ހެލިކޮޕްޓަރުތައް ގެންދަން އެންގުމަށް ފަހު އިންޑިއާގެ އެހީގައި ކޯސްޓްގާޑް އުޅަނދެއް މަރާމާތުކުރުމަށް ފޮނުވައިފި!

ދިވެހި ސިފައިން ބޭނުންކުރުމަށް އިންޑިއާ އިން ދީފައިވާ ދެ ހެލިކޮޕްޓަރު އަނބުރާ ގެންދަން ދިވެހި ސަރުކާރުން އިންޑިއާ ސަރުކާރަށް އަންގާފައިވަނިކޮށް، ކޯސްޓްގާޑުގެ އުޅަނދެއް މަރާމާތުކުރުމަށް އިންޑިއާއަށް ފޮނުވައިފިއެވެ.

އެމްއެންޑީއެފް 'ކޯސްޓްގާޑް ޝިޕް ހުރަވީ' ވަނީ މަރާމާތުކުރުމަށް މިމަހުގެ 6 ވަނަ ދުވަހު ވިޝާކާޕަތުނަމަށް ގެންގޮސްފައެވެ. އިންޑިއާ ސަރުކާރުގެ ކިބައިން 'ހުރަވީ' މަރާމާތުކޮށްދިނުމަށް ދިވެހި ސަރުކާރުން އެދުމާ ގުޅިގެން އިންޑިއާ އިން ހިލޭ މިމަރާމާތުކޮށްދޭއިރު، މަރާމާތުތަކުގެ އަސްލު އަގު 10 ވަރަކަށް މިލިއަން ޑޮލަރަށް އަރާނެ ކަމަށް ބެލެވެއެވެ. ވިޝާކާޕަތުނަމްއަކީ އިންޑިއާގެ އީސްޓަރން ނޭވަލް ކޮމާންޑްގެ މައި ބަނދަރެވެ.

'ހުރަވީ' ވަނީ 2015 ވަނަ އަހަރުގެ މާރޗް މަހުގެ ފަހުކޮޅުވެސް މަރާމާތަށް ވިޝާކާޕަތުނަމަށް ގެންގޮސްފައެވެ. އަދި އަަހަރެއްހާ ދުވަހު މަރާމާތުގެ މަސައްކަތްކުރުމަށް ފަހު އަނބުރާ ރާއްޖެ ގެނެސްފައި ވަނީ 2016 ވަނަ އަހަރުގެ ފެބްރުއަރީ މަސް ނިމެމުން ދަނިކޮށެވެ.

'ހުރަވީ'އަކީ އިންޑިއާގެ ކޮލްކައްތާގައި ބަނދެފައިވާ ކަނޑުމަތީގެ އަސްކަރީ ހަރަކާތްތަކަށާއި މީހުން ސަލާމަތްކުރުމުގެ މަސައްކަތަށް ޚާއްސަ އުޅަނދެކެވެ.

އިންޑިއާގެ އެހީގައި ކޯސްޓްގާޑް އުޅަނދެއް މަރާމާރުތުކުރުމަށް ފޮނުވިއިރު، އެމްއެންޑީއެފް އިން ބޭނުންކުރާ އިންޑިއާގެ ދެ ހެލިކޮޕްޓަރު ފޮނުވާލަން މަސައްކަތް ފެށީ އިންޑިއާގެ ވާދަވެރި ޗައިނާ އިން ދިވެހި ސަރުކާރަށް ޕްރެޝަރ ބޮޑުކުރުމާ ގުޅިގެން ކަމަށް އިންޑިއާގެ ސިޔާސީ ބޭފުޅުން ގެންދަވަނީ ތުހުމަތުކުރައްވަމުންނެވެ. އެހެން ނަމަވެސް ދިވެހި ސަރުކާރުން ބުނީ ހެލިކޮޕްޓަރުތައް ގެންދަން އިންޑިއާ އަށް އެންގީ ހެލިކޮޕްޓަރެއްގެ ބަދަލުގައި ޑޭޝް-8 މަރުކާގެ މަތިންދާބޯޓެއް ހޯދުމަށް ރާއްޖެއިން ބޭނުންވާތީ ކަމަށެވެ. އެކަމަށް އިންޑިއާ އިން އެއްބަސްވެފައިވީ ނަމަވެސް އެކަމާ ބެހޭ ކަންކަން ވެސް ނުނިމި ވަނީ ދިވެހި ސަރުކަރުން ހަމަޖައްސަންޖެހޭ ކަންކަން ހަމަނުޖެހިގެންކަން އެނގިފައި ވެއެވެ.

އިންޑިއާ އާއި ރާއްޖޭގެ ގުޅުން އިންތިހާއަށް ގޯސްވެފައިވާއިރު، އިންޑިއާ އާއި ރާއްޖެއާ ދެމެދު އޮންނަ ޒަމާންވީ އަސްކަރީ ގުޅުމަކީ ޗައިނާ އިން އިންޑިއާ ކަނޑަށް އަތްގަދަކުރުމަށް ގެންގުޅޭ ސިޔާސަތަށް އެޅޭނެ ހުރަހަކަށްވާތީ، ޗައިނާ އިން ރާއްޖެއަށް ޕްރެޝަރކޮށްގެން ހެލިކޮޕްޓަރާ އެކު އައިސް ތިބި އިންޑިއާ ސިފައިން ރާއްޖެއިން ފޮނުވާލުމަށް މަސައްކަތްކުރަމުންދާ ކަމަށް އިންޑިއާގެ ސިޔާސީ ފަރާތްތަކުންނާއި ނޫސްވެރިން ދެކެއެވެ.