މުދާ ހިފާގެން ދަތުރު ކުރި "ވީނަސް" ދޯނި ކަށީދޫ ކަނޑަށް އަރިއަޅާލި ނަމަވެސް އެއްވެސް މީހަކަށް ގެއްލުން ނުވާ ކަމަށް އެމްއެންޑީއެފުން ބުނެފި އެވެ.
އެމްއެންޑީއެފުން ބުނީ ވީނަސް ދޯނި ކާށިދޫ ބޮޑު ކަނޑުން ދަތުރުކުރަނިކޮށް ކަނޑު ގަދަވެ ދޯންޏަށް ދިޔަވެ ދޯނި އެއްފަރާތަށް އަރިއަޅާލުމާ ގުޅިގެން ކަމަށް ދޯނީގެ ކެޕްޓަން އެމްއެންޑީއެފް ކޯސްޓްގާޑަށް މައުލޫމާތު ދީފައިވާ ކަމަށެވެ. މި ހާދިސާ ހިނގި އިރު ދޯނީގައި ދިވެއްސަކާއި ތިން ބިދޭސީން ދަތުރުކުރި ކަމަށާއި، މިހާދިސާގައި ދޯނިން ދަތުރުކުރި އެއްވެސް މީހަކަށް އަނިޔާއެއް ލިބިފައި ނުވާ ކަމަށް އެމްއެންޑީއެފުން ބުންޏެވެ.
އެމްއެންޑީއެފުން ބުނީ އެ ދޯންޏަށް ބަރުކޮށްފައި ވަނީ ހިލަޔާއި ލަކުޑި ކަމަށެވެ. އެއީ 78 ފޫޓުގެ މުދާ އުފުލާ ދޯންޏެއް ކަމަށާއި، އެ ދޯނި ދަތތުރުކުރަމުންދިޔައީ ބ. އަތޮޅަށް ކަމަށެވެ.
އެމްއެންޑީއެފުން ބުނީ މި ދޯނީގައި ހުރި ބައެއް ލަކުޑިއާއި ފިލާތައް ކަނޑަށް ދޫކޮށްލުމުގެ ސަބަބުން ދޯންޏަށް ލުއިވެ ދޯންޏަށް ދިޔަވުން ވަނީ ކޮންޓްރޯލްކުރެވިފައިވާ ކަމަށެވެ. އަދި މިދޯނި ކ.ގާފަރަށް ގެންދިއުމަށް ދޯނީގެ ވެރިފަރާތާއި ގުޅިގެން އެމްއެންޑީއެފް މާލޭ އޭރިއާ ކޯސްޓްގާޑް ސްކޮޑްރަންގެ އެހީތެރިކަން ފޯރުކޮށްދެމުން އަންނަ ކަމަށް ވެސް އެމްއެންޑީއެފުން ބުންޏެވެ.
މީގެ އިތުރުން އެމްޑީއެފުން ބުނީ މި ދޯނިން ކަނޑަށް ދޫކޮށްލި ލަކުޑިއާއި ފިލާތައް ކ.ގާފަރާއި ކ.ކާށިދޫއާއި ދޭތެރެއިން އިރުމައްޗަށް އޮޔާ ދަމުންދާ ކަމަށެވެ. ވީމާ މިސަރަހައްދުން ދަތުރު ކުރައްވާ ފަރާތްތަކުން މިކަމަށް ސަމާލުކަން ދެއްވުމަށް ވަނީ އިލްތިމާސް ކޮށްފައެވެ. އަދި ރޭގަނޑު ދަތުރުކުރާ ފަރާތްތަކުން މިސަރަހައްދުން ދަތުރު ކުރެއްވުމުގައި ހާއްސަ ސަމާލުކަމެއް ދެއްވުމަށްވެސް އެމްއެންޑީއެފުން ވަނީ އެދިފައެވެ.
"ވީނަސް" ދޯނި އަރިއަޅާލައިގެން އެކަމުގެ ރިޕޯޓް އެމްއެންޑީއެފްއަށް ލިބުނީ ބުދަ ދުވަހުގެރޭ 7:45 ގައެވެ. އަދި އެ ދޯނި އަރިއަޅާލައިފައި ވަނީ ގާފަރު ހުޅަނގު އުތުރުން 13 މޭލު ބޭރުން ނެވެ.