ވިލާއަށް ލުއި ދިނުމުން 1.6 ބިލިއަން ރުފިޔާ ގެއްލުންވި ކަމަށް ބުނެ، ފައިސާ ހޯދަން އަންގައިފި
15 ޖޫން 2018 | ހުކުރު 09:4495 މިލިއަން ރުފިޔާގެ ކުލި ދައްކާފައެއް ނުވޭ
ގާސިމް އިބްރާހިމް:
ވިލާއަށް ދޫކޮށްފައިވާ ރަށްތަކާއި ފަޅުތަކާ ގުޅިގެން ސަރުކާރުން ދިން ލުއިތަކުގެ ސަބަބުން ދައުލަތަށް ގެއްލުނު ކަމަށް ބުނާ 110 މިލިއަން ޑޮލަރު (1.6 ބިލިއަން ރުފިޔާ) އަނބުރާ ހޯދަން އެންޓި ކޮރަޕްޝަން ކޮމިޝަން (އޭސީސީ)އިން ޓޫރިޒަމް މިނިސްޓްރީއަށް އަންގައިފިއެވެ.
އިތުބާރު ހުރި މަސްދަރަކުން ރާއްޖެއެމްވީއަށް ކިޔައިދިން ގޮތުގައި ވިލާއަށް ލުއިތަކެއް ދޭން ޖެހޭ ގޮތަށް ސެޓްލްމަންޓް އެގްރިމެންޓްތަކެއް ހެދި މައްސަލަ އޭސީސީން ބެލުމަށް ފަހު، އެ ކޮމިޝަނުން ނިންމާފައި ވަނީ އެ އެއްބަސްވުންތަކުގެ ސަބަބުން 110 މިލިއަން ޑޮލަރު ދައުލަތަށް ގެއްލުނު ކަމަށެވެ. އެގޮތުން ހަ ތަނެއްގެ ކުލީގެ ގޮތުގައި ލިބެންޖެހޭ 95 މިލިއަން ޑޮލަރާއި އެ ތަންތަނުގެ މުއްދަތު އިތުރު ކުރުމުގެ ފީގެ ގޮތުގައި ދައުލަތަށް ލިބެންޖެހޭ 15 މިލިއަން ޑޮލަރު ވެސް ދައުލަތަށް ލިބިފައި ނުވާ ކަމަށެވެ.
އޭސީސީން ބުނީ ވިލާއާ އެކު ސެޓްލްމަންޓް ގްރިމެންޓުތަކުގެ ދަށުން އެ ތަންތަނުގެ ކުލީގެ މުއްދަތު 50 އަހަރަށް އިތުރު ކުރީ އެ ފީ ނެގުމެއް ނެތި ކަމަށެވެ. އޭގެ އިތުރުން އެތަންތަން ތަރައްގީކޮށް ހުޅުވަންޖެހޭ ތާރީހު ފަސްކޮށްފައި ވަނީ ވެސް އެ ފީ ނެގުމެއް ނެތި ކަމަށް ވެސް އޭސީސީން މައްސަލަ ނިންމުމަށް ފަހު ޓޫރިޒަމަށް އެންގާފައިވެއެވެ.
އޭސީސީން ބުނެފައިވާ ގޮތުގައި ދައުލަތަށް ލިބެން ޖެހޭ ފައިސާ ނުލިބޭ ގޮތަށް ދޫކޮށްލެވޭނީ އޮޑިޓާ ޖެނަރަލް ކަނޑައަޅާ ގޮތެއްގެ މަތިން ފިނޭންސް މިނިސްޓަރު އެކަމާ ބެހޭ ހިސާބުތަކުގައި އެކަން ހިމެނުމަށް ފަހު ރައީސުލްޖުމްހޫރިއްޔާގެ ހުއްދަ ލިބިގެންނެވެ.
ވިލާއަށް ލުއިތަކެއް ލިބޭ ގޮތަށް ސެޓްލްމަންޓް އެގްރިމެންޓްތަކެއް ހެދީ އޭރުގެ ޓުއަރިޒަމް މިނިސްޓަރު އަހުމަދު އަދީބެވެ. އޭސީސީން ނިންމާފައި ވަނީ އެ އެއްބަސްވުންތައް ހަދާފައި ވަނީ މަގާމުގެ ނުފޫޒު ބޭނުންކޮށްގެން ނާޖައިޒް ފައިދާ ލިބޭ ގޮތަށް ކަމަށެވެ. އެ މައްސަލާގައި އަދީބުގެ މައްޗަށް ދައުވާ ކުރަން ފޮނުވަން އޭސީސީން ވަނީ ނިންމާފައެވެ.
