ހއ. އިންނަފިނޮޅު ފަރަށް އެރި ބޯޓެއް ކައިރި އަށް ސިފައިން ދިއުމުން ބޯޓުގައި ރޯކޮށްލުމަށް ފަހު އޭގައި ތިބި މީހުން ކަނޑަށް ފުންމާލައިގެން ފިލަން އުޅެފިއެވެ.
އެސަރަހައްދުގައި މިވަގުތު އެމްއެންޑީއެފާއި ފުލުހުން ދަނީ ހަރަކާތްތެރި ވަމުންނެވެ.
އެމްއެންޑީއެފުން ބުނީ މި ބޯޓުގައި ތިބީ އަށް މީހުން ތިބި ކަމަށާއި އަދި އެއީ ބިދޭސީން ކަމަށް ލަފާކުރެވޭ ކަމަށެވެ. މިކަމުގެ ރިޕޯޓް ލިބިފައި ވަނީ ހެނދުނު 6:00 ހާއިރު ކަމަށް ވެސް އެމްއެންޑީއެފުން ބުނެއެވެ.
މިއީ ކޮން ތަނެއްގެ ބޯޓެއް ކަން ކަށަވަރު ވެފައި ނުވި ނަމަވެސް އެ ބޯޓު ފެނިގެން ރިޕޯޓްކުރި އެ އަތޮޅުގެ ބަޔަކާ ހަވާލާދީ ބައެއް މީޑިއާތަކުން ބުނެފައި ވަނީ އެއީ ލަންކާގެ މަސް ބޯޓެއް ކަމަށް ލަފާކުރެވޭ ކަމަށެވެ.
އެމްއެންޑީއެފުން ބުނީ އެ އަށް މީހުން މޫދުގައި ތިއްބައި ފުލުހުންގެ ހަވާލުކޮށް މިހާރު ހއ. އިހަވަންދޫ އަށް ގެންގޮސްފައިވާ ކަމަށެވެ. ބޯޓު އަންދާލުމާ ގުޅިގެން ބޯޓުގެ ބައިތައް އެ ސަރަހައްދުން އޮޔާދާތީ ދަތުކުރާ ފަރާތްތަކުން ސަމާލުވުމަށް އެމްއެންޑީއެފުން ވަނީ އިލްތިމާސްކޮށްފައެވެ.
