ގޫގުލްގެ މައްޗަށް ދައުވާ ކުރެވޭނެ ކަމަށް އޮސްޓްރޭލިއާގެ އެންމެ މަތީ ކޯޓުން ކަނޑައަޅައިފި
ދަށު ކޯޓަކުން ކަޑަ އެޅީ ދައުވާ ނުކުރެވޭނެ ކަމަށް
ގޫގުލްގެ އިމާރާތެއްގެ ފޮޓޯއެއް
ގޫގުލް އިން އަގު ވައްޓާލި ކަމަށް ބުނެ، އޮސްޓްރެއިލިއާ މީހާ ކުރާ ދައުވާއަކީ ސައްހަ ދައުވާއެއް ކަމަށާއި އެ ދައުވާ ކުރެވޭނެ ކަމަށް އޮސްޓްރެއިލިއާގެ އެންމެ މަތީ ކޯޓުން ކަނޑައަޅައިފިއެވެ.
ގޫގުލްގައިވާ މައުލޫމާތުގައިވާ ގޮތުން މިލޯރަޑް ޓުރްކުލިއާ ސިފަވަނީ އާންމު މީހެއްގެ ބަދަލުގައި އޮސްޓްރެއިލިއާގެ ދެ ވަނައަށް އެންމެ ބޮޑު ސިޓީ، މެލްބަންގެ ކުށްވެރިންގެ ނެޓްވޯކާ ގުޅިފައިވާ މީހެއްގެ ގޮތުގައެވެ. އެހެން ވާން ދިމާވި ސަބަބަކަށް ބެލެވެނީ 2004 ވަނަ އަހަރު މެލްބަންގައި ހިނގި ބަޑި ޖެހުމުގެ ހާދިސާގައި އޭނާ ޒަޚަމް ވުމުންނެވެ.
ޓުރްކުލިއާއަކީ އަނިޔާ ލިބުނު މީހެއްގެ ބަދަލުގައި ގޫގުލް އިން އޭނާ ސިފަކޮށްފައި ވަނީ ކުށްވެރިއެއްގެ ގޮތުގައި ކަމަށް އޭނާ ބުނެއެވެ. އޭގެ ސަބަބުން މީހުންގެ ކުރިމަތީގައި އޭނާގެ އަގު ވެއްޓިފައިވާ ކަމަށް ވެސް އޭނާ ތުހުމަތުކޮށްފައި ވެއެވެ. ޓުރްކުލިއާ އިތުރަށް ބުނީ އޭނާގެ ނަން ގޫގުލް އިން ސާޗްކުރާ އިރު ގޭންގްތަކަށް ނިސްބަތްވާ ނަންތައް ވެސް ގޫގުލް އިން ދައްކާ ކަމަށެވެ.
ގޫގުލްގެ ވަކީލުން ދިފާއުގައި ބުނީ މީހެއްގެ ފޮޓޯ އާއި މައުލޫމާތު ކުށްވެރިންނާ އެކު ހުރުމަކީ އޭނަ ކުށްވެރިއެއް ކަމަށް ޝައްކު ކުރެވެން ޖެހޭ ކަމެއް ނޫން ކަމަށެވެ. އެހެނީ އެ ދައުވާ ކުރާ މީހާގެ ނަން ސާޗްކުރާ އިރު ގޫގުލްގެ ލޯގޯ އާއި ފިލްމުތަކުގެ ފޮޓޯ، އަނިޔާ ލިބިފައިވާ މީހުންގެ މައުލޫމާތު އަދި އެކްޓަރު މާލަން ބްރޭންޑޯގެ ވަނަވަރު ދައްކާ ކަމަށް ވަކީލުން ވަކީ ފާހަގަކޮށްފައެވެ.
