މާފިލާފުށީގެ އާއިލާއަކަށް ބަދަލު ދޭން ކުރި ހުކުމަށް ސަރުކާރުން އަމަލެއް ނުކުރި
12 ޖޫން 2018 | އަންގާރަ 06:09ބަދަލު ދޭން ދިން މުއްދަތު ވަނީ ހަމަވެފައި
މާފިލާފުށީގެ އާއިލާތަކަށް ތުލުސްދޫއިން ގޯތި ދޫކުރުމަށް ބޭއްވި ރަސްމިއްޔާތުގެ ތެރެއިން
ފަޅު ރަށެއްގެ ގޮތުގައި ކަނޑައަޅާފައިވާ ޅ. މާފިލާފުށީގެ އާއިލާއަކަށް ބަދަލުގެ ގޮތުގައި ތިން ލައްކައަށް ވުރެ ގިނަ ރުފިޔާ ދިނުމަށް ސިވިލް ކޯޓުން ކުރި ހުކުމަށް އަމަލު ކުރަން އަނެއްކާ ވެސް އެ ކޯޓުން ހައުސިން މިނިސްޓްރީގެ މައްޗަށް ހުކުމްކޮށްފިއެވެ.
ފަޅު ރަށެއްގެ ގޮތުގައި، މާފިލާފުށި ކަނޑައެޅުމުގެ ކުރިން އެ ރަށުގެ "ގްރީންހައުސް" ކިޔާ ގޯތީގައި ކޮށްފައިވާ އުމްރާނީ މަސައްކަތާއި ރުއްގަހަށް ބަދަލު ދޭން، ސިވިލް ކޯޓުން އެންމެ ފުރަތަމަ ހުކުމް ކުރީ މިދިޔަ އަހަރުގެ ޖުލައި މަހުގެ 12 ވަނަ ދުވަހުއެވެ. ސިވިލް ކޯޓުން ކުރި އެ ހުކުމުގައި ބުނެފައި ވަނީ ބަދަލުގެ ގޮތުގައި ގޯތީގެ ވެރިފަރާތް، އަލްމަރްހޫމް މުހައްމަދު އަހުމަދުގެ ވާރިސުންނަށް 365،089 ރުފިޔާ ދިނުމަށެވެ. އެ ފައިސާ މިއަހަރުގެ މާޗު މަހުގެ ކުރިން، މުހައްމަދު އަހުމަދު ވާރިސުންނަށް ދިނުމަށް ހައުންސިންގެ މައްޗަށް ވަނީ ހުކުމްކޮށްފައެވެ.
ގްރީންހައުސްގައި ކޮށްފައިވާ އުމްރާނީ މަސައްކަތަށާއި ރުށްގަހުގެ ބަދަލަށް ފައިސާ ނިދުމަކީ އެހެން ރަށަކުން މުހައްމަދު އަހުމަދުފުޅަށް ގޯއްޗެއް ދިނުމަށް ނުވަތަ ހަވާލު ކުރުމަށް ދައުލަތުން ނިންމާފައިވާނަމަ، އެ ނިންމުމަށް ހުރަސްއެޅޭނެ ކަމެއް ކޫން ކަމަށް ސިވިލް ކޯޓުގެ ހުކުމްގައިވެއެވެ.
އެ ހުކުމަށް ސަރުކާރުން އަމަލު ނުކޮށްގެން، ސިވިލް ކޯޓަށް ހުށަހެޅުމުން، އެ ކޯޓުން މިދިޔަ އާދީއްތަ ދުވަހު ހުކުމްކޮށްފައި ވަނީ މަސް ދުވަހުގެ ތެރޭގައި އެ ފައިސާ ދައްކައި ހަލާސް ކުރުމަށެވެ. އާބާދީ އިތުރުވަމުން ނުދިއުމާއި ތަރައްގީ ފެންނަމުން ނުދިއުމުން މާފިލާފުށި ފަޅު ރަށެއްގެ ގޮތުގައި ހަމަޖައްސާފައި ވަނީ 2011 ވަނަ އަހަރުއެވެ. އެ ރަށުން މީހުން ބާލަން ފެށީ 2010 ވަނަ އަހަރުއެވެ.
މާފިލާފުށީގެ ބައެއް އާއިލާތައް ޅ. ނައިފަރާއި، ހިންނަވަރާއި، ނ. މަނަދު އާއި، ހދ. ކުޅުދުއްފުއްޓާއި އަދި ހދ. ހަނިމާދޫ އާއި ކ. ތުލުސްދޫއަށް ވަނީ ބަދަލުކޮށްފައެވެ. އަދި އެ ރަށުގެ ހަތް އާއިލާއަކަށް ހުޅުމާލެއިން ވަނީ ފްލެޓް ދީފައެވެ.
