ގައްދޫ ދާއިރާގެ ރައްޔިތުންނާ ފައިސަލް ބައްދަލުކުރައްވައިފި

ގުޅިފައިވާ ސިޔާސީ ޕާޓީތަކުގެ ފަރާތުން އިންތިހާބުގައި ވާދަކުރައްވާ އެމްޑީޕީގެ ކެނޑީޑޭޑް އިބްރާހިމް މުހައްމަދު ސޯލިހު (އިބޫ)ގެ ރަނިންގ މޭޓް, ކާށިދޫ ދާއިރާގެ މަޖިލީސް މެމްބަރު ފައިސަލް ނަސީމް މާލޭގައި ދިރިއުޅޭ ގައްދޫ ދާއިރާގެ ރައްޔިތުންނާ ބައްދަލުކުރައްވާއިފިއެވެ.

ހޮނިހިރު ދުވަހުގެ ރޭ މ. ކުނޫޒްގައި ކުރިއަށް ދިޔަ މި ބައްދަލުވުމުގައި މައިގަނޑު ގޮތެއްގައި މަޝްވަރާކޮށްފައި ވަނީ ގައްދޫ ދާއިރާގެ ކެމްޕެއިން ހަރަކާތްތަށް ކުރިއަށް ގެންދާނެ ގޮތާ ގުޅޭ ގޮތުންނެވެ. ގައްދޫ ދާއިރާގައި ކެމްޕެއިންގެ ހަރަކާތްތައް ވަރުގަދަކުރުމަށް ބޭއްވި މި ބައްދަލުވުމުގައި ރައްޔިތުންގެ މަޖިލީހުގެ މަޑުއްވަރީ ދާއިރާގެ މެމްބަރު މުހައްމަދު އަމީތާއި، އެމްޑީޕީ ސަރުކާރުގެ ހައުސިންގ މިނިސްޓރު މުހައްމަދު އަސްލަމްގެ އިތުރުން ޖުމްހޫރީ ޕާޓީގެ ކައުންސިލްގެ ބައެއް މެމްބަރުން ބައިވެރިވަޑައިގެންނެވިއެވެ.

ގައްދޫ ދާއިރާގެ ރައްޔިތުންނާއި ފައިސަލް ބައްދަލުކުރައްވަނީ

މި ބައްދަލުވުމުގައި ގައްދޫ ދާއިރާގެ ގިނަ އަދަދެއްގެ ރައްޔިތުން ބައިވެރިކަން ފާހަގަކޮށްލެއެވެ. ރަނިންގ މޭޓް ކަމަށް ފައިސަލް ކަނޑައެޅި ފަހުން އެމަނިކުފާނު ދަނީ ކޮންމެ ދުވަހަކު ވެސް އެކި ދާއިރާތަކުގެ ރައްޔިތުންނާ ބައްދަލުކުރައްވަމުނެވެ. އެގޮތުން ނިމިދިޔަ ހަފްތާގެ ތެރޭގައި ފައިސަލް ވަނީ މާލޭގައި ދިރިއުޅޭ ފުވައްމުލަކުގެ ރައްޔިތުންނާ ބައްދަލުކުރައްވާފައެވެ.