އަންނަ ސެޕްޓެމްބަރު މަހުގެ 23 ވަނަ ދުވަހު ދިވެހި ރައްޔިތުންދޭ ވޯޓަކީ ބަދަލަކަށްދޭ ވޯޓެއް ކަމަށް ގުޅިފައިވާ ސިޔާސީ ޕާޓީތަކުގެ ފަރާތުން އިންތިހާބުގައި ވާދަކުރައްވާ އެމްޑީޕީގެ ރިޔާސީ ކެންޑިޑޭޓް އިބްރަހިމް މުހައްމަދު ސޯލިހު (އިބޫ) ގެ ރަނިންގމޭޓް އަދި ކާށިދޫ ދާއިރާގެ މެމްބަރު ފައިސަލް ނަސީމް ވިދާޅުވެއްޖެއެވެ.

ކާށިދޫ ދާއިރާއަށް ފައިސަލް ކުރައްވަމުންދާ ދަތުރުފުޅުގައި ގާފަރަށް ވަޑައިގެން އެރަށުގެ ރައްޔިތުންނާއި ވާހަކަ ދައްކަވަމުން ފައިސަލް ވިދާޅުވީ ގުޅިފައިވާ ސިޔާސީ ޕާޓީތަކުގެ ވެރިކަމެއްގައި ވަކި ފިކުރަކަށް ތާއިދުކުރައްވާތީ ތަފާތު ކުރުން ނުގެންގުޅުއްވާނެ ކަމަށެވެ. އެހެންކަމުން ގުޅިފައިވާ ޕާޓީތަކުން މިހާރު ކުރަމުންދާ މަސައްކަތަކީ ގައުމީ މަސައްކަތެއްގެ ގޮތުގައި ދެކި ސެޕްޓެމްބަރ މަހުގެ 23 ވަނަ ދުވަހު ބަދަލަކަށް ވޯޓު ދެއްވުމަށް އެދިވަޑައިގަންނަވާ ކަމަށް ފައިސަލް ވިދާޅުވިއެވެ.

"އަޅުގަނޑުމެންގެ ސަރުކާރެއްގައި އިރާދަކުރެއްވިއްޔާ ވިސްނާނީ މުޅި ގައުމަށް، މުޅި ރައްޔިތުންނަން ވިސްނައިގެން އެންމެ ފައިދާ ހުރި ގޮތަށް އެންމެ ރައްޔިތުން ބޭނުންވާ ގޮތަށް ރަނގަޅަށް ކަންތަށްތައް ކުރިއަށް ގެންދާނަން" ގާފަރު ބަދަރު މަތީގައި ހުންނަވާ ރައްޔިތުންނާއި ވާހަކަ ދައްކަވަމުން ފައިސަލް ވިދާޅުވިއެވެ.

ދާއިރާގެ ރައްޔިތުން އެދޭ ކަންކަން ހާސިލްކޮށްދެއްވަން ރަނިންގމޭޓެއްގެ ގޮތުގައި މަސައްކަތް ކުރައްވަން ލިބުމަކީ ލިބުނު އުފަލެއް ކަމަށް ފައިސަލް ވިދާޅުވިއެވެ. އެ ފުރުސަތަކީ ހަގީގަތުގައި ކާށިދޫ ދާއިރާގެ ރައްޔިތުން އެމަނިކުފާނު އެދާއިރާގެ މަޖިލިސް މެމްބަރަކަށް އިންތިހާބުކުރެއްވުމުން ލިބިގެންދިޔަ ފުރުސަތެއްގެ ގޮތުގައި ގަބޫލުކުރައްވާ ކަމަށެވެ. އެހެންނަކަމުން ކުރިއަށް އޮތް ދުވަސްތަކުގައި އެމަނިކުފާނު ރައްޔިތުންނަށް އޮޅުވާނުލައި ރައްޔިތުންނާއި ގާތުން މަސައްކަތްޕުޅު ކުރައްވާނެ ކަމަށް ފައިސަލް ވިދާޅުވިއެވެ.

"ގުޅިފައިވަ އިއްތިހާދަކުން ކުރާ ވެރިކަމެއްގައި ރައްޔިތުންނަށް މާޔޫސްކަމެއް ނުގެންނާނަން، ރައްޔިތުން ހިތްހަމަޖެހޭ ގޮތަށް ރައްޔިތުންނަން ކަންކަން ކޮށްދޭނަން، ވަރަށް ގިނަ ކަންތަށްތައް އެބަހުރި ކުރަންޖެހޭ" ފައިސަލް ވިދާޅުވިއެވެ.

ފައިސަލް ގާފަރަށް ވަޑައިގެންނެވުމުން އެރަށުގެ ރައްޔިތުން ވަނީ ހޫނު މަރުޙަބާއެއް ދަންނަވާފައެވެ. ރައްޔިތުންގެ ހާލުބެއްލެވުމަށް ފައިސަލް ގާފަރުގައި ދޮރުން ދޮރަން ވަނީ ހިންގަވާފައެވެ. މި ދަތުރުގައި އެމްޑީޕީގެ ޗެއާޕާސަން ހަސަން ލަތީފާއި ޖުމްހޫރީ ޕާޓީގެ ނައިބް ލީޑަރު ޑރ. ހުސެއިން ރަޝީދާއި، އަދާލާތު ޕަޓީގެ ނައިބް ރައީސް އަލީ ޒާހިރުގެ އިތުރުން އެމްޑީޕީގެ ގައުމީ މަޖިލީހުގެ މެމްބަރުންނާއި ޖޭޕީގެ ކައުންސިލް މެމްބަރުން ބައިވެރިވަޑައިގެންވިއެވެ.