އަންހެނުންނަށް އަމާޒުކޮށްގެން އިގިރޭސިވިލާތުން ހުށަހެޅި ގަރާރުން ފިރިހެނުންނަށް ވެސް ރައްކާތެރިކަން ލިބޭނެ!

އަންހެނުންގެ ހައްގުތައް ރައްކާތެރި ކުރުމަށްޓަކައި ހުށަހެޅި ގަރާރުން ފިރިހެނުންނަށް ވެސް ރައްކާތެރިކަން ލިބޭނެ ކަމަށް ސަރުކާރުގެ ތަރުޖަމާން ވިދާޅުވެއްޖެއެވެ.

ސަރުކާރުގެ ތަރުޖަމާނު ވިދާޅުވީ ފިރިހެނުން ވެސް ކިލްޓް (މުންޑެއް ކަހަލަ ފޭރާމެއް) ލައިގެން ހުންނައިރު އޭގެ ތިރިން، އެ މީހުނަށް ނޭނގި ފޮޓޯ ނެގުން މި ގަރާރުގެ ދަށުން މަނާ ވެގެން ދާނެ ކަމަށެވެ.

ސަރުކާރުން ވަރަށް ބޮޑަށް ފާސް ކުރަން ބޭނުންވާ މި ގަރާރަށް އެ ގައުމުގެ އިނދިކޮޅު މެމްބަރުން ވެސް ވަނީ ތާއީދު ކޮށްފައެވެ. މި ގަރާރަށް ތާއީދު ނުކުރާ ކަމަށް ބުނެފައި ވަނީ ގާނޫނު ހަދާ މަޖްލީހުގެ ތިރީ ގޭގައި އެންމެ މެމްބަރެކެވެ. އެ މެމްބަރު ނިސްބަތް ވަނީ ވެރިކަން ކުރާ ޕާޓީއަށެވެ.

ސަރުކާރުން ނުސީދާކޮށް އެ މެމްބަރަށް އަމާޒުކޮށް ބުނީ މި ގަރާރަށް ކިތަންމެ ބަޔަކު ހުރަސް އެޅި ކަމުގައިވީ ނަމަވެސް، މި ގަރާރު ފާސްކުރަން ސަރުކާރަށް ކުރެވެން ހުރި ހުރިހާ މަސައްކަތެއް ކުރާނެ ކަމަށެވެ. އަދި މި ގަރާރު ފާސްވީހާ އަވަހަކަށް ގާނޫނަށް ބަދަލު ގެނެސް، ތަސްދީގު ކުރާނެ ކަމަށެވެ.

ސަރުކާރުގެ ޕާޓީ، ކޮންސަވޭޓިވް ޕާޓީ ތަމްސީލު ކުރައްވާ ރައްޔިތުންގެ މަޖްލީސް މެމްބަރު، ޝާލޮޓް ވިއަރ ވިދާޅުވީ މި ގަރާރުގެ ސަބަބުން ދެ ޖިންސުގެ މީހުނަށް ވެސް ހަށިގަނޑުގެ އިތްފަތެރިކަން ރައްކާތެރި ކުރުމަށް މަގު ފަހިވާނެ ކަމަށެވެ.

އިނގިރޭސިވިލާތުގެ ގާނޫނު ހަދާ މަތީގޭގެ މަޖްލިސް މެމްބަރުން ވަނީ މި ގަރާރަށް ހޫނު މަރުހަބާއެއް ކިޔާފައެވެ.

މިގަރާރު ފާސް ވެއްޖެ ނަމަ ސްކާޓްގެ ތިރިން ފޮޓޯ ނަގާ މީހުންނާ ދެކޮޅަށް ޖިނާއީ ދައުވާ ކުރެވި، ދެ އަހަރަށް ވުރެ ބޮޑު ނޫން ޖަލު ހުކުމެއް އަންނާނެއެވެ.

މިފަދަ ގަރާރެއް މީގެ ކުރިން 2009 އަހަރު ސްކޮޓްލޭންޑްގައި ވެސް އަމަލު ކުރަން ފަށާފައި ވެއެވެ.