އިންތިހާބުގައި މަކަރު ހެދުމަށް ގެންގުޅޭ އަތްބައި ބަލައިފިން: ނިޔާޒު
މަކަރު ހެދުމުގެ ޖާގައެއް ނުދޭނަން
އެމްޑީޕީގެ ޗެއަރޕާސަންގެ ނާއިބު އަލީ ނިޔާޒު
ކުރިއަށް އޮތް ރިޔަސީ އިންތިހާބުގައި ރައީސް ޔާމީންގެ ސަރުކާރުން މަކަރު ހެދުމަން ގެންގުޅޭ އަތްބައި ގުޅިފައިވާ ސިޔަސީ ޕާޓީތަކުން ބަލައިފި ކަމަށާއި މަކަރު ހެދުމުގެ ގޮތުން އެއްވެސް ކުޅިއެއް ކުޅުމުގެ ފުރުސަތު ނުދޭނެ ކަމަށް އެމްޑީޕީގެ ޗެއަރޕާސަންގެ ނާއިބު އަލީ ނިޔާޒު ވިދާޅުވެއްޖެއެވެ.
އާދީއްތަ ދުވަހު ސޯލްޓު ކެފޭގައި ބޭއްވި ނޫސްވެރިންގެ ބައްދަލުވުމުގައި ވާހަކަ ދައްކަވަމުން ނިޔާޒު ވިދާޅުވީ ރިސޯޓުތަކުގެ މުވައްޒަފުންނާއި ހާއްސަ އެހީއަށް ބޭނުންވާ މީހުން ވޯޓުލުމުގެ ޙައްގުން މަޙްރޫމްކޮށް، ވޯޓުން މަކަރު ހެދުމަށް ރައީސް ޔާމީންގެ ސަރުކާރުން ހިސާބުޖަހައިގެން މަސައްކަތް ކުރި ކަމަށެވެ. އެހެންނަމަ ވެސް ގުޅިފައިވާ ސިޔާސީ ޕާޓީތަކުގެ މަސައްކަތުން އެކަންކަން ރައްޔިތުން ބޭނުންވާ ގޮތަށް ހައްލުކޮށްފައިވާ ކަމަށާއި، ރައީސް ޔާމީނަށް މި އިންތިހާބުގައި މަކަރު ހެދުމުގެ ޖާގައެއް ނުދޭނެ ކަމަށް ނިޔާޒު ވިދާޅުވިއެވެ.
"އަޅުގަނޑުމެންނަން ރައީސް ޔާމީން މަކަރު ހަދާ އުކުޅުތައް އެބަ އިނގޭ، އަޅުގަނޑުމެން އެ އަތްބައި ބަލައިފިން އިނގޭތޯ، އޭގައި ހުރި އެއްބައި މިއީ ނުބައި ތަންތަނަން ރަޖިސްޓްރީ ކުރުވުން، އޭގެ އެއްބައި މިއީ ހާއްސަ އެހީއަށް ބޭނުންވާ މީހުންނަން ވޯޓު ނުލެވޭގޮތަށް ހެދުން، އޭގެ އެއްބައި މިއީ ރިސޯޓުތަކުގައި ވޯޓުލުން މަދުކުރުން މިއީ، އެހެންވީމަ އޭގަ ހުރި އެއްވެސް ކުޅިއެއް އިރާދަ ކުރެއްވިއްޔާ ކުޅުނަކަ އަޅުގަނޑުމެން ނުދޭނަން،" ނޫސްވެރިންގެ ބައްދަލުވުމުގައި ވާހަކަ ދައްކަވަމުން ނިޔާޒު ވިދާޅުވިއެވެ.
ނިޔާޒު ވިދާޅުވީ ރީރަޖިސްޓްރީ ކުރުމަށް އެއްވެސް ޝައްކެއް އުފެދިއްޖެ ކަމުގައިވާނަމަ ދެވަނަ ފަހަރަށް ގޮސް ފޯމު ހުށަހެޅުމުގެ ފުރުސަތު އެބަ އޮތް ކަމަށް އިލެކްޝަންސް ކޮމިޝަނުން ބުނެފައިވާ ކަމަށާއި، އެހެންކަމުން ސަރުކާރުގެ އެއްވެސް މުއައްސަސާއަކުން ނުވަތަ ކުންފުންޏަކުން މަޖުބޫރުކޮށްގެން ފޯމެއްގައި ސޮއިކުރެވިފައިވާ ނަމަ ގުޅިފައިވާ ސިޔާސީ ޕާޓީތަކުގެ ޖަގަހަތަކަށް ވަޑައިގެން އަލުން ރީ ރަޖިސްޓަރ ކުރުމަށް ގޮވާލާކަމަށެވެ.
"ސްޓެލްކޯގައި އެ މަސައްކަތް ހިނގާ، އެއާޕޯޓް އޮތޯރިޓީގައި އެކަން ހިނގާ، އެސްޓީއޯގައި އެކަން ހިނގާ، ހިންގާ ގޮތަކީ އެތަނުގެ އެޗްއާރު ޑިޕާޓުމެންޓުން އެތަނުގައި ތިބޭ ހުރިހާ މުވައްޒިފުންގެ ނަމުގައި ފޯމްތަށް ހަދައިގެން ގެނެސް، އެމީހުންނަން މަޖުބޫރުކުރުވަނީ،" ނިޔާޒު ވިދާޅުވިއެވެ.
ނޫސްވެރިންގެ ބައްދަލުވުމުގައި ވާހަކަ ދައްކަވުން ޖުމްހޫރީ ޕާޓީގެ ނާއިބު ލިޑަރ ޑރ. ހުސެއިން ރަޝީދު ވިދާޅުވީ ރައީސް ޔާމީންގެ ސަރުކާރުން މަސައްކަތް ކުރަނީ ގާތްގަނޑަކަށް 40 ހާސް ރައްޔިތުން ވޯޓުލުމުން މަހްރޫމްކުރުމަށް ކަމަށެވެ. ދިވެހި ކޮންމެ ރައްޔިތަކީ ގާނޫނު އަސާސީން ވޯޓުލުމުގެ ޙައްގު ކަށަވަރުކޮށްދީފައިވާ މީހެއް ކަމަށާއި ރައީސް ޔާމީނުގެ ސަރުކަރުގެ ކުރިމަތީގައި ސަރުކާރުގެ އެއްވެސް މުވައްޒަފަކު ކުޑަކަކޫ ޖަހަން ނުޖެހޭ ކަމަށް ހުސެއިން ވިދާޅުވިއެވެ.
މީގެ އިތުރުން ވެސް އިލްކެޝަންސް ކޮމިޝަނުން އިންތިހާބުގެ ކަންކަމާއި ގުޅޭގޮތުން އަމަލު ކުރަމުންދާ ގޮތާއި ގުޅޭގޮތުން ގުޅިފައިވާ ޕާޓީތަކުން ވަނީ ކަންބޮޑުވުން ފާޅުކޮށްފައެވެ.
