ފުރަތަމަ ބީޓެކް ހޮސްޕިޓަރލިޓީ ލެބް އިފްތިތާހުކޮށްފި
ލެބް އިފްތިތާހުކޮށްފައިވަނީ ބ. ދަރަވަންދޫގައި
ފުރަތަމަ ބީޓެކް ހޮސްޕިޓަރލިޓީ ލެބް އިފްތިތާހުކުރުުމުގެ ތެރެއިން
ރާއްޖޭގެ ސްކޫލެއްގައި ގާއިމްކުރެވުނު އެންމެ ފުރަތަމަ ބީޓެކް ހޮސްޕިޓަރލިޓީ ލެބް ބ. ދަރަވަންދޫގައި އިފްތިތާހުކޮށްފިއެވެ.
ބ އަތޮޅު މަދަރުސާގައި ބޭއްވި ޚާއްސަ ރަސްމިއްޔާތުގައި ލެބް އިފްތިތާހު ކޮށްދެއްވީ މިނިސްޓްރީ އޮފް އެޑިއުކޭޝަންގެ ބީޓެކް ކޯޑިނޭޓަރ ޒޫޝާން ކަމާލުއްދީން އާއި ލެބް ހެދުމަށް ފައިސާގެ ގޮތުން އެންމެ ބޮޑު އެހީތެރިކަމެއް ދެއްވި ދުސިތް ތާނީ މޯލްޑިވްސްގެ ޖެނެރަލް މެނޭޖަރ މިސްޓަރ ރެއިނޯލްޑް ޖޮހާންއެވެ.
ޒޫޝާން ކަމާލުއްދީން ވިދާޅުވީ ބ އަތޮޅު ސްކޫލުގައި މިފެށި ޕްރޮޖެކްޓަކީ ރާއްޖޭގެ އެހެން ސްކޫލްތަކުންވެސް ނަމޫނާއަކަށް ބަލައިގަންނަން ޖެހޭފަދަ އަގުހުރި މަސައްކަތެއް ކަމުގައެވެ. ބީޓެކަކީ ކިޔެވުމަށް ދަށް ކުދިން ބައިވެރިވާ މާއްދާއެއް ކަމަށް ދެކެވެމުންއައި ދެކެވުން މިހާރު ބަދަލުވެފައިވާ ކަމަށާއި، ބީޓެކް ދަރިވަރުން މިހާރު ހޯދަމުންދާ ކާމިޔާބީ މިކަމުގެ ހެއްކަކަށް ފުދޭ ކަމަށް އޭނާ ވިދާޅުވިއެވެ.
ބީޓެކް ލެބް ހެދިފައިވަނީ ރިސޯޓްތަކުގެ ޑިޕާޓްމަންޓްތައް ފެންނަ ފަދަ ގޮތަކަށް، އަދި އެ ތަނުގައި ކްލާސްތައް ވެސް ނަގައި ދެވޭނެ ގޮތަކަށެވެ.
ދުސިތް ތާނީ މޯލްޑިވްސް އިން ލެބް ހުޅުވުމަށްޓަކައި ފަންޑުގެ ގޮތުގައި 5700 ޑޮލަރު ވަނީ ދީފަ އެވެ. އަދި އެ ތަނަށް ބޭނުންވާ ގިނަ ސާމާނު ވަނީ ހޯދައިދީފައެވެ.
ރަސްމިއްޔާތުގައި ވާހަކަފުޅު ދައްކަވަމުން ބ އަތޮޅު މަދަރުސާގެ ޕްރިންސިޕަލް މުހައްމަދު ނާސިހް ވަނީ މި ލެބް ގާއިމް ކުރުމަށް އެހީތެރިވެދެއްވި ހުރިހާ ފަރާތްތަކަށް ޝުކުރު ދަންނަވާފައެވެ. އަދި މިފަދަ ކުރިއެރުންތައް މުސްތަގުބަލުގައިވެސް ހޯދުމުގެ ޢަޒުމުގައި ތިބިކަން އޭނާ ފާހަގަކުރެއްވިއެވެ.
ލެބަށް ބޭނުންވާ އޭސީ އަދި ކޮމްޕިއުޓަރ ސިސްޓަމްސް މިނިސްޓްރީ އޮފް އެޑިއުކޭޝަނުން ދީފައިވާއިރު އެތަން ހެދުމުގައި އިތުރު އެހެނިހެން ޚަރަދުތައް ކޮށްފައިވަނީ ސްކޫލުގެ ޕީ.ޓީ.އޭ އާއި ހެޔޮއެދޭ ފަރާތްތަކުންނެވެ.
