ދުނިޔޭގެ އެންމެ ވަރުގަދަ ހެކަތޯން، ރާއްޖޭގައި ފަށައިފި
ދިރާގުގެ އަމާޒަކީ ޒުވާނުންނާއެކު ގައުމު ކުރިއެރުވުން
ހަފްލާ ފައްޓަވައި ދެއްވަމުން ދިރާގުގެ ސީއީއޯ އިސްމާއިލް ރަޝީދު ބައިވެރިންނާއި މުޚާތަބްކޮށް ވާހަކަ ދައްވަނީ
ހޮނިހިރު ދުވަހު ހޮޓެލް ޖެންގައި "އޭންޖަލްހެކް" ހެކަތޯން ހަފްލާ ފައްޓަވައި ދެއްވަމުން ދިރާގުގެ ސީއީއޯ އިސްމާއިލް ރަޝީދު ވިދާޅުވީ ދިރާގުގެ އަމާޒަކީ ޒުވާނުންނާއެކު ގައުމު ކުރިއެރުވުން ކަމަށެވެ. ދިރާގަކީ ޒުވާނުންނާއި ގުޅޭ އެންމެހާ ކަންކަމުގައި ބައިވެރިވާ ކުންފުންޏެއް ކަމަށާއި ޒުވާނުން ބާރުވެރިކުރުވުމަކީ ދިރާގުގެ އެއް އަސާސް ކަމަށް ވެސް ރަޝީދު ވިދާޅުވިއެވެ.
އެގޮތުން ދިރާގާއި ސްޕާކްހަބް ގުޅިގެން ރާއްޖޭގައި ކުރިއަށް ގެންދާ އޭންޖަލްހެކްގެ ހަރަކާތުން ތަފާތު އަދި މުހިއްމު ތަޖްރިބާތައް އޭގެ ބައިވެރިންނަށް ކުރެވޭނެ ކަމުގެ ޔަގީންކަން އޭނާ ވަނީ ދެއްވާފައެވެ. މިއަދާއި މާދަމާ ކުރިއަށް ގެންދާ މިހަރަކާތުގައި ބައިވެރިންނަށް މަސައްކަތް ފުރިހަމަކުރުމަށް ސައުވީސް ގަޑިއިރު ލިބޭނެ ކަމަށާއި އެ ހެކަތޯނުން އެއްވަނަ އަށް ހޮވޭ އުފެއްދުން، އެމެރިކާގެ ސެންފްރެންސިސްކޯގެ ސިލިކޮންވެލީގައި ބާއްވާ ގްލޯބަލް ޑިމޯ ޑޭގައި ދައްކާލައި، ދުނިޔެ އަށް ތައާރަފް ކުރުމުގެ ފުރުސަތު ލިބިގެން ދާނެ ކަމަށް ރަޝީދު ވިދާޅުވިއެވެ.
ރާއްޖޭގެ ޑިވެލޮޕަރުންނާއި ކްރިއޭޓިވްސް އަދި ސްޓާޓަޕްތަކާއި، އެންޓަޕްރިނިއަރުންނަށް އަމާޒު ކޮށްގެން ހިންގާ ހަރަކާތަކީ އެ މީހުންގެ ހުނަރު ދައްކާލުމަށް ދުނިޔޭގަ ވެސް އެންމެ ވަރުގަނދަ އެއް ޕްލެޓްފޯމްކަމަށް ދިރާގުން ބުނެއެވެ.
ދުނިޔޭގެ އެންމެ ފުންނާބު އުސް ކޯޑަރުންނާއި، ހެކަރުން އަދި ސޮފްޓްވެއަރ ޑިވޮލޮޕަރުންނާއިއެކު މުޅި ދުނިޔޭގެ އެންމެ ފުޅާ ދާއިރާއެއްގައި ބާއްވާ އެންޖޭލްހެކް ހެކަތޯންގައި ދުނިޔޭގެ 60 ގައުމަކުން ބައިވެރިވެއެވެ.
އެ ހެކެތޯންގައި މިހާތަނަށް 150 ގައުމު ވަނީ ބައިވެރިވެފައެވެ.
