ޖުމްހޫރީ ޕާޓީން ނިންމަންޖެހޭނީ ގައުމީ ނިންމުމެއް، އަމިއްލަ ނިންމެއް ނޫން: އަލީ ހުސެއިން

ގުޅިފައިވާ ސިޔާސީ ޕާޓީތަކުގެ ފަރާތުން ނެރޭ ރަނިންގ މޭޓެއް ކަނޑައެޅުމަށް ހުކުރު ދުވަހުގެ ރޭ ބާއްވާ ކައުންސިލް ބައްދަލުވުމުގައި އެޕާޓީގެ ކައުންސިލް މެމްބަރުން އަމިއްލަ ނިންމުމެއް ނުނިންމަވާ ގައުމީ ނިންމުމެއް ނިންމަވާނެ ކަމަށް ރަނިންގ މޭޓު ކަމަށް ކުރިމަތިލައްވާފައިވާ ކެންދޫ ދާއިރާގެ ރައްޔިތުންގެ މަޖިލީހުގެ މެމްބަރު އަލީ ހުސެއިން ވިދާޅުވެއްޖެއެވެ.

ގުޅިފައިވާ ޕާޓީތަކުގެ މެދުގައި ވެފައިވާ އެއްބަސްވުމުގެ ދަށުން ޖޭޕީން ކަނޑައަޅާ ރަނިންގ މޭޓަކު ހޮވުމަށް ހުކުރު ދުވަހުގެ ރޭ ބާއްވާ އިންތިޚާބަށް ކުރިމަތިލެއްވުމަށްފަހު ނޫސްވެރިންނަން މައުލޫމާތު ދެއްވަމުން އަލީ ހުސެއިން ވިދާޅުވީ ޖުމްހޫރީ ޕާޓީން ކަނޑައަޅާ ރަނިންގ މޭޓް ވާންވާނީ އެމްޑީޕީގެ ރިޔާސީ ކެންޑިޑޭޓް އިބްރާހިމް މުހައްމަދު ސޯލިހު (އިބޫ) އާއެކު ރައީސް އަބްދުﷲ ޔާމީން ބަލިކުރުމަށް އެންމެ ގިނަ ވޯޓް ހޯދޭނެ ރަނިންގ މޭޓަށް ކަމަށެވެ. ރައްޔިތުން އެދޭ ބަދަލު ގެނެވޭނީ ހުކުރު ދުވަހުގެރޭ ބާއްވާ ޖުމްހޫރީ ޕާޓީގެ ކައުންސިލްގެ ޖަލްސާގައި ކައުންސިލް މެމްބަރުން ވޯޓު ދޭ ގޮތަކުން ކަމަށް އަލީ ހުސެއިން ވިދާޅުވިއެވެ.

ޖުމްހޫރީ ޕާޓީގެ ކޮންގްރެސްގައި އެމްޑީޕީގެ ރިޔާސީ ކެނޑިޑޭޓް އިބްރާހިމް މުހައްމަދު ސޯލިހު

"ރައްޔިތުންނަން އެ ނިންމުން ނިންމޭނީ މާދަމާ ޖުމްހޫރީ ޕާޓީން ބާއްވާ އެތެރޭގެ އިންތިހާބުގައި ޖުމްހޫރީ ޕާޓީގެ ކައުންސިލްގެ މެމްބަރުން ވޯޓު ދޭ ގޮތަކުން، އެހެންވީމަ ރައްޔިތުންނާއި ހަމައަށް ރަނގަޅު ނަމެއް ގެންދިއުމަކީ ޖުމްހޫރީ ޕާޓީގެ ކައުންސިލްގެ މެމްބަރުން ނިންމަންޖެހޭ ގައުމީ ނިންމެވުމެއް، އެއީ އެބޭފުޅުންގެ އަމިއްލަ ނިންމެވުމެއް ކަމަށް އަޅުގަނޑެއް ގަބޫލެއް ނުކުރަން" އަލީ ހުސެއިން ވިދާޅުވިއެވެ.

ރިޔާސީ އިންތިހާބުގައި ރައީސް އަބްދުﷲ ޔާމީން ބަލިކުރުމަށް އެމްޑީޕީގެ ރިޔާސީ ކެންޑިޑޭޓާއި އެކު މަސައްކަތް ކުރުމަށް ގުޅިފައިވާ ސިޔާސީ ޕާޓީތަކަށް ލިބޭނެ އެންމެ ރަނގަޅު ރަނިންމޭޓަކީ އޭނާ ކަމަށް މ. ކުނޫޒްގައި ހުންނަވާއިގެން ނޫސްވެރިންނަން މައުލޫމާތު ދެއްވަމުން އަލީ ހުސެއިން ވިދާޅުވިއެވެ. އެހެންކަމުން ރައްޔިތުންނަން ރަނގަޅު ރަނިންމޭޓެއް ދެއްކުމަށް ޖުމްހޫރީ ޕާޓީގެ ކައުންސިލްގެ މެމްބަރުން އަމިއްލަ ނިންމުމަކަށް ވުރު ބޮޑަށް، ގައުމީ ނިންމުމެއް ރައްޔިތުން ވިސްނުމާއި އެއްގޮތަށް ނިންމާނެ ކަމަށް ގަބޫލުކުރައްވާ ކަމަށް އަލީ ހުސެއިން ވިދާޅުވިއެވެ.

