ސައުދީ އަރަބިއްޔާއިން ރާއްޖެއަށް ހަދިޔާކުރި 50 ޓަނުގެ ކަދުރު ބަހަން އިސްލާމިކް މިނިސްޓްރީން ފަށައިފިއެވެ.

އެމިނިސްޓްރީން ކޮށްފައިވާ އިއުލާނެއްގައި ބުނެފައި ވަނީ މުޅި ރާއްޖެއަށް ކަދުރު ބަހާނީ ކޮންމެ ގޭބިސީއަކަށް އެއް ޕެކެޓްގެ މަގުން ކަމަށެވެ. ގޭބިސީގެ ސައްހަކަން އަންގައިދޭ ލިޔުމެއް ގެނައުމުން ކަދުރު ހަވާލު ކުރާނެ ކަމަށެވެ. ގޭބިސީގެ ސައްހަކަން އަންގައިދޭ ލިޔުމަކީ ކުއްޔަށް ހިފައިގެން ދިރިއުޅޭ ތަނުގައި ދެ ފަރާތުން ވެފައިވާ އެއްބަސްވުން ނުވަތަ ނިސްބަތްވާ އިމާރާތުގެ ގޯތީގެ ރަޖިސްޓްރީގެ އަސްލެވެ. މީގެ އިތުރުން ކަދުރު ހަވާލުވާ މީހެއްގެ އައިޑީކާޑު ގެންދަން ޖެހެއެވެ.

އަންގާރަ ދުވަހުން ފެށިގެން ކަދުރު ބަހަން ފަށާފައިވާއިރު އެ ކަދުރުތައް ހުސްވަންދެން ބަހާނެ ކަމަށް އިސްލާމިކް މިނިސްޓްރީން ބުނެއެވެ.

މާލެ އާއި ވިލިމާލޭގައި ދިރިއުޅޭ ރައްޔިތުންނަށް ކަދުރު ބަހާނީ ހުކުރު ހޮނިހިރު ނޫން ކޮންމެ ދުވަހަކު ހެނދުނު 9:00 އަކުން އިރުއޮއްސި 6:00 އަކާ ދެމެދުގެ ވަގުތެއްގައި އިސްލާމިކް މިނިސްޓްރީ އިން ކަމަށާއި ހުޅުމާލޭގައި ދިރިއުޅޭ މީހުންނަށް ކަދުރު ލިބޭނީ ހައުސިން ޑިވަލޮޕްމަންޓް ކޯޕަރޭޝަން (އެޗްޑީސީ) އިން ކަމަށް އިއުލާނުގައި ވެއެވެ.

ރަށްރަށުން ކަދުރު ލިބޭނީ އަތޮޅު ކައުންސިލްތަކާއި ރަށު ކައުންސިލްތައް މެދުވެރިކޮށް ކަމަށް ވެސް އެ އިއުލާނުގައި ބުނެފައިވެއެވެ.

އާންމު ގޮތެއްގައި ސައުދީން ރާއްޖެ އަށް ކަދުރު ހަދިޔާކުރަނީ ރޯދަމަހާ ދިމާކޮށެވެ. ސައުދީން ދޭ ކަދުރު ރޯދަ މަހާ ދިމާކޮށް ގޭގެއަށް ބަހާއިރު މި ފަހަރުގެ ރޯދަ މަހު ސަރުކާރުން ކަދުރު ބަހާފައެއް ނުވެއެވެ.