ފަރަންސޭސި ވިލާތުގެ މަޝްހޫރު އައިފެލް ޓަވަރަށް ބާރުގަދަ ހޮނު އަޅާ މަންޒަރު ދައްކުވައިދޭ ވީޑިއޯ އެއް ޓްވިޓަރ ގައި ވައިރަލް ވެއްޖެއެވެ.
ވަރުގަދަ ކޮޅިގަނޑެއްގައި އައިފެލް ޓަވަރަށް ހޮނުއެޅި މި ހާދިސާ ހިނގި އިރު ކޮޅިގަނޑުގައި ފްރާންސްގެ ހުޅަނގާއި އުތުރުގެ ސަރަހައްދުތަކަށް ވަރަށް ބޮޑަށް އަސަރު ކޮށްފައިވާ ކަމަށް ރިޕޯޓްތައް ބުނެއެވެ.
ވައިރަލް ވެފައިވާ ޓްވިޓަރ ވީޑިއޯގައި ފެންނަނީ އައިފެލް ޓަވަރުގެ އެންމެ މަތީބަޔަށް ހޮނުއަޅަނި ކޮށްނެވެ.
ހޮނު އަޅާއިރު މުޅި ޓަވަރަށް ވިދުވަރުގެ އަސަރު ފޯރާ ކަމަށް ފެނެއެވެ.
De l'#orage sur #Paris ce soir et la #TourEiffel encore une fois faisant office de paratonnerre avec cette spectaculaire foudre aux alentours de 20h45 ! (Webcam @Meteovilles ) @Paris @infoclimat @meteofrance @KeraunosObs pic.twitter.com/7aEoEjUNhH
— Dorian Dziadula (@DorianDziadula) May 28, 2018
ފްރާންސްގެ މޫސުމާ ބެހޭ އިދާރާ އިން ހާމަ ކޮށްފައިވާ ގޮތުގައި 2018 ވަނަ އަހަރުގެ މާޗް މަސް ރެކޯޑް ކުރެވިފައިވަނީ 2000 ވަނަ އަހަރުގެ ފަހުން އެންމެ ގިނައިން ފަރަންސޭސި ވިލާތައް ހޮނުއެޅި މަހުގެ ގޮތުގައެވެ.
މަދު ސިކުންތުކޮޅެއްގެ ދިގު މިނުގެ މި ވީޑިއޯ ދެލައްކަ އަށް ވުރެ ގިނަ މީހުން ބަލާފައިވާ އިރު ހާހަކަށް ވުރެ ގިނަ މީހުން މި ވީޑިއޯ ޝެއަރ ކޮށްފައިވެއެވެ.
އައިފެލް ޓަވަރަކީ ފަރަންސޭސި ވިލާތުގެ އެންމެ މުހިންމު މޮނިއުމެންޓެވެ. މި ޓަވަރު ބަލާލުމަށް އެތައް މިލިއަނު ބަޔަކު ކޮންމެ އަހަރަކު ޒިޔާރަތް ކުރެއެވެ.
ޓަވަރު ބިނާކުރަން ފެށީ 1887 އެއްގައެވެ. ޓަވަރު ބިނާކޮށް ނިމުނީ 1889 ވަނަ އަހަރުއެވެ. ޓަވަރަށް ނަން ދީފައިވަނީ ޓަވަރު ޑިޒައިން ކޮށް ބިނާކުރި ކުންފުނީގެ ވެރިޔާ ގުސްޓާވް އައިފެލްގެ ނަމުންނެވެ. ޓަވަރުގެ އުސްމިނަކީ 1063 ފޫޓެވެ.