ގޫގުލްއާ ދެކޮޅަށް ޓުރްކުލިއާ މި މައްސަލަ އެންމެ ފުރަތަމަ ހުށަހެޅީ 2012 ވަނަ އަހަރު އޮސްޓްރެއިލިއާގެ ވިކްޓޯރިއާ ސްޓޭޓްގެ ސުޕްރީމް ކޯޓަށެވެ. އެހެން ނަމަވެސް އެ ކޯޓުން ވަނީ ހަތަރު އަހަރު ދުވަސް ފަހުން މި ދައުވާ ނުކުރެވޭނެ ކަމަށް ނިންމާފައެވެ. ސަބަބެއް ކަމަށް ކޯޓުން ބުނީ މި ދައުވާ ކުރާ މީހާއަށް އޭނާގެ އަގު ވައްޓާލިކަން ސާބިތު ކުރެވޭނެ ކަމަށް ކޯޓަށް ގަބޫލު ނުކުރެވޭތީ ކަމަށެވެ. އެހެންނަމަވެސް ކޯޓުން ވަނީ އެ މީހާގެ އަތުން ޝަރީއަތްތަކަށް ކުރި ޚަރަދަށް ބަދަލު ދިނުމަށް ގޫގުލްގެ މައްޗަށް އަމުރު ކޮށްފައެވެ.
އެހެން ނަމަވެސް އޮސްޓްރޭލިއާގެ އެންމެ މަތީ ކޯޓު، ހައި ކޯޓުން ވަނީ ހުރިހާ ފަޑިޔާރުންގެ އިއްތިފާގުން އެ މައްސަލަ ބެލޭނެ ކަމަށް ނިންމައި ވިކްޓޯރިއާ ސްޓޭޓްގެ ސުޕްރީމް ކޯޓުގެ އަމުރު ބާތިލް ކޮށްފައެވެ. ހައި ކޯޓުން ބުނީ ދައުވާ އުފުލާ މީހާގެ ނަން ގޫގުލް މެދުވެރިކޮށް ހޯދާ އިރު އޭނާއަކީ ކުށްވެރިއެއް ކަމުގައި ސިފަވެގެން ގޮސްދާނެ ކަމަށާއި އޭނާގެ އަގު ވެއްޓުމުގެ ފުރުސަތު އެބައޮތް ކަމަށެވެ. އެހެންކަމުން މި ދައުވާ ގޫގުލްއާ ދެކޮޅަށް ކުރެވޭނެ ކަމަށެވެ.
އޮސްޓްރޭލިއާގެ އަދުލުވެރިކަން ގާއިމުކުރުމުގެ ނިޒާމު އޮންނަ ގޮތުން އެ ގައުމުގެ ކޮންމެ ސްޓޭޓެއްގައި ވެސް ސުޕްރީމް ކޯޓެއް ހުރެއެވެ. އެ ސުޕްރީމް ކޯޓުތަކަކީ އެ ސްޓޭޓުގެ ކޯޓުތަކުގެ ތެރެއިން އެންމެ މަތީ ކޯޓެވެ. އެ ކޯޓުތަކުގެ މައްޗަށް ބަހެއް ބުނެވޭނީ ހަމައެކަނި މުޅި ގައުމުގެ ވެސް އެންމެ މަތީ ކޯޓަށެވެ. އެއީ ހައި ކޯޓެވެ.
ބެލެވޭ ގޮތުގައި ހައި ކޯޓުގެ ނިންމުމަށް ފަހު، އެ މައްސަލަ ސާބިތު ކުރުމަށް އަނެއްކާ ވެސް ދާނީ ވިކްޓޯރިއާގެ ސުޕްރީމް ކޯޓަކެވެ. ޓުރްކުލިއާ ބުނީ ފޮޓޯތަކާއި މައުލޫމާތު ނުފެންނަ ގޮތަށް ހަދަންދެން އެ ކުންފުންޏާއި ދެކޮޅަށް ދައުވާ ކުރާނެ ކަމަށެވެ. އޭނާ ބުނީ އޭނާއަކީ ކުށްވެރިއެއް ނޫން ކަމަށާއި އެހެން ނަމަވެސް ގޫގުލްގެ ސަބަބުން އޭނާގެ ކާފަ ދަރިންނަށް އޭނާއާ ބެހޭ ދޮގު މައުލޫމާތު ލިބުމަކީ ވެސް އެކަށީގެންވާ ކަމެއް ކަމަށެވެ.
