ޖަލުގައި ހުންނެވި ކުރީގެ ރައީސް މައުމޫން އަބްދުލްގައްޔޫމްގެ އަރިހަށް ރައީސުލްޖުމްހޫރީ އަދި ކޮއްކޯފުޅު އަބްދުﷲ ޔާމީންގެ މަންދޫބެއްގެ ގޮތުގައި ޑިފެންސް މިނިސްޓަރު އާދަމް ޝަރީފު އުމަރު ވަޑައިގެންނެވުމުން، އެމަނިކުފާނަށް މައުމޫންގެ ގާނޫނީ ވަކީލު ބަހުގެ ހަމަލާއެއް ރައްދު ކުރައްވައިފިއެވެ.

ރައީސް މައުމޫންގެ ގާނޫނީ ވަކީލު މައުމޫން ހަމީދު ހޯމަ ދުވަހު ކުރެއްވި ޓްވީޓެއްގައި ވިދާޅުވީ ސަރުކާރުގެ އިސް އޮފިޝަލުންތަކެއް އާދީއްތަ ދުވަހު ރައީސް މައުމޫނާ ބައްދަލު ކުރައްވާފައިވާ ކަމަށެވެ. ސަރުކާރުގެ އޮފިޝަލުންގެ ނަން މައުމޫން ހަމީދު ފާހަގަ ކުރައްވާފައި ނުވި ނަމަވެސް، ރާއްޖެއެމްވީ އަށް އެނގިފައިވާ ގޮތުގައި ރައީސް މައުމޫންގެ އަރިހަށް ވަޑައިގެންނެވީ ޑިފެސް މިނިސްޓަރެވެ.

ޑިފެންސް މިނިސްޓަރު ވިދާޅުވެފައިވާ ވާހަކަފުޅަކަށް އިޝާރާތް ކުރައްވައި މައުމޫން ހަމީދު ވިދާޅުވީ "އެ ބައްދަލުވުމަށް ފަހު ރައީސް މައުމޫންގެ ދަތްދޮޅި ހުރީ ސަލާމަތުން" ކަމަށެވެ.

މައުމޫން ހަމީދު އެގޮތަށް ވިދާޅުވެފައިވާއިރު، މަޖިލީހުގެ މެމްބަރުންގެ ދަތްދޮޅި ދުއްވާލާނެ ކަމަށް ބުނެ، މިނިސްޓަރު ޝަރީފު ވާހަކަފުޅު ދައްކަވާފައިވާ އޯޑިއޯއެއް މިދިޔަ އަހަރުގެ އޮގަސްޓު މަހު ވަނީ އާންމުވެފައެވެ. އެމްއެންޑީއެފްގެ ސްޕެޝަލް ޕްރޮޓެކްޝަން ގްރޫޕް (އެސްޕީޖީ) އޮފިސަރުންނާ ވާހަކަފުޅު ދައްވަމުން، މިނިސްޓަރު ވިދާޅުވެފައި ވަނީ ރައްޔިތުންގެ މަޖިލީހުގައި ހިނގައިދިޔަ ހަމަނުޖެހުމަކާ ގުޅިގެންނެވެ.

ދޫނިދޫ ޖަލުގައި ބަންދުކޮށްފައި ހުރި ރައީސް މައުމޫނާ ޑިފެންސް މިނިސްޓަރު ބައްދަލު ކުރެއްވިއިރު، މާފުށީ ޖަލުގައި ބަންދުކޮށްފައި ހުންނެވި އުއްތަމަފަނޑިޔާރު އަބްދުﷲ ސައީދާ ވެސް މިނިސްޓަރު ވަނީ ބައްދަލު ކުރައްވާފައެވެ.

ރައީސްގެ މަންދޫބެއްގެ ހައިސިއްޔަތުން ހައުސިން މިނިސްޓަރު ޑރ. މުހައްމަދު މުއިއްޒު މިދިޔަ ފެބްރުއަރީ މަހު ވަނީ މައުމޫނާއި އުއްތަމަ ފަނޑިޔާރުގެ އިތުރުން ސުޕްރީމް ކޯޓު ފަނޑިޔާރު އަލީ ހަމީދާ ބައްދަލުކުރައްވާފައެވެ.

ޝަރީއަތް ނިމެންދެން ރައީސް މައުމޫން ހައްޔަރުކޮށްފައިވާއިރު، އެމަނިކުފާނުގެ މައްޗަށް ވަނީ ދެ ދައުވާއެއް އުފުލާފައެވެ. ޓެރަރިޒަމްގެ އަމަލެއް ކުރަން އުޅުނު ކަމުގެ ދައުވާއަކާއި އަދުލު އިންސާފު ގާއިމު ކުރުމަށް ހުރަސް އެޅުމުގެ ދައުވާ އެމަނިކުފާނުގެ މައްޗަށް ސާބިތުވެއްޖެ ނަމަ، 17 އަހަރަށް ވުރެ ދިގު ޖަލު ހުކުމެއް އަންނާނެއެވެ.