޅުމުން، މަޖިލީހުން ފާސްކޮށްފައި ވަނީ އެ ބިލު އަނބުރާ ކޮމެޓީއަށް ފޮނުވާލުމަށެވެ. ކޮމެޓީއަށް އެ ބިލު އަނބުރާ ފޮނުވާލުމަށް ފާސްކޮށްފައި ވަނީ 26 މެމްބަރުންގެ ވޯޓުންނެވެ.
އެ ބިލު އަނބުރާ ކޮމެޓީއަށް ފޮނުވާލުމަށް ވޯޓަށް އެހުމުގެ ކުރިން ރިޔާސަތުގައި އިންނެވި، މަޖިލީހުގެ ރައީސް އަބްދުﷲ މަސީހު މުހައްމަދު ވިދާޅުވީ އިބްރާހިމް ދީދީ އާއި އަބްދުއްރަހީމް ހުށަހެޅުއްވި ދެ ބިލު އެކުއެކީގައި ކޮމެޓީގައި ދިރާސާ ކުރުމަކީ ބޭނުންތެރި ކަމެއް ކަމަށެވެ.
ރިޝްވަތުގެ ކުށް އުވާލެވޭ ގޮތަށް ބިލު ފަރުވާމާކޮށްފައި ނުވާނެ ކަމަށް، ޕީޕީއެމް ޕާލަމެންޓްރީ ގްރޫޕުގެ ލީޑަރު އަހުމަދު ނިހާން ހުސައިން މަނިކު ބުދަ ދުވަހުގެ ޖަލްސާގައި ވަނީ ތަކުރާރު ކުރައްވާފައެވެ. ނަމަވެސް އެ ބިލުގައި ރިޝްވަތުގެ ކުށް އުވާލަން ހުށަހަޅާފައި ނުވާނަމަ، އެ ބިލު މަޖިލީހުން ފާސްނުކޮށް، އަނބުރާ ކޮމެޓީއަށް ފޮނުވައި، އަބްދުއްރަހީމް ހުށަހެޅުއްވި ބިލުގެ ބައިތައް އެ ބިލުގައި ހިމަނަން އުޅުމުން، ނިހާން ހެއްދެވީ އިތުރުފުޅުކަން ވަނީ ހާމަވެގެން ގޮސްފައެވެ.
ރާއްޖެޓީވީއަށް އެނގިފައިވާ ގޮތުގައި ރިޝްވަތުގެ ކުށް އުވާލެވޭ ގޮތަށް ސަރުކާރުން ހުށަހެޅި ބިލު ކޮމެޓީން ދިރާސާކޮށް، މަޖިލީހުގެ ތަޅުމަށް ހުށަހަޅާފައި ވަނިކޮށް އެ ބިލުގެ މައްސަލާގައި އަމާޒުވި ފާޑުކިޔުންތަކާ ގުޅިގެން ބަންޑާރަ ނައިބު މުހައްމަދު އަނިލް ވަނީ އަންގާރަ ދުވަހު ޕީޕީއެމް ޕީޖީ ގްރޫޕާ ބައްދަލު ކުރައްވާފައެވެ. އެ ބައްދަލުވުމަށްފަހު، ރިޝްވަތުގެ ކުށް އަލުން ހިމަނައިގެން ގާނޫނުލް އުގޫބާތަށް އިސްލާހެއް ގެނައުމަށް ބަންޑާރަ ނައިބުގެ އޮފީހުން ތައްޔާރު ކުރި ބިލު އަބްދުއްރަހީމްގެ ނަމުގައި ހުށަހެޅުމަށް ނިންމިކަން ވެސް އެނގިފައިވެއެވެ. އަދި އަބްދުއްރަހީމްގެ ނަމުގައި އެ ބިލު މަޖިލީހަށް ހުށަހެޅީ މިދިޔަ އަންގާރަ ދުވަހުގެ މެންދުރުފަހުއެވެ.
