މަހުލޫފަށް ހުކުމެއް ނުކުރި، ހުކުމް ކުރާނީ ދެން ބާއްވާ އަޑުއެހުމެއްގައި
4 ޖުލައި 2018 | ބުދަ 07:59ދައުވާ ކުރަނީ ކުރެއްވި ޓްވީޓަކާ ގުޅިގެން
ގަލޮޅު ދެކުނު ދާއިރާގެ މެމްބަރު އަހުމަދު މަހުލޫފު: ހުކުމް ކުރާނީ ދެން އޮންނަ އަޑުއެހުމެއްގައި
ގަލޮޅު ދެކުނު ދާއިރާގެ މެމްބަރު އަހުމަދު މަހުލޫފު ކުރެއްވި ޓްވީޓަކާ ގުޅިގެން އުފުލާފައިވާ ދައުވާގެ އަޑުއެހުންތައް ނިންމާލައި ހުކުމް ކުރަން ތައްޔާރުވެއްޖެއެވެ.
މަހުލޫފު ކުރެއްވި ޓްވީޓަކާ ގުޅިގެން، އޭނާގެ މައްޗަށް އުފުލާފައިވާ ދައުވާގެ އަޑުއެހުންތައް ނިންމާލާފައި ވަނީ ބުދަ ދުވަހެއެވެ. ހިނގާފައި ނުވާ ކަމެއް، ހިނގައިފި ކަމުގެ މައުލޫމާތު ގާނޫނު ތަންފީޒު ކުރާ އިދާރާއަކަށް ދިން ކަމުގެ ކުށުގައި މަހުލޫފަށް އުފުލާފައިވާ ދައުވާގެ ޝަރީއަތް ކުރިއަށް ގެންދަނީ ވަކީލަކާ ނުލައެވެ. އެ މައްސަލައިގެ ހުލާސާ ބަޔާން ވެސް އިއްވީ މަހުލޫފު އަމިއްލައަށެވެ.
ހިނގާފައި ނުވާ ކަމެއް، ހިނގައިފި ކަމުގެ މައުލޫމާތު ގާނޫނު ތަންފީޒު ކުރާ އިދާރާއަކަށް ދިން ކަމުގެ ދައުވާ މަހުލޫފަށް އުފުލީ މި އަހަރުގެ ޖެނުއަރީ މަހުގެ 20 ވަނަ ދުވަހު ސްރީލަންކާގައި ހުންނަވައި މަހުލޫފު ކުރެއްވި ޓުވީޓެއްގައި މާފުށީ ޖަލުގައި ގައިދީން މަރުވަނީ ނޫން ކަމަށާއި ސީދާ މަރަނީ ކަމަށް ވިދާޅުވެފައި ވާތީއެވެ.
މަހުލޫފު ކުރެއްވި އެ ޓްވީޓުގައި އިތުރަށް ބުނެފައި ވަނީ އެކަށީގެންވާ ފަރުވާ ނުދީ ގައިދީން މަރަނީ ކަމަށާއި އަހަރެއްގެ ތެރޭގައި 10 ގައިދީން މަރުވުމުން އެއީ ސީރިއަސް މައްސަލައެއް ކަމަށެވެ.
އެ ދައުވާ ސާބިތުވެއްޖެ ނަމަ މަހްލޫފަށް ހަތަރު މަހާއި 24 ދުވަހުގެ ޖަލު ހުކުމެއް އަންނާނެ އެވެ.
ތަފާސްހިސާބުތަކުން ދައްކާ ގޮތުން މިދިޔަ އަހަރު ރާއްޖޭގެ އެކި ޖަލުތަކުގައި ފަސް ގައިދީއަކު މަރުވެފައިވާއިރު، 2016 ވަނަ އަހަރު ވެސް ހަ ގައިދީއަކު މަރުވެފައިވެއެވެ. ޖަލުތަކުގައި މަރުވި މީހުންގެ އަސްލު ހޯދައި، އެ މައުލޫމާތު ދައުލަތުން ހާމަކޮށްފައެއް ނުވެއެވެ.
ގައިދީންނަށް އެކަށީގެންވާ ރައްކާތެރިކަން ނުދިނުމާއި ބޭސްފަރުވާ ނުދޭ ކަމަށް ބުނެ، ގައިދީންގެ އާއިލާތަކުން ދަނީ ކަންބޮޑުވުން ފާޅުކުރަމުންނެވެ. ގައިދީންނަށް ރައްކާތެރިކަމާއި ބޭސް ފަރުވާ ފުރިހަމަ ކުރުމުގެ ފުރުސަތު ނުލިބޭ ކަމުގެ އަޑުތައް ގަދަވެފައިވާއިރު، ހައްގުތައް ކަށަވަރު ކުރުމަށް ގާނޫނުން ލާޒިމުކޮށްފައިވާ މުއައްސަސާތަކުން އެކަންކަން ހޯދައި ތަހުގީގުކޮށްފައެއް ނުވެއެވެ.