ޖުމްހޫރީ ޕާޓީގެ ކޮންގްރެސްގެ ތެރެއިން

"އަޅުގަނޑުމެން މިއަދު ނިންމަންޖެހޭ ނިންމުމަކީ އަޅުގަނޑު ކުރިން ވެސް ދެންނެވި ގޮތަށް ރައީސް ޔާމީން ބަދަލުކުރުމަށް ނިންމަންޖެހޭ ނިންމުމެއް. އެ ނިންމުމަށްޓަކައި އަޅުގަނޑު ގަބޫލުކުރާ ގޮތުގައި އެންމެ ރަނގަޅު ރަނިންގ މޭޓަކީ ހަމަ އަޅުގަނޑު،" އަލީ ހުސެއިން ވިދާޅުވިއެވެ.

އަންނަ ހުކުރު ދުވަހުގެ ރޭ ބާއްވާ ޖުމްހޫރީ ޕާޓީގެ ކައުންސިލް ބައްދަލުވުމުން ރަނިންގ މޭޓް މަގާމަށް ކޮންމެ ބޭފުޅެއް އިންތިހާބުވިކަމުގައި ވިއަސް، ރައީސް ޔާމީންގެ އަނިޔާވެރިކަން ނިންމުމަށް ކުރެވޭ މަސައްކަތުގައި އެންމެ ކުރީގައި އަބަދުވެސް ހުންނަވާނެ ކަމަށް އަލީ ހުސެއިން ވިދާޅުވިއެވެ.

"ރަނިންގމޭޓް ހޮވުމުގައި އަޅުގަނޑުމެން ބަލަންޖެހޭނީ ހަގީގަތުގައި ތުރާކުނުން، ނުވަތަ ސީނު އަތޮޅުން ނުވަތަ ވ. އަތޮޅު ފޮއްތެޔޮ މުލިން ނޫނިއްޔާ މާމަކުނަދޫ އަށް ނިސްބަތްވާ މީހަކު ހޯދާކަން ނޫން. އަޅުގަނޑުމެން ބަލަން ޖެހޭނީ ރައީސް ޔާމީން ބަދަލުކުރުމުގައި އެންމެ ގިނަ ވޯޓު ހޯދޭނީ ކާކަށްތޯ. އެންމެ ގިނަ ރައްޔިތުން ފަސޭހަކަމާ އެކީގައި އެޕެއާއަކަށް ނުވަތަ ރަނިންގްމޭޓަކާއި ކެންޑިޑޭޓަކަށް ވޯޓުލާނީ ކާކު ރަނިންގ މޭޓަކަށް ގެނެސްގެންތޯ. އެހެންވީމަ ރައްޔިތުންނަން އެ ނިންމުން ނިންމޭނީ މިއަދު ނުވަތަ މާދަމާ އަޅުގަނޑުމެން ޖުމްހޫރީ ޕާޓީން މި ބާއްވާ އެތެރޭގެ އިންތިހާބުގައި ޖުމްހޫރީ ޕާޓީގެ ކައުންސިލްގެ މެމްބަރުން ވޯޓު ދޭ ގޮތަކުން، އެހެންވީމަ ރައްޔިތުންނާ ހަމައަށް ނަމެއް ގެންދިއުމަށް ނިންމާ ނިންމުމަކީ ޖުމްހޫރީ ޕާޓީން ނިންމަންޖެހޭ ގައުމީ ނިންމުމެއް،" ނޫސްވެރިންގެ ބައްދަލުވުމުގައި ވާހަކަ ދައްކަވަމުން އަލީ ހުސެއިން ވިދާޅުވިއެވެ.

އަލީ ހުސެއިންގެ އިތުރުން ރަނިންގ މޭޓު ކަމަށް ޖުމްހޫރީ ޕާޓީގެ ނާއިބު ލީޑަރު ޑރ. ހުސެއިން ރަޝީދު ހަސަނާއި ކާށިދޫ ދާއިރާގެ މެންބަރު ފައިސަލް ނަސީމްގެ އިތުރުން އަބްދުﷲ އަމީން ވެސް ވަނީ ކުރިމަތިލައްވާފައެވެ. ޖުމްހޫރީ ޕާޓީން ބުނެފައި ވަނީ ރަނިންގމޭޓު ކަނޑައަޅާނީ ހުކުރު ދުވަހުގެރޭ އެޕާޓީން ބާއްވާ ކައުންސިލްގެ ބައްދަލުވުމުނެވެ.