ރައްޔިތުންގެ މަޖިލީހަށް މާލެއިން ދެ ދާއިރާ އިތުރުވަނީ
މަޖިލީހުގެ މެންބަރުންގެ އަދަދު 85 އިން 87 އަށް އިތުރުވާނެ
ރައްޔިތުންގެ މަޖިލިސް: މާލެއަށް ދެމެންބަރުން އިތުރުވާނެ
އަންނަ އަހަރު ބާއްވާ ރައްޔިތުންގެ މަޖިލީހުގެ އިންތިޚާބުގައި މާލެއިން އިންތިޚާބު ކުރަންޖެހޭ މެމްބަރުންގެ އަދަދު އިތުރުވެ، މަޖިލިސް މެމްބަރުންގެ ޖުމްލަ އަދަދު 87 އަށް އިތުރުވާނެ ކަމަށް އިލެކްޝަންސް ކޮމިޝަނުން ބުނެފިއެވެ.
އެކޮމިޝަނުން މިހެން ބުނީ އެކޮމިޝަނުން އަންގާރަ ދުވަހު ޢާއްމުކުރި ރައްޔިތުންގެ މަޖިލީހުގެ 2019 ވަނަ އަހަރުގެ އިންތިޚާބީ ދާއިރާތަކުގެ އާބާދީ ކަނޑައެޅިފައިވާ ގޮތުގެ ވަގުތީ ރިޕޯޓުގައެވެ.
މަޖިލީހުގައި މިހާރު ތިބެނީ ޖުމްލަ 85 މެމްބަރުންނެވެ. އެއީ މަޖިލީހުގެ އިންތިޚާބީ ދާއިރާތައް ކަނޑައެޅުމާ ބެހޭ ގާނޫނުގައިވާ ގޮތަށް، އާބާދީގެ ފުރަތަމަ 5،000 މީހަކަށް ނުވަތަ އެ އަދަދަށް އާބާދީ ހަމަނުވާ ނަމަ ދާއިރާތަކަށް ދެ މެމްބަރަކު އިންތިޚާބުކުރާ އުސޫލުންނެވެ. އަދި 5،000 އަށް ވުރެ އާބާދީ އިތުރުވާ ނަމަ، އިތުރުވާ ކޮންމެ 5،000 މީހަކަށް އިތުރު މެމްބަރަކު އިންތިޚާބުކުރާ އުސޫލުންނެވެ.
އަންނަ އަހަރުގެ މަޖިލިސް އިންތިޚާބުގެ އިންތިޚާބީ ދާއިރާތައް ކަނޑައަޅާފައިވާ ވަގުތީ ރިޕޯޓް އިލެކްޝަންސް ކޮމިޝަނުން އާންމު ކޮށްފައިވާއިރު، އެ ރިޕޯޓުގައިވާ ގޮތުން އަންނަ އަހަރުގެ މަޖިލިސް އިންތިޚާބުގައި ގޮނޑިތައް އިތުރުވާނީ މާލެއިންނެވެ. މާލެއިން މިހާރު މަޖިލީހަށް އިންތިޚާބު ކުރަނީ 13 މެމްބަރުން ކަމަށް ވިޔަސް، މާލޭގެ އާބާދީއަށް ބަލައި، އަންނަ އަހަރުގެ އިންތިޚާބުގައި 15 މެމްބަރުން މާލެއިން އިންތިޚާބު ކުރަންޖެހޭނެ ކަމަށް އެ ރިޕޯޓްގައި ވެއެވެ.
އެންމެ ފަހުން 2014 ގައި މަޖިލިސް އިންތިޚާބު ބޭއްވިއިރު މާލޭގެ އާބާދީ އޮތީ 63،000 ގައި ކަމަށް ވިޔަސް، މިހާރު ވަނީ 70.900 އަށް އަރައިފައެވެ. އަދި ވޭތުވެދިޔަ ހަ މަސް ދުވަހު ވެސް މާލޭގެ އާބާދީ އިތުރުވަމުން އަންނަކަން ވެސް އިލެކްޝަންސް ކޮމިޝަންގެ އެ ރިޕޯޓުގައިވެއެވެ.
މާލޭއިން އިންތިޚާބުކުރަން ޖެހޭ މެމްބަރުންގެ އަދަދު އިތުރުވިޔަސް، އެ ރިޕޯޓުގައިވާ ގޮތުން އެހެން ދާއިރާތަކުން އިންތިޚާބު ކުރަންޖެހޭ މެމްބަރުންގެ އަދަދަށް އެއްވެސް ބަދަލެއް އަދި ނާދެއެވެ. އެކަމަކު މިއީ ވަގުތީ ރިޕޯޓެއް ކަމަށް ވާތީ އިންތިޚާބީ ދާއިރާތަކަށް ބަދަލު އައުމުގެ ފުރުސަތު އަދިވެސް އެބައޮތެވެ. ފައިނަލް ރިޕޯޓް ނެރެން ޖެހޭނީ މިހާރު ހިނގަމުންދާ މަޖިލީހުގެ ދައުރު ހަމަވުމުގެ 150 ދުވަސް ކުރިންނެވެ.
އިންތިޚާބީ ދާއިރާ ކަނޑައެޅުމުގެ ގާނޫނުގައިވާ ގޮތުން، އިލެކްޝަންސް ކޮމިޝަންގެ ވަގުތީ ރިޕޯޓާ މެދު ޝަކުވާ އުފުލުމުގެ ފުރުސަތު އަންގާރަ ދުވަހުން ފެށިގެން 21 ދުވަސް ވަންދެން ޕާޓީތަކަށާއި ވަކިވަކި ފަރުދުންނަށް ވެސް އޮންނާނެއެވެ. އަދި އެ ޝަކުވާތަކާ މެދު އިލެކްޝަންސް ކޮމިޝަނުން ނިންމާ ނިންމުމާ މެދު ހިތްހަމަނުޖެހޭ ނަމަ އެ މައްސަލައެއް ހައި ކޯޓުގައި އިސްތިއުނާފް ކުރުމުގެ ފުރުސަތު ވެސް އޮންނާނެއެވެ.
